何文田耆樂居

１月２７號，Dr. Milky又開工啦!

阿囡係護老院門口，又比細路 '圍' 啦!

阿囡收工之後，搵埋朱古力奶姨姨去又一村食tea,　阿囡竟然驚呢隻狗公仔，　拉極都唔肯行埋去，　要搬佢先可以坐埋去影張相，　但係都係坐得好開，　都唔知佢驚乜!!

Milky唔只係白蟻......

前幾日買左個molecuball比Milky玩, 諗住CoCo細個都有玩, 但係Milky細個果陣竟然唔識玩，　而家再買個比佢玩下啦!  第一日都無事，　阿囡識得拎晒入面ｄ嘢食出黎食!  點知第二日，CoCo爸返到屋企，　發現個molecuball無左四分一, 仲搵極都搵唔到d屍骸!  嚇到我地即刻打去Milky睇開個vet度問，　姑娘話因為唔知佢係咬碎吞定係大塊吞，　要觀察佢一兩日，　如果食得又無嘔就應該無事!  好彩阿囡之後兩日都食得瞓得，　痾便便果陣都見有少少紅色碎膠，　希望佢無事啦!  阿囡之前已經有前科，　刨晒枱腳ｄ木，　但係今次係硬膠，　如果塞住條腸就死火啦!!!!!  以後比玩具佢玩真係要小心ｄ!

阿囡有新招!

Milky 05年8 月尾黎到我地屋企, 一直都唔係好跟人, 只係跟阿哥(CoCo), 如是者過左成年都係咁, 一直到06年中, 我地決定唔要佢個4尺大籠, 轉左用個膠圍欄比佢訓, 佢就成個唔同晒, 好明顯係開心左好多, 仲越黎越嗲, 以前佢唔會鍚我地架, 而家成日lam我地隻手, 見到我地返屋企仲會開心到跳扭腰舞!

話說最近又識多左樣新嗲招, 就係叫人摸佢!  佢會用手搭係我地隻手上面, 有時仲會撥我地隻手埋佢自己度, 如果我地摸摸下停手, 佢又會再搵隻手仔搭我地隻手! 

阿囡你真係寵壞晒啦!!!!

回顧~CoCo的兩次船河

上星期CoCo兩歲生日, 先發覺原來CoCo大個仔啦, 摷返佢細個d相出黎睇下懷念下!  原來阿囝呢世狗暫時只係去過兩次船河, 但係兩次0既分別都好大下, 不過兩次阿囝都勁開心, 見佢玩得咁開心, 不禁諗: 呢d活動先arm阿囝架ma, 大自然同佢好match!!!

第一次船河係05年10月1號, 阿囝只有9個月大, 想當年佢有一對好靚0既白色眼線圈架! 

9個月大0既CoCo仲係好細膽, 連駁艇都唔敢行落去, 要人抱架!  落到海仲變左"攝青鬼", 0係咁跟住我地, 驚死我地留低佢咁!!!

 

第二次船河係06年7月23號, CoCo已經1歲半啦, 有咩唔同呢 ? 

佢見到水就好似上身咁, 興奮到不得了, 仲大膽到擒起身睇!  跟住見到佢老豆0係船尾跳落海, 佢真係大膽到諗都唔諗就跟住跳, 都唔緊要啦, 但係又唔估計下自己有無能力游埋岸, 好彩佢阿媽我一早買定張浮床, 阿囝游到一半先知驚, 0係咁抓佢老豆, 好在有張浮床, 兩父子先可以安全游到岸邊!  之前佢老豆仲話我好晒錢買張浮床, 如果唔係我同朱古力奶姨姨好辛苦咁pump張床, 你兩父子就大件事啦! 

 

大個仔0既CoCo落到海唔再裙腳, 仲玩到老豆阿媽姓咩都唔記得啦!!!

 

Renny, Rachael同Angie都玩得好開心, 小朋友同狗狗一齊玩, 幾溫馨!!!

 

掛住影狗, 同朱古力奶姨姨影返張相先!!!

Milky細佬

CoCo生日果日, 帶左兩隻野去Oasis游水, 點知撞到Milky唔同胎0既細佬, 佢叫星仔, 而家8個月大, 佢主人放佢黎寄宿, 成哥(Oasis 0既staff)見個池得CoCo同Milky, 又知道兩隻0野毫無殺傷力, 於是就好放心咁放左星仔入黎一齊玩, 自己就走左去做其他0野!  我地比錢黎游水, 仲免費幫佢奏埋狗...哈哈, 睇黎要收返佢錢就真!!!

星仔同Milky一樣, 會無啦啦拎高隻手仔, 呢個小動作原來係遺傳架!!!

 

星仔有一樣0野同佢家姐Milky唔同, 就係星仔好驚游水, 你睇佢個樣慘到......陰公!!!

 

呢樣0野就三隻0野都一樣......咁爛玩!

朱古力奶瞓覺篇

朱古力奶話, 天寒地凍, 最好就係瞓覺架啦......

Milky越黎越嗲, 比老豆抱住瞓到隻豬仔咁!

 

ZZZZZ.....  阿囡, 你唔係吓? 吊住0係梳化邊都瞓得著??????

 

呢張床超抵, 六十零蚊, 成三尺半乘三尺半大, 阿囝瞓左上去仲有大把位......不過, 張床唔夠幾日就比CoCo咬穿左兩個大洞!  唉......阿囝d床無一張過到一星期, 真係唔買得貴0野比佢瞓!

 

阿囝, 個迪迪尼cushion唔係枕頭黎架!!!!

阿囝, 瞓到咁, 個cushion成個都係你d口水啦!

CoCo兩歲生日會

1月13號係阿囝兩歲生日, 時間過得真係快!  今年仲有朱古力奶公公婆婆同姨姨一齊開生日會tim!  

親手整0既香蕉蛋糕!

 

阿囝個樣幾斯文, 少有少有!

 

阿囝其中一份生日禮物~型仔黑超!

阿囡借黎戴下先, 都好靚喎 !

超迷理Greyhound, 好鍾意呀!

星期六雖然有d凍, 但係好好陽光, 最好就係去"反"啦!

CoCo爸眼見水媽(Wendy)影d相咁靚, 條氣唔順, 話自己影果d都差唔多姐, 就捉左我地三母子/女再去大潭影相!

阿囝可能真係大個囝啦, 乖左好多, 以前行山一見到狗就衝過去, 叫佢佢就扮聽唔到!  最近乖左好多, 佢老豆一叫佢佢就剎制掉頭返過黎, 阿囝真係good boy!  阿囡就......仍然係有得玩就老豆阿媽姓咩都唔知!

好得意0既超迷理Greyhound, 真係好細隻, 好似jack russel咁0既size, 但係都跑得勁快, 所以佢個名叫Speedy!  原來有咁細隻Greyhound, 好得意又好型, 好鍾意呀!!!!

 

阿囡執左個大足球, 有d手忙腳亂, 都話無咁大個口唔好擔咁大個波架啦, 囡!

嘩, 澳門賽狗呀?

全日我最鍾意0既相就係呢張啦!

元旦去行山

07年一月一號, 本來諗住0係屋企休息下, 但係見到好好天, 唔忍心要朱古力奶元旦無得玩, 所以就去左大潭行山啦! (雖然兩日前先去過)

朱古力奶仲識左新朋友仔呀!  幾個外國小朋友初初好驚狗, 但係佢地daddy mammy好好, 鼓勵佢地同CoCo玩, 最後佢地唔驚不特只, 仲要影相留念tim!  如果香港d父母都可以用呢種態度去教自己d 小朋友就好啦!