反思 - 選校策略

一向討厭香港的教育制度, 朝令夕改, 重考試成績唔重整體發展, 2歲人仔連咩叫"返學"都未知已經要同人打崩頭爭學位.

有人認為幼稚園唔洗諗咁多, 最緊要開心!  有人認為要讀名牌幼稚園為將來舖路! 

其實個人認為無對錯之分, 只係睇下你想個小朋友成為一個點樣嘅人, 同埋父母經濟能力而決定.

雖無對錯之分, 但如果無計劃地, 自命清高地咩都唔諗, 除非大把錢讀IS, 又或者經濟上只可以靠大抽獎, 就真係咩都唔洗諗 / 唔到你諗.

唔諗固然後果自負, 諗得太多又唔見得好.  眼見身邊好多家長都好似 "羊太"咁, 今日呢位有錢阿太話A學校好, 聽日果位富貴同事又話B學校正, 不求什解地要令個小朋友讀呢d大部份人都覺得好嘅學校, 係為個囝囡好, 定係用黎絃耀自己囝囡係"名牌貨"?  (不過名牌貨唔係品質保證, 之前果位80後教識我嘅!)

例子, 識得有家長個囝讀維記幼稚園, 一心諗住直升中小學, 連人地間中學係IS定local都唔知, IB係咩又唔知, 第時張IB cert香港d大學嘅認受性又唔知, 第時會唔會比個囝去外國升學又未知.  淨係知學費成皮野一個月, 唔打得都嚇得, 又可以同時絃耀下自己afford到成皮野學費的能力同地位. 

我覺得一定要諗要計劃, 特別係我呢d無錢比佢讀IS, 又唔想只靠大抽獎. 

Nursery, 幼稚園, 小學, 中學, 大學....., 到底邊間好?  行邊條path?   我唔想自己好似"羊太"咁, 人地好又話好, 多人報又去報, 當然身邊個個都報"名校", 有時好難唔動搖.

Sheryl同老公張美國green card已經批左, 等多幾年可以做到residence, 咁代表我地可以用比overseas student平3倍嘅價錢讀美國大學.  咁我地就用top-down approach去揀幼稚園.  美國大學唔係太睇IB, 所以多數唔行IB條path.  咁既然想比佢去外國讀大學, 即係唔洗同人爭334入香港d大學, 咁即係唔洗太谷成績.  而Sheryl個款都係要"活動教學"果type架啦, 如果傳統學校我諗應該比人踢出校!

要"活動教學"又要affordable, 首先諗到直資. 

好嘅直資當中最喜歡HKUGA, 學費HK$1,800/month好吸引, 又近屋企.  其他有一兩間喺TKO都唔錯.  不過都係首選HKUGA, 因為佢地決定唔行IB, 行334, 到時進可攻退可守. 

上BK睇現任HKUGA家長意見, 原來學校上堂模式同維記中小學極相似.  而每年小一取錄生有4分1係黎自維記幼稚園, 所以維記幼稚園係我地首選. (唔係羊太架, hehe!)

BK上都有人批評HKUGA呢類新派直資, 話太唔重考試, 到時考334會唔著數,  其實334已經唔同HKCEE, 有人話334根本就係港版IB, 咁即係已經無以前咁重考試?  (實情係點唔知, 因為第一批都未考)

朋友女兒讀緊維記中學, 中二已經要寫論文, 做資料搜集 + presentation, 呢d野我地果個年代大學先會做.  我唔識人讀HKUGA, 所以唔敢話佢實際好定唔好, 不過approach係似維記.  我只係識兩個朋友係中學教師, 佢地都話HKUGA好, 咁我諗佢地嘅comment都應該幾專業同中肯掛.

當然計劃還計劃, 到時係點無人知, 阿囡能力上係點又未知.  不過自古機會都係比有計劃嘅人, 只要計劃之餘都要有contingency plan, 就唔會好似前排果位家長咁, 入唔到ESF小學要掟個囡落街. (讀左IS kindergarten, 要轉返好嘅local真係好難架, 當然大抽獎另計!) 

