80後給我的啟發

因為公司好耐都請唔到人, 老細就叫左佢個親戚個仔黎做temp.

老細當初同我講: "雖然佢無medical background, 但係佢係喇沙仔黎架, 起碼寫得talk得."

喺無其他選擇嘅情況下, 唯有頂住先, 一心諗住搵佢打下report, 影印, fax, filing, 應該無咩難度. 

起底後, 原來所謂喇沙仔, 係升唔到F.6, 讀左副學士之後再讀個distance learning嘅business degree.  畢左業成年都搵唔到野做, 但係佢expected salary唔高, 當時都心知不妙......

返工做野都幾勤力, 主動問有無野可以幫手, 不過.......原來佢係一個典形80後"港孩"!

1.  依賴性高, 飯來張口.  叫佢做野, 每一個detail step都要講得好清楚, 如果下一次做同一樣野, 但係果公司名唔同左, 佢都唔識做!

2.  唔識/唔會 problem solve, 叫佢fax野比A公司,  我比左以下呢封A公司比我地嘅信佢, 叫佢自己搵個contact number 啦!

佢fax返去我地自己公司個number (佢真係睇都唔睇, 見fax number就fax!!!)  我叫佢再fax過, 佢fax左人地公司個電話號碼! (人地個number前面大大隻字寫住Tel.),  我叫佢自己試下problem solve, 佢又指住我地公司個fax number, 問我係咪fax呢個number!  呢舖我真係火都黎埋, 你方才第一次咪已經fax左呢個number囉, 係錯架!  我發火佢先認真睇封信去搵人地個fax number出黎!

3.  工作態度差, 不求什解!  叫佢幫我寄封信, 執齊encl.果d文件一齊寄 (如下:)

唔知大家明唔明 "consent duly signed by Mr.XXXX" 點解? 如果唔明, 我諗大家都會查下字典, 中文係解"Mr. XXX正式簽署的授權書"

80後同我講file入面無呢張野, 仲好有手尾咁搵張post-it mark低喺file面:

請問大家, 咩叫 "consent duly"呢?   duly=正式 , 佢以為"consent duly"係一樣野?????  Oh No!  喇沙仔英文唔好已經唔正常, 唔識咪查字典囉, 連字典都費時查, 想點????

4.  自我中心, 自己係呢個世界上最重要嘅!  (因為父母話比佢知佢係最重要, 咩都就晒佢!)  公司講明請假要7日前通知, 不過我見佢係temp, 有時佢請假幾日前通知都算.  雖然佢temp放假係no pay, 但係都唔洗平均每星期放兩日假架, no pay 大晒咩!!!  最好笑係有一次星期日晚打我手提, "我聽日上晝想urgent請半日假, 因為我後日要考車, 聽日個師傅臨時有時間可以幫我補鐘, 所以一定要放假!"

嘩, 個理由 urgent到呢!!!  urgent到咁, 真係唔放唔得啦, 唔係你考車唔合格我點擔當得起????  最精彩係佢genuinely覺得呢件事好urgent!   總之自己嘅私事永遠最重要, 工, 可以唔返, 好閒姐!

寫呢篇blog, 唔係要唱衰佢, 而係有感而發! 

而家開始要為Sheryl搵學校, 名校係唔係品質保證?  呢位80後令我知道唔係!  入到名校, 但係父母唔識教, 過份保護, 咩都唔洗自己解決, 天跌落黎都有父母撐住. 

搵唔到野做?  唔緊要, 搵親戚請你! 

做得唔開心?  唔好做啦, 父母又唔係養你唔起!

樣樣野父母都安排好晒, 諗都唔洗諗, 有problem都唔識自己solve!

我諗當年個囝入到喇沙, 佢父母一定好開心好自豪.  但係結果係個囝連謀生嘅條件都無!

原來人生真係長跑, 贏在起跑線無意義, 要跑得遠先係勝利! 

讀名校重要定父母家教重要?  呢位80後令我一清二楚了!  雖然自己都唔一定可以做得好好 (我都好緊張Sheryl), 但係要時刻提醒自己, 唔好"愛佢變成害佢"!!!!

