朱古力奶細佬/細妹?

睇見呢個post, 相信好多狗友都會好興奮, 以為我終於攪掂CoCo爸, 可以養多隻狗...多就係多, 不過唔係狗仔, 係人仔呀!  係咪好surprise呢?  我諗好多人都會覺得我地唔似係想生bb嘅人, 不過其實我地有晒計劃架, 好似揀養咩狗, 我地都揀容易同小朋友相處既狗種, 我地又等到朱古力奶起碼3歲定d先, 加上我又趕得切唔駛做高齡產婦, 所以大家唔駛surprise!!!

至於朱古力奶, 我同佢地既相處方式暫時冇變, 佢地依舊同我瞓埋同一張床瞓晏覺, 因為朱古力奶好乖, 瞓覺唔會周身郁! 我地每晚都依舊落街玩波(不過每朝就要coco爸負責), 當然我只係負責茶水檔啦! 而水, 都一樣照游, 分別在於我只係負責坐係一邊睇, 同埋坐係度同牛奶妹吹毛! 

至於辛唔辛苦.......真係好辛苦! 一日24小時無論食野唔食野, 個胃同腸都充滿氣, 頂到上心口, 又嘔唔出喎, 如果唔夠瞓仲死, 試過有日喺公司坐喺度做野(仲要係唔趕既嘢)都可以頭暈!  到10週之後, 情況更加惡化, 有時朝早嘔胃酸, 日頭個胃繼續頂, 頂到半夜一兩點就頂到嘔, 仲要嘔返夜晚果餐消化唔晒嘅嘢出黎, 到朝早五六點又要起身去廁所, 基本上係無覺好瞓!   我仲嘔到隻眼爆埋微絲血管(後來睇醫生先知原來嘔得勁會爆眼微絲血管!!)   食又食唔到, 又係咁嘔, 攪到坐低起身都眼前一黑暈暈地!  月頭覆診醫生見我辛苦成咁, 開左一個星期病假比我.  不過都唔見得好舒服! 最慘係終日好似患左絕症嘅病人咁, 有病又無得醫, 如果屋企唔係有朱古力奶日日擺出一副(係兩副至啱) super cute嘅樣, 我諗我已經有產前抑鬱啦!   唉, 所以話做人阿媽真係好偉大架, 大家要對阿媽好d啦!!!

我係睇朋友介紹嘅尹鎮偉醫生, 佢雖然cool D, 不過好有經驗同比人感覺好pro. 4月頭覆左診, 度o左頸皮驗o左血, 唐氏screening正常.   至於係男定女呢, 醫生話未可以confirm, 但係佢都估左個性別(佢估嘅都係我希望嘅! )  而家bb大約15星期啦, 大家又估下係仔定係女?

呢幾張係12週左右0既ultrasound, 睇阿b瞓喺度個樣幾c服, 佢就c服得過啦, 真係難為佢阿媽......我!!!!!! 

 

手指仔:

一對腳仔, 仲見到腳指添:

p.s.  呢個就係上次淨係帶Milky去赤柱無帶CoCo嘅原因啦!  因為基本上我一直都唔舒服, 所以同朱古力奶出街都係輪流帶, 果次淨係帶Milky, 有時就淨係帶CoCo, 咁樣會輕鬆D!