唔知top down approach係咪最好, 都唔知自己會唔會動搖, 又或者到時如果無一間直資收, 大抽獎結果又唔好, 係咪要挨貴學費讀維記小學?  又或者絕路返母校民記lur個小一位? 

Who knows?????? 只可以盡人事, 聽天命!

以上純綷有感而發, 不喜勿插: :-)

相愛很難 - 正!

上星期公司Annual dinner, 同事唱K唱呢首歌, 先令我記起呢首好正嘅歌, 係近年(其實都唔算係近年囉, 阿Mui都死左咁耐!)來我覺得最好嘅一首合唱歌.  曲詞都好好, 陳輝陽 + 林夕, 絕配!

width="480" height="385">

作曲：陳輝陽 填詞：林夕 編曲：陳輝陽

最好　有生一日都愛下去
但誰人　能將戀愛當做終生興趣
生活　其實旨在找到個伴侶
面對現實　熱戀很快變長流細水

＊可惜我　不智或僥倖
　對火花天生敏感
　不過　兩隻手拉得太緊
　愛到過了界那對愛人
　同時亦最易變成一對敵人

　也許相愛很難
　就難在其實雙方各有各寄望　怎麼辦
　要單戀都難
　受太大的禮會內疚卻也無力歸還

　也許不愛不難
　但如未成佛昇仙也會怕　愛情前途黯淡
　愛不愛都難
　未快樂先有責任給予對方面露歡顏

　得到浪漫　又要有空間
　得到定局　卻怕去到終站
　然後付出多得到少不介意豁達
　又擔心　有人看不過眼＊

REPEAT＊

無論熱戀中失戀中　都永遠記住第一戒
別要張開雙眼

 

 

 

台劇 "命中注定我愛你" 好睇, 好笑好感動呀!

雖然呢套劇已經係舊年0既事, 成日都聽人講話好好睇, 到最近終於"的起心肝"買左set dvd!

同睇之前"王子變青蛙"同埋Harry Potter 本書一樣, 一睇就停唔到, 因為真係太太太太好睇啦!  因為呢套唔只係一套愛情片, 仲講到主角大肚生bb, 加上好多笑位, 劇情又好細心舖排, 同三色台果d爛片真係無得比!  人地拍得有heart好多!!!!

劇情大致係講互不相識0既男女主角0係一次"意外"中"上錯床",  女主角仲有左!  被迫結婚後, 婚後第一日就簽下離婚協議書, 等10個月後bb出世就離婚!!!!http://www.settv.com.tw/metro/m119/

當中有好多感動位, 其中男主角同醫生講佢地有左係"意外", 跟住個醫生好惡咁教訓佢:  "每個寶寶都是上帝牽著手帶來這個世界上的,沒有任何一個是意外....孕育一個生命,不是意外,是命中注定的, 所以要珍惜在一起養兒育女的機會"

另外男主角家族生意賣0既肥皂叫"傳承" - "讓生命在愛的環境下延續下去, 就是傳承背後的精神意義"  都好感動呀!

一套劇之所以好睇, 其中一樣好重要就係要引起共鳴, 我地呢d有bb 0既當然有共鳴, 其實對於諗緊生唔生0既人, 都應該睇下! http://www.youtube.com/watch?v=HALnlBm1P4M

當然套劇唔係淨係講生仔, 仲有好多愛情位同笑位, 會令人睇到又喊又笑, 呢樣野我好佩服台灣d編劇, 劇中人物好少, 但係好專注同仔細!  呢點係香港d劇集永遠都見唔到0既!

My DEAR 賓賓

好多謝大家睇完上次有關我工人既事之後, 比左咁多寶貴意見我.  睇黎一係唔請外傭, 如果唔係請親都總係有d問題, 分別在於蠢, 傻, 奸,  定痴! 
 
