Potty training...or not?

而家我地返晒工, CMS就由嫲嫲同工人姐姐照顧.  其實除左最早果餐奶之外, 其他時間都係由嫲嫲照顧Sheryl.  天下間所有嫲嫲都有一個共通點, 就係 - 唔可以"叉能廚"佢地奏b既方法!  對於呢個issue, 我已經睇得好開, 開始果時都有忍唔住出下聲, 而家Sheryl大d, 食固體食物順利左, 可以忍到都唔出聲, 話晒嫲嫲奏點都安全過靠晒工人! 

嫲嫲繼早前大力反對我用食物研磨器磨爛d粥仔(當時Sheryl只得6個月, 剛開始試食粥仔), 話我攪"wang"晒d粥之後 , 最近又再獻新猷, 就係......"筋"Sheryl呵屎屎!  Sheryl而家每日都要除左條片比嫲嫲"逗"住開大, 而成功率都有90%, 阿囡而家反而唔係好鐘意呵屎屎0係條片度.

其實"筋"bb呵屎屎呢家野好多老一輩都會做, 仲要bb幾個月大已經做.  據可靠消息指, 我細個都係比我嫲嫲"筋"呵屎屎0既, 問題應該不大??!!

但係之前都讀過下兒童心理學, 阿心理學大師佛洛伊德話太早train呵屎屎會影響將來心理發展, (http://en.wikipedia.org:80/wiki/Anal_stage) 醫生姑娘好多都叫唔好咁早potty training, 咁究竟有無問題呢????

經過一番研究之後, 加上請教埋心理學畢業0既Sheryl姨姨之後, 覺得只要逗佢呵屎屎0既時候佢無bad experience (e.g. 喊, 扭計, 好耐先有得呵 etc.), 其實早d比佢習慣唔好淨係肯呵0係片度都未嘗唔係一件好事!  所以而家Sheryl每日同樣時間都會比嫲嫲逗佢呵屎屎, 而佢次次都會2分鐘左右就呵完, 無喊無唔happy, 咁就由得佢繼續接受嫲嫲既 "potty training"啦!

雖然Sheryl未正式坐落個potty度, 不過為左令佢可以associate到呵屎屎同個potty, 我就買左呢個3合1potty比佢, 細個可以做potty, 大d可以將個廁板放上大人廁所度用, 個base就變成腳踏!

 

OMG, 11個月大就要報名讀書???!!!

最近突然醒覺, 原來下個月(9月)就要幫Sheryl報名出年0既nursery!!!!  快成咁? 得果11個月大咋喎!!!!   係真架, 唔係講笑!  兩歲Nursery係要一歲報名0既, 而報名時間只有每年9月.

其實兩歲Nursery唔係必須, 可以唔讀, 等3歲直接入K1, 不過我平日要返工, 到左兩歲呢個trouble two時期, 留阿囡0係屋企對住工人/嫲嫲, 100% sure會寵壞!  到時激到自己嘔心瀝血就無謂!  都係早d比佢返學學下discipline好d!

初時諗住報nursery好簡單, 是但近屋企口碑又唔太差就ok! 但係上網睇過好多家長意見同心得, 原來由nursery開始, 已經影響到將來讀邊間幼稚園, 小學同中學!  越睇越煩, 加上中小學轉334制,無會考無A Level, 得張"香港中學文憑"=??????   唔buy 334 (做教育局0既白老鼠, 母語教學0既失敗係一個好例子), 就要international 或 IB, international我唔想, IB又要傾家蕩產, 點算?

我係田鴨式教育0既受害人, 細個從來無鍾意過返學, 我唔想阿囡步我後塵, 所以什麼根德園, 培正, 真光.....唔想揀! 

咁攪法, 真係唔知揀咩好, choice好少又要睇餸食飯($), 頭都大埋!

以下係暫時黎講最理想0既組合:

Nursery (Victoria /蘇浙) --> Kindergarten (Victoria / 聖公會 / 靈糧堂 / 蘇浙) --> Primary (St. Paul co-ed / 港大同學會 / Victoria / 蘇淅) --> Secondary (St. Paul co-ed / 港大同學會)

據說St. Paul co-ed同港大同學會都會攪IB stream, 唔知到時係咪可以到中學先揀334/IB呢?

諗得好理想, 以上每間都超額幾倍, 阿囡考唔考到都係一個大問題, 所以香港0既小朋友真係慘 (家長仲慘)!!!!!

台劇 "命中注定我愛你" 好睇, 好笑好感動呀!

雖然呢套劇已經係舊年0既事, 成日都聽人講話好好睇, 到最近終於"的起心肝"買左set dvd!

同睇之前"王子變青蛙"同埋Harry Potter 本書一樣, 一睇就停唔到, 因為真係太太太太好睇啦!  因為呢套唔只係一套愛情片, 仲講到主角大肚生bb, 加上好多笑位, 劇情又好細心舖排, 同三色台果d爛片真係無得比!  人地拍得有heart好多!!!!

劇情大致係講互不相識0既男女主角0係一次"意外"中"上錯床",  女主角仲有左!  被迫結婚後, 婚後第一日就簽下離婚協議書, 等10個月後bb出世就離婚!!!!http://www.settv.com.tw/metro/m119/

當中有好多感動位, 其中男主角同醫生講佢地有左係"意外", 跟住個醫生好惡咁教訓佢:  "每個寶寶都是上帝牽著手帶來這個世界上的,沒有任何一個是意外....孕育一個生命,不是意外,是命中注定的, 所以要珍惜在一起養兒育女的機會"

另外男主角家族生意賣0既肥皂叫"傳承" - "讓生命在愛的環境下延續下去, 就是傳承背後的精神意義"  都好感動呀!

一套劇之所以好睇, 其中一樣好重要就係要引起共鳴, 我地呢d有bb 0既當然有共鳴, 其實對於諗緊生唔生0既人, 都應該睇下! http://www.youtube.com/watch?v=HALnlBm1P4M

當然套劇唔係淨係講生仔, 仲有好多愛情位同笑位, 會令人睇到又喊又笑, 呢樣野我好佩服台灣d編劇, 劇中人物好少, 但係好專注同仔細!  呢點係香港d劇集永遠都見唔到0既!