 

 

 

8號風球下的變態reception

我一向都幾鍾意自己份工, 又free又唔洗OT, 但係有d人, 我忍左佢4年, 真係...唔鬧唔得!!!!!! 今次唔係老細, 只係一個small potato ------  RECEPTION!

我地公司無HR dept, 老細個秘書就係personnel, 佢下面就係reception.  大家一定會諗，　reception, 做得出ｄ咩呢？　我地返９點，　有１０分鐘allowance, 即係9:10am 之後先算遲到，　我地係”簽到”制度，　一到９：１０我地呀reception就會間條線，　所有０係條線之下０既簽名就係遲到!  每日到左９：０９分，　我地Ms. Reception就會目不轉睛咁”啤”住個跳字鐘，　一轉9:10分即刻間線!  有一次有個同事9:09分開門入黎，　reception睇住佢開門跑埋黎，　都照間條線，　我同事話都未夠9:10分，　呀reception就話，　你開門果下，剛剛跳左9:10啦!   正所謂一場同事, 由開門到行到埋reception, 只係３，４步，　洗唔洗咁呀？　仲有，遲唔遲到係跟佢個鐘喎，　有時人人個錶都可能差一分半分鐘架啦！　除左變態，　我諗唔到第二個形容詞!

好啦，　遲到始終係我地唔arm, 　算！　Ms. Reception除左間線之外，　仲會mark住大家幾多點幾多分出街做０野，　又或者出完街返黎，　有一次，　我下晝出去見完case之後，　4:10pm左右返到公司，　入黎果陣reception唔o係位，　我簽完個名，　就照常返埋位啦!  過左１０分鐘，　reception打黎，　問我幾時返，　我咪話大約１０分鐘之前啦，　佢再問 "即係幾多分呀？"　　下？　大佬，　我鬼記得咩，　咪大約１０分鐘囉!  佢又話 "無理由架喎，　我都見唔到你入黎!"  我話 "你都唔o係位，　就梗係見唔到啦!"    佢再話 "唔係喎，　１０分鐘前我都無行開過! "  頂．．．．．．咁你想點呀？　我好明顯已經坐０係個位度啦，　１０分鐘前同１０分鐘後，　有咁大問題咩？　　我同佢講 "幾多分我真係唔記得啦，　大約１０分鐘囉！"　　跟住佢仲要好似好為難咁話　"咁．．．無辦法啦！”　　

最新鮮果單，　發生o係尋日，　尋日下晝兩點，　天文台話就快掛８號風球，　全公司起哄，　因為唔知走唔走得　（事關老細唔o係度，　personnel又放左假)!  我明明記得，　係可以分批走既，　我就問reception啦，　佢好肯定咁話，　不嬲都係掛左８號先走得架喎！　　我無話要 "陷”公司走人，　我有個staff 係大肚婆，　出面又勁大雨，　我想比佢走先姐!   我見呀Ms. Reception咁堅決，　我就上網搵勞工處個guideline, 再print埋出黎，　人地寫明如果就黎掛８號，　懷孕及行動不便，　又或者住偏遠地區o既，　都可以走先!  咁我就拎埋張print左出黎既guideline, 過去同reception講，　我比我個大肚staff而家走，　跟住佢睇完張guideline, 就話　"係喎，　講明大肚呢一類可以走先喎!"    大佬呀，　就算無寫明邊類，　只係話 "分批" 走，　咁大肚婆係　"第一批”都好合理同好明顯姐，　仲要諗???????

結果，　尋日我地　”陷”公司都要等到掛左８號先走得 (除左我個大肚staff),　包括果ｄ住係　”偏遠地區”　既同事！　而我，　平時搭半個鐘巴士就返到屋企，　尋日用左兩個鐘！

老細, 你係咪有病呀?

事發喺7月中某一日0既lunch, 當日有3個party:

1.  某大中資Insurer 0既 Finance Control 男GM  同佢女下屬 (直接係我地0既客, 個女下屬好nice,一直都有refer cases比我地)

2.  我老細個friend: 某出名律師 (過氣立法會議員同中國政協委員), 同佢律師樓0既幾名律師, 有男有女

3   我老細, 我, 同埋另外兩位女同事, 其中一個大緊肚

呢餐business lunch, 純粹因為某出名律師想識某大中資insurer, 想搵生意, 我老細就做中間人, 順便叫埋我地同個客(insurer) social下.