上回講到賓姐話個胃唔舒服要落街買奶茶飲, 比佢買完夜晚又話要落街買蕉食, 今次我唔比佢去買, 食少一日蕉唔洗死呀?  我叫佢要食生果就食橙, 阿賓姐食野好picky, 厭橙酸唔食.  至於點解佢要食蕉, 又有一番典故!  話說農曆年前兩日, 阿賓半夜一點幾走出廚房煲水, 問佢咩事, 佢話唔舒服, 個心跳得好快, 手又震, 訓唔到, 諗住出黎飲d熱水睇下好唔好d, 佢又話好驚, 唔知係唔係個心有事.  攪到我地漏夜車左佢去東區A&E. 

Check晒BP, ECG, normal!  醫生叫佢留院一晚驗埋血, 第二日出院返黎, 話驗血normal, 不過potassium低喎, 比左杯嘢佢飲.  醫生叫佢兩個星期後再返去覆診, 再睇埋detail嘅驗血result.   聽佢咁講, 似係hypokalemia之類, 而醫生比佢飲果杯應該係potassium chloride.  不過hypokalemia成因可以好多, 小病又得大病又得, 所以醫生要再detail同佢驗血, 兩星期後再follow up.   覆完診返黎, 醫生話result normal, 無任何問題.  於是我就好心叫佢食多d生果, 好似蘋果同香蕉, 都可以補充potassium.  事關賓姐一向唔食生果, 厭酸!  自此之後, 賓姐就日日食蕉, 果晚我唔比佢落去買蕉,  半夜十二點幾又話好唔舒服, 又心跳同手震!   我果頭唔比佢去買蕉, 佢就半夜黎叫唔舒服, 實在好有'玩嘢"之.  CoCo爸嬲起上黎就叫佢唔好再咁嘈, 上次醫生check 過都話無事, 叫佢快d去瞓.   跟住佢就死死地氣返入房瞓.   我就同CoCo 爸講, 睇住黎, 佢第二朝實話要去睇醫生.

第二朝返工前, 見佢鬼打都無咁精神, 仲主動問我抹車洗唔洗抹埋入面, 因為Milky尋日坐過, 我趕住返工, 應左佢一聲"好呀"之後就出門口, 上左車諗下諗下就覺得事有蹺踦, 因為平時抹車身我預佢半個鐘, 如果抹埋車入面就預一個鐘, 睇黎佢梗係又想蛇落街食早餐!  不過我又諗可能係我小人之心姐, 可能佢真係好主動咁想幫我抹車入面呢?!   我8:30出門口, 9:30就收到電話, 賓姐打黎話佢好辛苦, 頭暈又想嘔又頸痛, 成晚都瞓唔到, 而家做唔到嘢, 好辛苦要即刻去睇醫生!  嘩, 佢準時到呢...剛剛一個鐘抹車之後就唔舒服,  仲要話尋晚無瞓, 但係一個鐘前仲龍精虎猛, 仲話幫我抹埋車入面!  較都無咁準, 睇死佢又蛇落街嘆完個早餐上黎先叫唔舒服!  好彩CoCo爸喺屋企, 我就叫CoCo爸夾佢去睇私家(小西灣名醫王露茜醫生, 我唔舒服都係睇佢!), 嫲嫲就過黎睇住Sheryl. 

醫生話賓姐個胃有氣, 應該係感冒入腸, 腸胃炎.  阿賓姐成日話自己咩都唔食得, 因為食完成日要去"呵屎", 但又唔係肚呵喎, 係正常果隻, 問佢大唔大量, 佢話次次都好多架.  但係食白飯, 奶茶同蕉就唔會"呵屎".  醫生都話無可能喎, 又唔係肚呵, 佢又無咩食嘢邊得咁多屎呵???  醫生都解釋唔到, 問佢係咪壓力大?   CoCo爸同醫生講話賓姐要飲奶茶同食蕉, 醫生即時話腸胃炎唔可以飲奶同食生果, 叫佢唔好食!  跟住開左成10包藥比佢, 叫佢一定要食晒!  

