點樣揀狗糧呢?

最近同朱古力奶姑婆傾開, 原來住0係花旗國0既Cookie (Cookie係邊個? 可以睇呢度Cookie), 一直都係食緊Hill's, 於是我就提議下同佢轉天然狗糧啦!  朱古力奶姑婆咁錫Cookie大少, 第一時間就轉左Canidae啦, Cookie仲好鍾意食添! 

  朱古力奶就係食緊Canidae, 睇左好多資料, 加上朱古力奶而家食左差唔多半年, 總結暫時都唔會轉糧住, Canidae All Life Stage應該係暫時黎講最好 (最夾朱古力奶)0既狗糧.  其實如果身在花旗國, 應該仲有好多其他choice !  因為我一直都有訂 Whole Dog Journal, 而佢地每年年頭都會選最佳狗糧, 今年就0係2月0既issue出左, 大家可以click入去下面條link睇下:
Whole Dog Journal's 2007 top approved dry dog foods

至於佢地選出最佳狗糧0既criteria係點, 大家可以click呢條link睇睇:Whole Dog Journal's Dry dog food selection criteria

呢度仲有一部份選擇狗糧0既資料, 由於資料實在太多, 大家可以直接去呢度慢慢睇 http://www8.discuss.com.hk/viewthread.php?tid=1112197  而家就post少少關於狗糧中含有 Menadione 和 Ethoxyquin 的壞處:

Menadione 和 Ethoxyquin 可說是天然狗糧中兩大隱藏殺手，它們會一點一滴積聚在狗隻體內，經年歷月，後遺症禍害難以估計。

Menadione維生素K3，沒有深入研究的朋友，就說在狗糧配方中看到有註明 " "a source of vitamin K activity" or "vitamin K supplement"." 也不會怎樣担心吧，誰知道這Menadione Vitamin K3 是一種廉價而有害的人工合成物質，因為 Menadione 正確來說它並不是任何Vitamin。

而 Ethoxyquin 這防腐劑更是殺狗於無形，我們又難以一一追查得到!

以下資料係轉載自作者 highboycheung及http://www.discuss.com.hk/index.php  寵物區

 最後都係果句，天下沒有一種最好的狗糧，衹有一些是比較適合你狗狗的狗糧!

南瓜燕麥餅

前幾日見朱古力奶d花生醬餅餅就黎食晒, 就諗住開爐整定d新0既比佢地啦, 但係又唔想整太複雜, 咁就決定整最普遍0既燕麥潔齒餅.  拎晒d材料出黎之後, 醒起雪櫃有個金南瓜, 咁就決定試下整南瓜燕麥潔齒餅啦!

  其實我今次無跟recipe分量, 自己試下溝, 我諗總之搓到舊粉糰唔痴手就得啦呱!!

結果溝下溝下就變成呢個分量啦:

材料:

全麥麵粉   250克
燕麥片       250克                                                                                                                                                        金南瓜       半個                                                                                                                                        水               100ml (大約)

做法:
1. 焗爐預熱180度
2. 麵粉加入燕麥片拌勻
3. 將南瓜蓉同水慢慢加入 (2) 搓至粉糰唔痴手 (我係慢慢加水, 加到乾濕度適中 就停, 結果係用左大約100ml)
4. 用骨骨餅模造型之後入爐焗35分鐘                                                                                                                   5. 餅餅放涼後就可以入盒

我初時驚加左南瓜d餅餅會唔夠硬, 好彩整出黎都好鬼硬, 仲有d橙黃色0既南瓜feel添, 都算叫做成功啦!

