赤柱大出血

其實三小姐頭半年著嘅衫仔, 自己買嘅, 加埋朋友比嘅3袋紅白藍(特別鳴謝Eddie & family獨家贊助!), 已經more than enough啦!  不過喺網上見到有人話赤柱d出口店有好平嘅bb衫賣, 星期日去開赤柱就諗住去"睇"下, 點知......當然唔係得個"睇"字!

Carter's newborn BB衫, 質地好soft, $29/pc, d款仲好cute添!

 Old Navy bodysuit for 3 months, $49/pc

Carter's for 6 months, 好似大約$59

呢兩件for 9 months 咁"男仔"嘅款, 係CoCo爸話要買嘅, 佢話三小姐太多好女仔嘅衫, 要買d中性d型d喎!

買呢件嘅最主要原因, 係因為衫上面嘅呢句精警嘢!

連for 12 months都買埋!

最後總共用左3百幾蚊, 唔知叫唔叫好平, 不過件件d質地都好好, 因為全部都係出口美國貨!

決定生劏!

35週4日去覆診, 睇私家都等左成個半鐘, 全因為唔知點解呢次超多內地同胞, 真係多到無位坐, 仲要一個人覆診就帶3,4個親戚一齊黎, 多多位都唔夠坐啦!

其實過去3個星期都有d緊張, 到底三小姐調左頭未呢?  望穿秋水, 終於等到覆診啦, 結果係......仲未調頭!  醫生話如果而家都未調, 應該都唔會調, 所以決定book期開刀生劏!  我地問醫生bb唔調頭development有無咩問題, 佢話無事, 佢自己兩個囝囡都唔調頭!  一般開刀都會揀38週, 不過因為三小姐size唔大, 而家35週幾大約5lbs3oz, 所以醫生話過左38週先會好d.  因為我地唔洗擇日, 所以邊日都無咩所謂, 最後決定揀38週4, 即係10月13號.  其實揀呢日都唔係完全求其揀嘅, 都有兩個原因:

1.  因為三小姐唔調頭, 醫生話如果作動同穿水就比較緊急同有一定危險, 所以我唔敢揀39週咁遲.

2.  揀13號嘅話, 咁我3個囝囡都係13號生日啦!!! (CoCo係1月13號, Milky係4月13號)

之前仲15/16用無痛定開刀, 而家唔洗揀都未嘗唔係一件好事!  不過話晒都係劏肚手術, 真係有d驚!  最驚都唔係傷口痛, 因為會有止痛藥, 最驚嘅係半身麻醉開刀嘅過程, 因為個人係清醒嘅, 雖然有布遮住, 但係聽到成個手術過程, 我仲要聽得明醫生姑娘講嘅醫學名詞, 知道佢地攪緊咩, 真係唔驚就假!!! 

醫生仲話直接喺醫院見, 唔洗再覆診, 我地就梗係要求生之前check多次啦, 雖然開刀都無咩好check, 不過check左安心d, 所以如無意外, 下次37週就係最後一次產檢啦! 

我諗我開刀果日實會驚到腳軟!!!!!!

朱古力奶公公60大壽

9月3號係朱古力奶公公同姨姨一齊生日嘅日子, 今年仲係公公60歲大壽添, 所以就去左公公嘅"非佛"restaurant - Element利園食飯啦!

點解朱古力奶姨姨同表舅父嘅笑容咁勉強???  因為等緊開枱打牌等到呆呆滯滯!

當日嘅兩位主角, happy birthday!

60大壽喎, 又點可以無壽包呢!  壽包......my "非佛"!

大合照, 不過揸機果位伙計哥哥d技術真係......塊鏡反晒光啦!

朱古力奶表舅父仲咩咁無奈?  全因輸左幾底ma雀!!!!

My Pregnancy Photos

上個月30週幾, 去左學人影大肚相.  一般最適合影0既時間係28至34週, 因為如果個肚太細又影唔到"立體感", 太大又會肥同腫, 所以我就揀左 30週多d去影啦!    好彩唔係揀再遲d去, 因為我影果時仲未有肚紋, 影完之後個零星期d肚紋就出晒黎啦!!!!

我去影呢間Fab Studio比較"冷門", 唔係最多大肚媽媽去影果一兩間.  一來覺得佢影得自然d, 好fresh, 無其他咁"行", 坊間好多都好似同一個pose key唔同人個頭上去咁!  加上呢間0野個攝影師同化妝師都係女仔, 影果日成間studio得CoCo爸一個男人, 始終影大肚相都會sexy d, (我無試過著得咁少影相架), 所以全女班就無咁尷尬啦!  仲有就係佢唔算好貴(當然都唔算最平), 比起某d "出名"影大肚相0既studio 平一半, 埋單二千幾有28張相加本相簿, 同埋我鍾意佢地provide果d衫, 好適合影大肚相. 

最初諗住帶埋朱古力奶去影架, 但係又驚到時架車要泊到好遠, 唔知要行幾耐先到, 果日又超熱, 所以都係唔好咁辛苦, 無帶阿囝阿囡去.  點知原來0係正studio座大廈有得泊車, 方便到痺, 早知帶埋朱古力奶去啦!!!

 

 

 

 

 

 

 

調唔調頭???

32週幾去覆診, 醫生話馮三小姐而家4磅幾, 唔算size大, 如果要順產應該唔難, 到出生時會大約6磅幾.  不過呢, 今次醫生見到三小姐個頭轉左上上面, 上兩次明明已經向左下囉喎!  醫生話而家仲未知, 因為呀三小姐可能會再轉, 如果下次35週再check個頭都仲未向下, 就好大機會要開刀. 

其實如果完全比我自己決定, 我都未決定到用無痛自己生定係開刀, 所以就算真係無得揀要開刀, 都無咩所謂.  不過只係淨返6個星期左右, 三小姐突然玩嘢唔掉頭,  攪到我有d緊張添!!!

喺我開始緊張嘅時候, 好彩新到個工人都算ok, 話頭醒尾而且都叫聽話, 煮餸好食, 星期日放假仲問我佢可唔可以早d返黎, 唔想喺街度hang around, 返到黎仲主動做家務, 好似拖地同整生果比我地食, 平時都好鬼樸素, 有時係我地覺得佢d衫太殘........!  So far 都叫ok啦, 希望佢喺三小姐出左世之後, quality都可以keep到啦!  加上我地而家又0係房裝多個ip cam(Panasonic BL-C131), 雖然只係我公司睇到, 不過都總算係房同廳都睇晒, 放心好多! (特別鳴謝Eddie教Coco爸set個ip cam, 如果唔係, 我地都唔知要攪幾耐先set到!!! )

至於朱古力奶呢, CoCo自從工人黎左之後, 好似仲比之前嗲多左, 我地返屋企之後, 佢成日都挨身挨勢, 訓0係地下都要將個頭挨埋我地隻腳度!  攪到果日婆婆問點解CoCo而家成個女仔咁?????