哈, 腸胃炎會手震心跳頭暈想嘔頸痛同成日呵屎(正常果隻)?????  好明顯係誇張作大!  我果晚返到黎, 同賓姐講"你知唔知我做咩架? 我做medical related嘅嘢, 咩病有咩symptoms我大概都知, 你呢d symptoms 無大病既, 唔洗咁擔心!"  呢句說話明顯係用黎兇佢, 等佢唔好以為我係白痴, 連你扮野我都唔知?!  賓姐聽完我呢句之後即刻藥到病除, 咩symptoms都無晒, 可能唔係我果句說話勁, 係醫生果10包藥嘅功效!  真係靈丹妙藥!!!!!

事後諗返成件事, 佢真係有唔舒服, 如果唔係點會要求淨食白飯咁虐待自己?  我地結論係阿賓姐錫身到不得了, 少少唔舒服就"蛇gwei"到死, 誇張到無人有, 只係腸胃炎, 又話自己又暈又嘔又手震!  唔怪得佢清潔咁乾淨, 吸塵第一時間吸左自己房先, 佢用果個廁所乾淨到你唔信, 用水一定用熱水, 仲要開到最熱果隻, 番熱d"食送" 永遠唔用microwave, 次次開大鑊水蒸熱, 我地果d就用microwave.

結果我地唔比佢開爐返熱, 只可以用microwave, 同埋開水唔可以開到最熱! 

尋日阿dear賓賓食晒d藥, 問佢有無事, 佢話應該無事啦, 不過想再follow up 醫生多一次.  嘩, 佢真"經貴", 普通腸胃炎都要follow up???  我上星期夠呵足3日啦, 咪又係咁返工!!!!!!

蛇gwei錫身怕死都罪不至死既, 不過阿賓姐仲有下文.................(待續)

我個工人......到底好唔好呢?

自上年8月請左工人之後, 佢工作表現一直都好好, 當我慶幸自己好好彩之際, 就開始發生一連串令我好懷疑佢有幾好既事.  不如大家比意見!  究竟係我地harsh定係佢有問題呢?  (remarks:  呢篇野好長, 要花少少時間睇!)

好處:

1.  清潔好乾淨,

2.  煮野好食,

3.  照顧bb都叫有心機,

4. 自動自覺offer help, 有時星期日我地同Sheryl去街夜晚11點幾先返, 佢本來已經 入左房, 都會走出黎問下我地洗唔洗幫手抱住bb先, 等我地去換衫settle down. 

5.  假期7,8點就返屋企, 仲會自動做家務,

早係請佢之前, 我地叫佢簽左一份regulations, 講明唔可以用我地任何資料去借錢, 同埋唔可以將我地地址電話比任何其他人, 點知:

1. 早兩個月有日有人打黎屋企搵佢, 我地一問之下, 原來佢同UA財務借左錢, 第一期就過期未還, 人地打黎追佢. 比我地知道之後, 佢就喊晒咁話feel ashame,仲話一定會準時還.  當時我地都好煩, 因為佢工作表現其實好好, 如果炒左佢請過一個, 分分鐘仲差過佢.  問題係佢明明無我地屋企電話號碼 (Contract只有地址), 好明顯就係佢用我地個電話打比自己黎睇個來電顯示!  結果我地同佢講如果再收到呢d電話, 我地會take further action. 

