發表文章
所有留言
之前差d唔記得出呢個post tim! 話說身在花旗國好食好住嘅Cookie, 即係朱古力奶表舅父, 家陣差唔多7個月大啦, 仲上完obedience course, 畢業啦!!!!!!! 嘩, 時間過得真係快, Cookie話咁快就大個仔啦, 而家成個大個仔樣, 成個beagle嘅古惑樣!!! Congratulations Cookie!!!!
朱古力奶兩個表舅父 ~ Uncle Renny and Uncle Cookie
Auntie Angie and Uncle Cookie
朱古力奶: Uncle Cookie 恭喜晒你呀, 有機會記得指點下我地呢d後輩呀!
之前買左部NDS, 好鬼好玩, 當中最好玩都係Mario Kart! 話說細個果時第一部遊戲機就係任天堂, D game真係好好玩架, 任天堂d game好有創意, 好funny! 後來轉左playstation之後, 失落左一段時間, 因為無得玩任天堂exclusive嘅game, 例如Mario系列! 直至最近買左NDS, 原來d經典Mario game仲有得玩, 而且咁多年之後玩返都覺得好好玩! 曾經以為NDS係女仔玩意, PSP就係男仔, 原來唔係喎, 我表弟最近就放左部PSP, 買左部NDS同我地一齊玩啦!!!!!! 而家我, CoCo爸, 我細妹, 我表弟, 同埋CoCo爸細佬一人一部, 如果坐埋一齊, 仲可以join埋一齊玩, 傳統遊戲機就要一人一個手制先可以5個人玩, 如果用NDS就一人一部機, 好正!
可能因為近年NDS同Wii勁hit, 日本出左好多mario公仔呀, 呢set Mario Kart扭蛋公仔好正, 我至愛黎呀!! 呢set都好靚架, 有我好鍾意嘅蘑菇!
已經成為實習動物醫生(Dr. Pet)嘅Milky, 今日又去左考狗醫生(Dr. Dog)!
之前聽人講過話Dr. Dog好似難考過Dr. Pet, 要求好似高d, 所以果時就同Milky試左Dr. Pet先. 我地見佢去探訪果時表現都ok, 就同佢報埋Dr. Dog, 即管睇下見到其他狗會發癲撩人玩嘅Milky, 又可唔可以pass到Dr. Dog呢?
今日考試場地係奧海城商場大堂, 又撞正馬拉松封路, 行西隊都塞車! Appointment喺下晝1:15, 1:10先入到停車場, 又搵唔到大會叫我地搭果部貨lift, 又無之前話有嘅指示, 去到商場又話唔比狗入, 要兜一大個圈先去到, 結果無理佢, 照入去, 去到剛剛好1:15, 另外有兩隻西摩又係搵唔到路, 結果跟住我地照行入商場!
趕到死下死下, 終於開始考試啦....首先有一個姐姐負責考試, 又摸又扯又掟嘢落地嚇Milky, 跟住比嘢佢食再係個口度拎返出黎, 其實都攪左好耐, 成5分鐘, 跟住再交比個外籍姐姐, 又重覆以上動作, 又攪成5分鐘...其間佢叫milky 側身瞓底(即係bang), 屎火, 阿囡不嬲都唔係好肯bang, 結果出到嘢食佢都唔肯!!!!!! 最後就叫我同阿囡heel住行, sit, stay, come果d, 阿囡都ok啦! 我心諗佢考成10分鐘, 重覆攪完又攪, 阿囡又唔肯bang, 可能都唔得多啦! 外籍姐姐最後走埋黎話"Congratulations! Milky passes and she is Dr. Milky now!" 嘩, 好彩無肥佬, 無"side"到我五舊水考試費!!! 話說朱古力奶姨姨同婆婆特登黎睇Milky考試, 考試其間其實阿囡發現左佢地, 好彩都無失控! 一聽到考試合格, 姨姨同婆婆即刻開心大叫, Milky即刻衝過去, 二人一狗好似久別重逢咁!!!!
不過examiner check Milky 嘅時候, 發現Milky左後腳個hip有ｄ緊(stiff)， 叫佢去Body check嘅時候check埋個左hip! 明明之前desex果時照左x-ray, 醫生都話Milky個hip joint好好, 仲話好少見local金毛個hip咁好! 上次Dr. Pet body check都有check過個hip, 都無事! 攪到我好擔心tim, 明明平時一d都唔覺阿囡行路有咩問題喎! 希望阿囡個hip無事啦, pass唔pass到body check 唔重要, 最緊要阿囡健健康康!!!!!!
一考完就有"寵物閒情"嘅記者走埋黎話要做訪問, 咁我心諗成日咁多隻狗考, 佢仲咁熱心逐隻問嘅? 佢話原來佢黎左成朝, 只係得30%嘅狗合格, 而且全部都係金毛! 跟住我地同阿囡應大會要求影完相, 再同個記者傾完之後終於走得啦! 跟住就要約時間去做body check, pass 左先可以正式"上工"!
阿囡好叻叻呀!!!!! 雖然仲要body check, 但係喺阿媽心目中, 你已經pass左架啦, 最緊要身體健康呀!
