深圳書城尋寶

Sheryl開學第3日, 只係上堂一小時, 未夠10點就放學, 橫掂都請左一日假, 於是跟當日要上深圳做野嘅daddy走一轉書城!

 

第一件事係醫肚, 去左深圳Grand Hyatt食lunch buffet.  酒店好新好靚, buffet仲超多野食! 

食物質素都唔錯.  無咩影食物相, 因為太肚餓掛住食.

食完就搭地鑯去少年宮嘅書城.  今次其實已經有target, 去到即時開始尋寶

 

目標一:  國家地理兒童百科(入門版)    每本約7蚊, 共24本:

香港有set中英對照, 有圖卡同exercises噤, 不過成套要成$18xxx.   呢set英文平裝版, 無圖卡無exercises, 3個級別加埋都不過幾百蚊 (我只係買左入門版因為其他兩set太深).

目標二:  第一次發現

成套書有過百本, 香港代理賣二萬大元!  呢度每本只係約12至20蚊.  由於太多太重, 我只係買左"手電筒系列"其中一set 6本, 其餘淘寶都有得賣, 原來仲平過書城, 不過要比運費, 由於書比較重, 運費都唔平.  所以唔洗一次買晒!

一套7本情緒系列.  美國作者, 每本約9蚊.    "我好害怕"一書被美國拍成卡通片911之後播.  內容好好 (我覺得好過亮亮, 亮亮故事收尾收得好鬼差!!!) 

不過d字太細, 打算自己打英文同中文(繁體)貼上去!

阿囡近期鍾意玩貼紙, 買左兩本印刷精美又厚厚一大本嘅貼紙書, 每本約12蚊

正版Dora dvd $45/3隻

行完童書部已經攰到癲, 竟然有免費locker任用!  讚!

放低d書喺locker之後去左睇大人書, 收獲唔多因為我唔識睇簡體字, 英文書又貴. 

結果都係買左國家地理出版嘅百科書, 每本6蚊:

我諗係比中學生睇, 不過內容我都唔識!

呢本daddy嘅:

不過其實淘寶好多時都平過書城, 雖然要比運費但係加埋都唔差好多.  除非諗住去埋深圳飲飲食食, 如果唔係淨係去書城又要搬d書返黎其實唔多化算!

Pre-nursery第一階段適應期-同室分離

開學頭5日只係返一個鐘, 家長都可以陪上堂.  

 

 

第一日Sheryl好驚陌生環境, 成日都要我抱

 

放左學即時開心晒!

 

 

第二日好d, 無抱過, 但係要痴住我痴到實一實

 

第三日daddy帶返學, daddy出左班房15分鐘都ok無喊

 

初時唔肯自己"咩"書包, 見其他同學仔"咩", 佢終於都肯"咩"

 

第四五日同室分離都尚算ok, 但係同園分離就喊爆!

 

跟住兩個星期開始返兩個鐘, 家長都可以喺度, 不過就要開始試下同園分離.......

 

 

 

 

 

返學生涯開始!

過去大半年, 一直為Sheryl找Nursery的問題煩惱, 因為Sheryl係"細囡" (即同年8月後出世), 好多幼稚園都唔prefer"細b"!  當然, 如果我係全職媽媽,我會考慮乾脆出年比佢直接讀K1, 呢年可以返住playgroup先．不過可惜我要返工，要將照顧Sheryl呢件重任假手於人，而Sheryl過左１5個月之後，照顧佢唔係淨係食，痌，瞓，仲有"教"! 而"教”呢樣嘢如果交比工人姐姐同嫲嫲，後果．．．可以話係不堪設想！　我唔係指知識嘅教導，而係自理能力同脾氣嘅控制．

所以雖然我知道噤細個返學好易病，同埋初時返學要比較長嘅適應期（即係發癲期），我都希望佢可以返兩歲nursery.

 

之前一直為返下晝班而擔心，始終Sheryl開學時都只係得１歲１０個月，午睡對佢黎講真係幾緊要，所以daddy喺申請左轉上晝班之後，一直都keep住同校長交涉，校長話今年人數好多，雖然我地交信交得早，轉上晝班條隊我地排第一，　不過根據往年經驗，開學前最多都係得一個轉到，甚至無人轉到！　一路等到７月尾都無消息，我地都打定輸數，點知８月頭竟然收到信可以轉上晝班，真係喜出望外！！！

知道可以轉上晝班之後, 終於有返d心情準備開學嘅嘢.  衫label, 鞋貼, 防水名貼, all ready!

第一個書包 - 除左知識之外, 媽咪更希望佢可以為你滿載返學嘅喜悅同笑聲!!!!