2.  我生完之後成日食雞, 好多時都覺得好似少左d脾肉, 直到有一次整完隻豉油雞, 我發現得less than一隻雞脾, 我一怒之下走去摷垃圾桶, 發現有幾塊雞皮, 可以砌返成隻脾出黎, 仲要好似多過一隻添.  佢自己都認食左, say sorry. 其實我生完之後忙到死, 有時要餵奶攪到好夜先食飯, 所以就叫工人自己食先, 諗住信得過佢唔會食好多, 同埋諗住佢食得幾多呀, 點知……原來佢地係唔識自律, 對佢好佢都唔會感恩, 只會take advantage of employer!  自此之後, 我地每餐都一定要分"食送"比佢, 佢從此食雞只有雞胸肉食!

3.  尋日收到一封電話公司寄黎我屋企比佢既信, 我問佢點解, 佢地d bun bun一直都只係用儲值卡, 因為上台要住址證明, 同埋如果佢地講IDD講爆唔比錢d收數佬會追上門 (同借錢唔還後果一樣!)  最主要問題係佢又拎左我地個地址比其他人, 佢話 “我問左阿sir啦”!  CoCo爸就好嬲, 因為果次佢係好似8掛咁問 “你地d電話上台係點比錢架, 手續係點架?”  佢就係恰CoCo爸無介心, 當佢吹水, 點知佢話咁樣叫做問左啦喎!  我即時話 “你無講過要上台果個係你喎!”  我叫佢即時cut左佢, 用返佢不嬲用開既儲值卡, 佢話無問題.  之後我諗深一層, 都係唔對路, 剛剛寄左黎比佢果張 statement , 本身就係一張住址證明, 佢又可以去做其他野!  於是我就沒收左佢張statement.   好啦, 到今日, 佢又同我地講佢原來簽左約, cut個電話plan要罰錢!  哈哈哈, 我真係話之你, 要罰錢你咪自己比囉, 無錢比?  唔緊要, 我幫你比, 下期糧扣返囉!!!!

4.  今朝起身返工, 佢出左去買食送, 我聽到廚房有聲, 原來佢用個電飯煲黎煮飯, 我明明記得尋晚有成兩碗飯剩, 仲叫佢留黎做今日lunch, 開雪櫃見兩碗白飯仲係度, 我打開個電飯煲一睇, 佢煮左成兩三碗飯係度!  我又趕住返工, 唯有出左門口上左車先打比佢, 佢話arm arm買完食送返到屋企, 我問佢點解煮飯, 佢話d米係佢自己買既, 佢個胃唔舒適, 要食白飯先舒服d.  我話你要食成4,5碗飯先夠?  無食早餐咩?  點知唔問由自可, 一問把幾火, 佢話今朝抹完車落左去美心食早餐, 又話自己好易肚餓, 所以上晝lunch之前要再食d飯先得!  Shit!!!!  我不嬲都只係叫你早一日買"食送"果時買埋麵包做第二日早餐, 呢排我都覺奇怪, 唔見佢買麵包返黎, 原來係落左去美心嘆早餐!!!!  第一, 我無話過你可以出去食早餐, 第二, 就算d米係你自己買, 你開住個電飯煲走左出街已經唔好, 一日本來煮兩次就比你用黎煮三四次, 又晒電費又容易整壞!  結果我地同佢講, 既然佢話佢咩其他野都食唔到, 只係食到飯, 咁我地就淨係比白飯佢食, 兩三碗都無問題, 但係唔會比"食送", 佢無出聲, 我地叫佢諗下先, 晚飯前答我地!  (其實如果個胃唔舒服只係可以食飯, 咁點解早餐唔食白麵包要食美心呢???)

發生咁既事, 到底係咪我地一開始就對佢太loose太好太自由呢?  佢自己都話我地對佢好好, 好過晒之前d employers.  佢地呢個民族係咪個個都一樣, 對佢好d係唔得0既, 係咪一定要攪到好似看犯咁看佢先得呢???? 

