Fist stage of weaning – 10倍粥

健康院姑娘話5個半月大開始食米糊, 其實我地5個月已經試左幾日, 不過可能我太急進, 一次食得太多, 攪到Sheryl消化唔到, 有d肚仔唔舒服同便秘, 所以停左唔食住.  直到而家5個半月, 出現以下情況:

D書話當bb睇見大人食野好有興趣, 就係weaning既時候啦! 係咪即係咁……………

CoCo爸成日話米糊唔好, 要食粥仔喎, 咁我唯有親手整啦!

Step 1:  呢隻杯幾好用, 將米同水放入去, 放埋入電飯煲同大人d飯一齊煮, 好方便.  因為bb每次食好少, 我都唔知用個咩煲黎煲比佢食好, 用呢個杯就fit晒.  上面有晒刻度, 有10倍粥, 7倍粥, 同5倍粥.

Step 2:  煲完之後d米仲係一粒粒, 要用個磨黎磨爛佢, 磨到我……手都軟埋

Step 3:  溝返d粥水落去攪均, 變成呢個質地就ok

第一次食只係食1-2 spoon, 食完so far無問題, 係我隻手軟晒姐!!!!!!!

5個半月的"餿街精"

Baby Sheryl已經5個半月大啦, 大個左多左好多反應啦:~

5個月未夠第一次成功轉身, 到而家5個半月已經成日左轉右轉, 睇少眼都唔得!    

 

超八掛, 一有少少聲就擰晒個身過去睇, 食奶超唔專心!

 

發現自己有對手同腳, 咩都用手摸, 已經開始進入出街食飯會掃"木台"階段!

 

可能吽緊牙仔, 成日搵野咬, 又成日流口水

 

好明顯地厭奶, 一日5餐平均每餐只係食到5-6安 (150ml-180ml)

 

Attention seeking, 唔理佢佢會出絕招 - 尖叫!  知道自己有把聲之後成日"玩"自己把聲, 嘈死!!!!

 

認人, 個衰妹認人認得好緊要, 成日攪到我地好embarrass.  一有唔識既人望住佢或者撩佢傾計, 佢會眼定定咁望住人3秒, 跟住就極速爆喊!!!!  正所謂你唔望人又點知人望你呢, Baby Sheryl你家陣好巴閉咩, 望下都唔得!!!!  阿媽最唔鍾意d小朋友係咁, 你就偏偏係咁!  睇黎playgroup錢都係唔慳得, 本來諗住咁早返playgroup都多餘, 咁細個都係parallel play only, 但係都係要比佢同多d人interact, 希望可以desensitize下啦!

 

細個果陣一放佢落carseat 就喊到拆天, 而家不知幾enjoy, 因為知道有街去!

 

餿街精同公公婆婆食飯, 成餐飯都要人抱住咁滯:

 

 

比人擺左上枱!

本來十五十六唔知買唔買呢張bumbo chair, 因為只係可以坐幾個月.  不過呢排Sheryl以為自己坐得穩,  成日都要坐起身, 唔比佢坐就瞓喺床度尖叫!!!  無個穩陣d嘅位比佢坐, 就要成日扶住佢, 真係手都軟埋.  所以結果都係要豪三百幾蚊買左呢張bumbo chair!

Sheryl 坐左落去就勁開心, 梗係以為自己已經坐得穩啦!

Sheryl: 阿媽仲咩無端端'擺我上枱"呢?????

坐喺度睇電視幾happy!

不過大家要留意, 坐呢張bumbo chair其實係唔應該放喺枱或sofa上面架, 要closely supervise先得!

我和薑餅人

差不多5個幾月嘅Sheryl, 開始對身邊嘅嘢好留意同好好奇, 佢每次一見到呢個薑餅人公仔就會好開心咁笑, 可能因為個公仔有個好大個嘅smiling face, BB都鍾意睇smiling faces!

Baby Sheryl:  Mr.薑餅人, 點解你成日都笑得咁開心呢?????

恐怖的猛長期和厭奶期

3月頭的猛長期:

Sheryl過去一個月食奶都唔係食得好好, 由一日5餐變做一日4餐, 一直都好地地, 可以一覺瞓天光, 不過月頭開始有d唔妥, 臨瞓果餐食完支240ml (8 oz)人奶之後, 仲lam lam脷唔夠喉, 於是就開多50ml奶粉比佢, 食完就瞓左覺.  點知到半夜兩點幾, 竟然喊起上黎, 脷lam lam又要食!  唯有用20ml嘅奶粉開50ml比佢, 等d奶稀d, 結果......又食晒!!!!!!!!!  好恐怖, 食左340ml!  個胃仔邊放得落咁多奶呀??????  跟住又瞓左個幾鐘, 又再喊醒, 又搵嘢食!  唔係下?  仲食?  嚇得我唔敢開奶, 只係比左d水佢飲, 佢連水都唔放過, 狂啜!  就係咁, 攪左成晚, 仲要瞓我同CoCo爸中間先肯瞓! 

第二朝我當然超眼瞓, Sheryl都一樣, 朝早7點幾比我摷醒食完奶之後, 一直瞓到下午一點幾先起身.  我地決定加返多一餐比佢, 不過份量減半, 費事佢食滯. 

睇Sheryl 咁嘅表現, 一定係又到左猛長期(growth spurt), 加上佢又有好多weaning signs, 例如食夠正餐之後都仲搵嘢食, 本來一覺瞓天光變成半夜醒幾次, 又成日放嘢入口咬, 我地雖然好想等到5個半月先比佢食米糊, 但係睇情況, 都要提早開始比佢試下啦!

3月中的厭奶期:

明明前幾日都係猛長期, 而家又變成厭奶!  本身朝早返工之前果餐都可以埋身餵5分鐘, 而家Sheryl直情死都唔肯食, 窒入佢個口佢仲會咬我!!!!! 

唯有變成全泵啦, 但食奶樽都好唔得好多, 每次食100ml就唔食, 剩低個d要攪成半個鐘先可以食埋, 一餐只係食到180ml左右.  我地懷疑佢係吽牙仔, 成日咬個奶咀, 又成日流口水, 於是就試下比米糊佢食, 食左4日, 每日食10啖左右.  點知佢食左米糊之後就開始無屎屎, 其實人奶bb幾日無屎屎係好正常, 不過Sheryl變得好扭計, 成日好似唔係好舒服咁, 可能係未適應食米糊, 所以就停左唔食住observe下. 

停左兩日佢就爆左兩次勁屎, 仲要爆之前喊到死, 爆之後就成個舒服晒, 即刻收聲唔喊.  所以好可能係米糊唔係太消化到, 唯有delay多兩個星期先再試啦!

3月頭開始比Sheryl攪到頭都大埋, 真係得閒死唔得閒病, 仲要無覺好訓!!!!!  阿囡你幾時先過呢個恐怖既厭奶期呢????