終於都到5月8號!
我諗都無咩邊間nursery咁遲先interview, 不過都好, 對Sheryl呢d細囡 (8月後出世)來說, 大個d先in都有好處.
今日in上午10:00, 時間上算ok, Sheryl都係比平時早幾個字起身. 不過由於作病, 尋晚食左藥先瞓, 攪到今朝狀態一般, 有少少呆滯.
準備好出發啦 ~~~~~~
去到中康校舍, 分8間房作小組面試. 每組6個人, 半小時一組, 如果9:30am係第一組, 一直到12:30pm, 應該有7節, 每節8組(8間房), 屈指一算, 起碼都超過300人面試!!!!! 只係粗略估計, 因為唔知下午仲有無interview時段! 咁又收幾多人呢? 維記分大細囝兩group, 8月前出世嘅大囝已經喺3月見完收完, 8月後出世嘅細囝就今日先見. 以我地見嘅中康校舍來說, 上下午班共收96人, 大囝班已經收左約56人, 校長話細囝班會收約40人. 即係300幾人爭40個學位. 平均8個先收1個!
面試過程:~~~
其中一個家長陪小朋友小組面試, 另一位家長join group discussion同校長見面. 當日我負責陪Sheryl, daddy就去group discussion.
入到課室, 小朋友可自由玩兩張枱上的玩具, 有3位老師觀察. 佢地話係warm up session, 不過唔知計唔計分, 就算唔係正式計分都會有印象分掛!?
Sheryl先玩入coins, 其間都有撩隔離個小朋友玩 (不過人地唔so佢!), 跟住就玩入d剪開左一粒粒嘅飲管入個礦泉水樽度, 這時英文老師走過來打招呼, Sheryl都有同老師wave, 不過唔肯開金口,
老師問佢,"Can you choose a blue one?"
Sheryl睇左兩秒, 真係揀左粒藍色入落個樽度, 老師讚佢同問我, "how old is she?"
我答, "18 months"
老師:" Oh, she is so smart! Does she understand English better?"
我即時答, "Yes, we speak both language at home but she seems to understand English better."
Sheryl d中文真係唔多掂, 大部份物件, 形狀, 顏面, 佢都只係識英文, 中文我地都有教佢, 不過中文佢好似學得慢好多. 我就係驚一陣interview問佢中文佢用英文答, 所以同老師報定案先!
英文老師走開之後, 我發現枱上有Sheryl最擅長嘅形狀puzzle (circle, square, rectangle, oval and triangle), 呢塊野同屋企果塊一樣, Sheryl一定唔會有閃失, 準備開始玩之際, 中文老師走埋黎, 問Sheryl "你叫咩名呀?", 大家都知Sheryl已經識講自己中英文名, 但係偏偏喺呢個重要關頭我地馮大小姐決定唔開金口, 問極都唔答! 老師唯有話"唔緊要啦, 要warm up下先!" 跟住就走開左......
人地走開左, Sheryl就開始9秒9完成個shape puzzle, 同時老師就叫收玩具, 準備開始group interview啦! (即係無人睇到Sheryl完成個puzzle......)
我地group有5個小朋友 (應該有1個no show), 英文老師開始先, 喺個盒度拎左隻puppet鴨仔出黎, 話係mammy duck, 然後唱Five little duck, 每唱一段就拎一隻鴨仔出黎, 其間觀察小朋友反應, Sheryl都好enjoy, 一路聽一路搖手 (其他4個小朋友無反應), 唱完之後老師叫小朋友同ducks say goodbye, 大部份小朋友都做到wave goodbye. 點知wave完goodbye之後, Sheryl突然企起身行出去老師度, 將5隻鴨仔逐隻放返入個盒度. 老師當然笑住咁講thank you, 不過我就真係唔知係好定唔好, 人地無叫又自己走出去幫手執野........ 跟住隔壁果位家長見唔好執輸, 係咁推個囝出去叫佢touch the duck, 佢個囝唔想出, 佢就係咁推, 到推到佢出去既時候, Sheryl已經將最後一隻鴨仔都收返入個盒度...............
跟住老師派一人一粒紙星星, 唱twinkle twinkle little star, 一路唱一路搖粒星, Sheryl企左起身好high咁跟住做, 其他小朋友都有做, 點知Sheryl high得滯, 指住我order我: "stand up", 即係要我一齊做! 唱完之後老師叫小朋友跟佢做"put the star behind your back", 呢part就只有Sheryl一個跟到.
第二part中文老師負責, 每人派一個圈, 扮driving wheel, 跟住小朋友要起身跟住老師圍班房行一圈.
最後老師一人送一隻手指puppet做禮物, 我叫Sheryl say thank you, 佢都有細聲講, 不過唔知老師聽唔聽到.
至於parents discussion, 之前有家長話會計分, 但係當日佢地講明唔計分, 家長身上只有一個number label, 無小朋友個名, 理論上係唔會identify到邊個係邊個家長.
結果要成3個星期先知, 又要等到月尾!
講真, 以Sheryl當日嘅表現, 絕對係全組最特出果個, 不過唔知selection criteria係咩, 加上真係得好少位, 仲少位過大囝, 所以如果真係唔收, 都"非子之罪", 喺daddy mammy心目中, Sheryl你已經表得好好架啦!
為左獎勵你, 等你瞓醒晏覺就帶你去"睇"玩具啦! 係呀, 係睇唔係買, 因為睇下玩下你已經好開心了!
發表文章