屋企多左個人...朱古力奶之疑惑

今個星期已經係32週啦, 即係距離馮三小姐出世只係淨返唔夠兩個月, 雖然好好彩, 我個肚唔係好大, 不過好多嘢要做都已經有d吃力, 上兩個星期差唔多日日都大掃除, 將屋企大部份唔等洗嘅嘢掉晒/捐晒去救世軍, 間屋終於都似返"人"住嘅樣!  不過而家就算坐喺度好慢咁執嘢, 都會好快就攰, 仲要係條腰會痛兩日果隻, 所以, 最唔想嘅時刻終於都要來臨......

我地5月份已經開始interview工人姐姐, 我地prefer請喺香港做過嘅, 雖然好多人都話未做過嘅會聽話d, 不過我一直都有家務助理Amy姐姐幫手, 基本上煮嘢食同做家務我都係半桶水, 加上未做過嘅工人係可以咩都唔識到連水喉都唔識開, 試問我又邊會有咁多時間同咁好心機教佢呢???  加上我地屋企有朱古力奶, 請工人一定要唔驚狗, 仲要肯照顧大狗, 好多工人個口就話唔驚, 叫佢落手落腳做又係另一回事.  所以我地5月份搵左幾個香港完約嘅工人黎我地屋企interview, 個過程其實都幾攪笑, 有d工人真係好騎呢!

最初約左兩個interview, 兩個都放飛機, 攪到我地星期日喺屋企呆等!!! 第二次約左3個, 第一個只係黎左香港6個月, 問佢點解6個月就唔做, 佢話個僱主好harsh, 所以佢resign.  咁點harsh法呢?  佢話個女主人唔比佢用洗衣機洗自己d衫, 又唔比屋企鎖匙佢, 又唔比佢用屋企個地址寄嘢返老家...etc.  其實, 呢d一般香港employer都係咁做, 我又唔覺得特別harsh喎!  最精彩就係, 我問佢之前個employer要佢做d咩, 佢話間屋大概2千呎, 喺淺水灣, 屋企得兩夫婦同個17歲嘅仔, 個男主人耐唔中會比幾百蚊佢當獎勵, 有時佢要去男主人個媽媽屋企幫下手, 男主人又會比extra 錢佢, 包食包住每個月仲會比$600 food allowance佢!!!  嘩, 咁好嘅工都唔做? 不如你介紹比我啦!  最尾仲夠膽死問我有無allowance比佢, 我比條"毛"你就有!!!  最令我反感嘅係, 佢問我生左bb之後係唔係仲會keep兩隻狗, 我話一定會, 佢就好自然咁流露一副好厭惡嘅樣, 再附送多一個"廟咀"比朱古力奶!  SHxT!!!!! 

到第二個啦, 佢揍過new born又揍過狗, 所有sense都幾好, 不過就....超假!  一黎到我屋企就好跨張咁攬住CoCo (係CoCo唔係Milky喎), 仲錫佢添!  我見到阿仔個樣好無奈!  又話自己以前同d狗一間房瞓, d狗見唔到佢唔得架喎!  跟住又話自己除左去中環間church之外就邊度都唔識去, 平時咩都唔睇淨係睇bible!  嘩, 嚇得我呀!  跟住我叫佢返去先, 我地要考慮下同埋仲要interview其他人, 佢即時變瞼 (黑口黑面)!  死未??!!

最後, 終於都interview到一個正常d嘅(留意要求已經降低至:正常), 見佢講嘢都幾老實, 我又打埋比佢個舊employer 問過, comment都ok, 所以就confirm左佢啦.  本來8月22號到港, 23號返工, 點知22號打風班機cancel左, 攪到25號先到. 

第一餐晚飯: 咸蛋蒸肉餅, 梅菜蒸鯇魚, 炒菜心, 青紅蘿蔔湯 (食後感: 掂!!!)