一去到, 見到幾支紅酒白酒, 再加一支茅台, 大家都諗住飲少少好正常, 點知某律師就話支茅台好貴, 叫大家試少少咁話, 好啦, 試少少無問題, 某律師同某中資insurer老細越飲越high, 開始”隊”其他人飲!  某大中資insurer即時叫大家唔好叫佢女下屬飲, 話佢唔飲得架, 某律師又叫大家唔好叫佢d女律師飲, 又話佢地一滴都唔飲得!  我地3個女仔就等緊我地老細幫我地出聲啦, 點知, 佢唔出聲, 咁好自然, 人地就梗係叫我地3個飲架啦 (我同事大肚架, 老細都唔出聲!), 加上有大食大, 3個之中我最大, 又好自然咁叫我飲, 我已經不斷話我唔飲得架, 我老細都唔出聲, 對方仲出絕紹, 話如果我唔飲, 就即係唔比面!  呢個時候, 我大大話話已經飲左4至5杯茅台, 我老細都仍然唔出聲!  人地d老細一早已經出聲"保"自己d staff, 試問老細唔出聲, 你又點敢唔飲呢?  結果, 餐lunch由一點食到四點半, 人地d伙計要落場, 請我地走, 某律師仲要鬧個伙計好叫佢走!  而我, 一向唔飲酒, 就end up飲左6,7杯茅台! 係茅台, 唔係紅酒喎!  可能真係好似某律師咁講, 純0既茅台唔會上腦, 我竟然一d都唔wing, 反而係返到屋企之後, 個頭勁痛!

呢件事好明顯, 唔怪得外人, 問題係喺我老細度!  我地3個話晒都係專業人士, 做 "姑娘”唔係做”三陪”呀!  雖然老細一向好少要我地去應酬, 我地都相信今次事出突然, 都唔係佢有心0既. 但係喺d咁0既時候, 有咩理由唔出聲 "保”d 下屬架???????

尋日, 某律師又打比我, 話約左我老細食飯, “邀請”埋我去, 我就毫不客氣咁同佢講,我個胃有事,唔去得! 跟住就入去同老細反枱, 我同老細講, 我一定唔會去, 我覺得某律師好唔尊重我, 當我係 "三陪”, 我同佢講如果佢認為我有問題, 可以炒左我!  我再問佢, 點解某律師同某中資insurer0既下屬可以唔洗飲, 而我要飲?  我同佢講 "我都有阿媽生架! 點解某律師想巴結某insurer, 唔係某律師d staff飲, 而係我飲呢? 關我义事?”  我老細聽到我叫佢炒我, 即刻嚇到呆左一呆, 跟住叫我唔好咁激動, 唔鍾意去咪唔好去囉, 又話佢一定唔會比人地佔自己下屬便宜, 又叫我唔好放0係個心度, 又話某律師唔係有心唔尊重我架, 叫我唔好怪佢!  我心諗, 人地係點我唔知, 我淨係知自己個老細都唔 "保” 自己!  跟住老細好似知知地我怪佢, 就笑笑口咁話, “我唔知你果日唔想飲呀, 我以為係你自己想飲添! 如果我知你唔想飲, 我一定唔比你飲啦!”  我一向係斯文人, 唔講粗口, 今次真係嬲到0係個心入面爆粗(下刪十幾字粗口)!  你唔知?  唔係下化?  全枱都見到兩個男人”隊”我一個女仔啦, 有眼嘅都見到我唔想飲啦, 老細你盲Q左呀?  老細仲要再做戲 “上次原來你唔開心呀, 你應該早d講比我知, 唔好放0係個心度呀!”  我真係同佢再講都side氣, 總之我同佢講, 我唔理人地有心定無意, 我自己就覺得有hard feeling架啦, 去就一定唔會去!    咁老細就話”唔開心咪唔好去囉, 我幫你推左佢啦, 我梗係唔會比你受委屈0既!”  嘩, 對我咁好呀?  頂.....你當日又唔講? 又唔做?