CoCo一年一次的約會

正所謂"年年驗身, 令你放心", 話咁快又到一年一次0既約會啦!   CoCo就當然好唔想去啦, 但係無計啦, 最多去完之後同佢去游水補返數!  話說CoCo自細睇開黎昌生醫生, 絕育手術都係佢經手, 但係後來覺得佢唔係幾好, 因為CoCo自從一歲左右開始, 對耳仔都keep住有黑色0既耳屎, 仲要成日抓添, 咁一開始我地就同佢睇黎醫生啦, 醫生就話佢有耳蚤, 二話不說咁叫我地停用frontline三個月, 轉用一隻可以殺埋耳蚤0既滴頸藥水, 同埋一支平時街都有得賣0既洗耳水,  點知用左之後都仲係有黑色耳屎, 好似仲嚴重左添!  之後就同佢轉左睇Milky睇果個醫生, 即係有名0既何大成啦!  何大成話佢唔係耳蚤, 係酵母菌, 何醫生仲好鬼細心咁同佢洗一次耳仔, 我諗何醫生出名就出名在佢真係好細心(即係好慢), 同CoCo洗晒兩隻耳仔仲要按摩好耐, 攪到我同CoCo爸都覺得"洗唔洗按咁耐呀!"  之後返去滴左d藥水一個星期左右就好返啦!  不過過左一排又返發, 所以今次去打針就順便睇埋啦!

話說要睇何醫生真係好似過五關斬六障咁, 首先佢只係接受7日前booking, 即係如果要今個星期四睇, 就要上個星期四0既朝早9點正打電話約, 我今次9:10先打得通, 好啦, 打得通之後就同姑娘講想約上晝12:20pm (因為佢0既appintment係fix左一個鐘3個症, 即係00分, 20分同40分), 點知姑娘話"上晝得返11:40am!" 咁即係無得揀啦!  到左appintment果日, 跑馬地塞車, 我地已經遲到啦, 去到見到個clinic無開, 仲要落晒閘添!  打去問, 原來搬左去隔幾條街, 嘩大佬呀, 我make appointment果時又唔講喎, 攪到又要再兜一輪先去到, 結果遲左成大半個鐘!  我地等左成粒鐘先有得睇, 無計啦, 自己遲到!   何醫生同CoCo做左body check,  打左針, 我地就梗係唔好"side", 叫佢check埋個hip同埋耳仔啦!  何醫生好似講書咁解釋左好鬼耐, 佢話個hip無事, 耳仔就又係酵母菌, 佢話好易返發, 特別係CoCo成日游水, 叫我地每次游完水都要同佢滴佢開果隻藥水.

最好笑果part就係CoCo唔知點解勁驚何醫生, 當我地0係出面等緊0既時侯, 佢仲好似平時咁, 勁high勁熱情, 點知一入到consultation room, 佢即時變左另一隻狗, 其實醫生咩都未做, 只係同我地講緊0野, CoCo一反常態, 條尾"dup"晒, 自己瑟縮一角坐定定唔郁!  到醫生同佢檢查, 佢仲攪笑, 係咁用個頭頂度門想開門走 (阿仔, 唔係度度門都係推架, 呢度門係拉架, 你點頂都開唔到架啦!!!!)  何醫生見佢個慘樣, 仲話"lab應該好friendly好熱情喎, 呢隻係一隻膽小0既lab!"  我心諗衰囝扮晒野, 平時就蝦蝦霸霸!!!!  哈哈, CoCo竟然驚醫生驚到咁, 當CoCo爸0係房0既另一面叫佢come, 佢驚到郁都唔敢郁, 慌死行過去途中會出事咁!!!!! 

今次去睇醫生仲有一個好消息, 就係我帶埋Milky尿尿比佢地驗, 醫生話一切正常, 我同醫生講Milky而經停左處方糧三個幾月, 而家食緊Canidae同埋新鮮cranberry, 醫生話"GOOD!"  知道阿囡keep到無事好開心呀, 之前真係好慘, 一停抗生素幾日又呵血尿, 半年內返發左4次, 阿囡真係陰公囉!  希望佢可以keep到啦!!!!!!

睇完醫生已經成兩點啦, 我地拿拿聲同兩隻野去左oasis游水, 順便沖埋涼.  咁朱古力奶就完成左好"充實"0既一日啦!