暫時都算話頭醒尾, 清潔都ok, 係拖CoCo落街有d "lei hei", 所以短期內會係CoCo爸同工人姐姐 (佢叫Fely) 一齊帶朱古力奶落街去大小, 夜晚就我同CoCo爸帶兩隻嘢落去玩波, 清潔腳仔同身就交比Fely姐姐.  (不過我暫時都係唔捨得比晒佢清潔, 間唔中都要自己抹返, ensure兩隻嘢唔會"封塵"!)

Fely姐姐第一日黎到, CoCo就nervous左成日, 行又唔係坐又唔係瞓又唔係, 又唔聽Fely姐姐話, 成日追住人地pat pat 黎聞!  結果第一日夜晚CoCo攰到屎, 玩完波上黎郁都唔郁得!  而Milky呢? 佢都有好奇不過無咁大反應,  只係工人返左入房瞓之後, 佢瞓喺人地門口唔知等咩!

  

之前去狄狄尼酒店"老lup"人地個牌終於大派用場!

第2日日頭工人喺廳做嘢, 我帶左朱古力奶入房, CoCo好安樂咁瞓, 不過瞓瞓下就係都要"chi"埋我個身度瞓, 逼到實一實, 洗唔洗咁無安全感呀????

今日放榜啦-真係等到頸都長!!!!

真係當年中五放榜都無咁緊張, 本來05年考嘅LLB final year因為05年頭要結婚而無考到, 結完婚又有左朱古力奶, 更加"的"唔起心肝去考, 一拖再拖, 04年上堂d嘢已經比返晒阿sir, 06年尾駭然發現已經差唔多3年啦, 無理由final year 先放棄, 咁頭果兩年d錢咪益晒london U??????

  一心諗住死就死啦, 唔再上一次04 年已經上過嘅堂, 淨係報3,4月嘅雞精班, 6月博一博啦!

考完之後, 都心中有數, 淨係上雞精班, 6月考試4月先開始讀, 又淨係讀雞精notes, 咩書都無睇過, 合格都偷笑囉!

  因為上一次考已經係04年嘅事, 之前明明每年8月21,22號左右就收到成績單, 今年到25/6號都仲係咩都無!  見其他forum已經有人鼓譟, 我呢d唔諗住再讀pcll就話等得姐, 人地報左pcll, 有conditional offer果d, 下個星期開學啦大佬!  見d網友日日打去狂揷考試局, 考試局就日日都話"倫敦果邊未寄過黎!"  本來我都唔係太緊張, 點知日日開信箱都空空如也, 一日驚過一日, 好驚唔合格出年又要再考過, 真係好攞命架大佬, 仲要比幾百英磅倫大賺, 真係諗起都"錶"冷汗!  再諗起我溫書果個月嘅非人生活, 朱古力奶成個月無街去, 喺屋企發毛, 就越諗越驚!!

好啦, 8月30號, 終於都收到成績單啦!  我心急到一路搭lift一路開個信封, 隻手仲震緊(真架, 無誇張架!!!),

一開..............................

我第一個反應梗係睇分啦, 睇完之後, 我即刻睇嘅係...我個名!  因為我第一個感覺係...張嘢唔係我嘅!!!!!

個名又真係我喎!  好囉, 一天都光晒囉, 竟然兩科嘅分係2-2, 一科係2-1!!!  2-1! 我之前果兩年從來未攞過架!  雖然拉勻只係得2-2, 但係比我預算嘅好好多啦!  好彩唔諗住報pcll, 因為2-2佢地實唔收!!!!!

其實以我呢d咁懶嘅人, 都可以合格, 真係全靠嶺南同poly(即係Malaysia 嘅kemaya and ATC派人過黎教)嘅preparation course, 我有d朋友都想讀LLB, 成日問我自修得唔得, 人地我就唔知, 我就一定唔得!  上堂同自修真係差好遠, 所以想讀嘅朋友, 一定要報preparation course!!!!! (好似賣廣告!!)

奇花!

呢盆, 一睇就知係蘭花啦, 又點解變左做奇花呢?  話說呢盆花係今年過年行年宵買嘅, 蘭花"長命"就係人都知, 但係一心諗住最多咪兩個月左右, 點知......最後一支竟然生存到而家!  我已經好耐無淋水, 係好間唔中記得先淋, 雖然蘭花只係要好少水, 但係, 都不至於一個月淋一次都仲挨到半年掛!!!!!!

所以唔影低佢都唔得, 仲唔係奇花?

Rest in peace!

尋日發生左一件令我個心好唔舒服0既事, 朱古力奶個"唉也"舅父仔-追風快將, 去左彩虹橋!

尋日0係電影度睇住佢開頭好叻仔跑第一, 點知跑到後段突然越跑越慢, 最後未到終點就成隻趺低左, 仲拋左個騎師落地!

  我見朱古力奶舅父仔仲有嘗試"gut"起個頭, 但係都唔成功, 最後成隻訓左0係地下唔郁得!  明明好地地, 又無0野撞到佢, 點解會趺呢? 

其實朱古力奶舅父仔對前腳一直有事, 平時已經要做物理治療, 水療, 冰敷, 仲要打止痛針!  有時真係好唔明, 佢咁痛點解仲要佢去跑去比賽?  馬係鍾意跑, 但係佢對腳已經有事, 仲要操到去比賽, 真係......有d唔人道!

更不幸0既係, 佢傷成咁, 獸醫一定會建議人道, 因為佢唯一0既利用價值 -比賽贏錢, 都無埋, 仲有邊個會花錢去醫佢?  而佢0既成班所謂"主人", 無一個會去睇下佢!  賽馬同賽狗, 其實同虐待動物有咩分別?

我諗朱古力奶舅父仔已經去左彩虹橋啦, 希望佢0係果度唔洗再受腳痛之苦, 可以盡情跑!

P.S.

據朱古力奶姨姨消息指, 有關人士尋晚果餐食齋! 唉, 食咩都無用啦, 唔好再”重覆犯錯”仲好啦!

追風快將......REST IN PEACE!

http://www.hkjc.com/chinese/racing/ove_horse.asp?HorseNo=E150

 

臨急抱佛腳

話咁快5月又過左一半, 呢次屎得啦, 得返兩個幾禮拜, 就算唔食唔訓唔呵, 都無可能溫得晒d書, 唔好話3科, 1科都溫唔晒啦!  最衰都係自己, 成年都無溫過d書, 係呢兩個月先摷返d書出黎睇!  話說我個LLB 0既final year考試, 已經一拖再拖, 本來05年考, postpone左去06年, 而家再postpone到今年, 如果無記錯, 完成全個degree 0既deadline好似係5年, 即係今年係last chance!  屎就屎在有d內容我連睇都未睇得明, 仲話要記, 呢次真係屎比你睇!!!!!!

呢幾個禮拜日都要閉關, CoCo爸咁懶, 如果我唔出街, 朱古力奶都唔洗指意有街出!  兩隻0野見阿媽終日暱0係間房入面, 仲自言自語, 一定以為我short左!  牛奶妹仲悶得滯, 直頭0係我房門口大覺索!

正所謂洗濕左個頭, 家陣唯有求神拜佛, 每科讀到三分二都阿彌吉帝!

錯誤的選擇

原來世界上有能力給你帶來最恐怖的事的人, 是你最親的人!   實在無法想像, 身邊最近的人, 可能從來都不是你想像中那樣!  給自己最信任的人出賣, 才是最恐怖的事!  恐怖不在於這個人做了什麼, 而是自己竟然錯得這麼徹底, 天真得這麼可憐!   原來人在失望,心淡之後, 就是心死!   天父, 請你告訴我, 眼前的一切都不是真的......可惜, 我自知自己從來都不是一個虔誠的基督徒, 我想天父已很久沒聽我的禱告了!

選擇,  從來都不只一個, 為什麼總是要選錯???