失驚無神遊山頂

前幾日同milky去跑馬地睇完醫生之後已經差唔多黃昏啦, 有d肚餓, 帶住阿囡又唔知去邊度食飯好, 橫掂0係跑馬地, 就上山頂啦! 

Dogs NOT allowed 0既牌就見得多, 呢部山頂廣場停車場0既lift, 係寫住 "Dogs ALLOWED" 架!  真係好似特首咁話"百年一遇"呀, 咁難得梗係要影低佢!

雖然已經6點, 但係仲未天黑, 於是就同阿囡行下啦!  無左CoCo哥哥0係度, 阿囡勁乖, 一路off leash都會heal住佢老豆,  仲唔會周圍聞地下添!

呢段芬梨道"bang"一聲就行完, 來回都係半個鐘only!   將就下啦阿囡, 你阿媽我而家行一陣就"支力"架啦......

兩父囡@山頂廣場!

行完都未夠七點, 不過我又要坐低休息下, 所以去ZEN坐低飲杯野先啦! 

呢杯龍眼冰都唔錯!

之後就叫野食啦, 呢個柚子沙律都幾好食

最正係個冬陰公湯, spicy同甜酸味好balance, 暫時係我o係香港飲過最好飲0既! 

泰式炒通菜

最後呢個煲仔飯就唔係好得啦, 一個for two 0既份量, 得果"的的"咁多送, 最差係d飯一食落口已經知道唔係原煲煲出黎0既, 因為同白飯無分別!

由於哥哥唔0係度, 阿囡都變左隻"悶狗狗",  仲做左d山頂遊人0既娛興節目, 個個行過都走埋黎撩下佢, 不過好彩有人摸下佢, 佢先無咁悶! 

又去睇醫生...

上星期就係CoCo去打預防針, 今個星期就輪到Milky去幫襯vet!

今次輪到阿囡霸晒個車尾......

到底因咩樹要去睇醫生呢?

呢隻係正常嘅耳仔:

呢隻係另一隻紅晒同有"焦"嘅耳仔:

洗左兩個星期耳仔都無好轉, 唯有去睇vet啦! 好彩有保險cover!  vet話耳道乾淨無infection,  只係外耳有d infection, vet拎左d specimen check過, 有少少酵母菌, 暫時唔洗食藥, 淨係用藥水洗同藥膏搽, 問題應該唔大!  不過又發現左另一個問題, 就係阿囡d大牙有牙石, vet話要勤d同佢擦牙, 如果再多d牙石就要洗牙架啦!  屎啦屎啦, 洗牙要麻醉架, 諗下都心痛!  於是睇完vet返去就即刻同佢擦牙啦, 點知好細力擦左幾下, 有牙石果幾隻牙就流牙血啦!  nonononono!  唔想阿囡麻醉呀, 點算好呀囡????

阿囡睇vet好乖, 由頭到尾都坐喺同一個位, 就算vet行開再返黎佢都無郁過!

CoCo最驚嘅約會

CoCo:  好開心呀, 今日出街無帶妹妹喎, 成個車尾比我霸晒, 唔知去邊度"反"呢?

左望望......

右望望......到底去邊樹呢?????

CoCo:  媽, 我地黎呢樹做咩呢?  咦, 果邊有狗狗喎, 唔該放我過去打個招呼呀!

喺出面等緊嘅時候, CoCo仲好得戚撩其他狗, 一入到consultation room 就......驚到搵路走, 睇佢條尾dup到落地下!!!!

CoCo:  "做...做...做咩呀?  我都無病無痛, 仲咩要睇醫生呀?"

CoCo媽:  "年年驗身, 令你阿媽我放心呀ma!  加上你支"癲"狗針到期, 要再打啦!"

CoCo:  "下?打...打....打....打針?  醫生姐姐, 唔打針得唔得呀????"

醫生話CoCo身體ok, 不過有一隻大牙有少少硼左, 醫生話可能咬到d太硬嘅嘢, 之後要小心monitor住, 如果有發炎就要即刻睇醫生, 如果唔係硼到d nerve露左出黎, 就會好痛, 仲可能要剝牙添!!!!!

阿囝最驚就係睇醫生, 基本上一入consultation room就開始驚, 比醫生攪左一輪, 仲打左兩支預防針之後, 直頭驚到連醫生請佢食果舊treats都唔食, (大家都知CoCo有幾為食, 如果佢唔食, 就真係驚到震囉!), 最後要CoCo爸一番安撫之下先定返驚!

阿囝睇完醫生出黎即刻變返平時個得戚樣!  見阿囝今日驚得咁淒涼, 睇完醫生就帶左佢去寶馬山下午茶同行一陣先返屋企啦!

 

豪brunch

見到Min去左食JWM嘅sunday brunch, 睇到流口水之際, 醒起我上年都食過一次"豪"brunch!  果次去Intercontinental食有名嘅sunday brunch, 雖然想去食好耐, 但係話晒都六舊幾一個人, 仲要係食早餐only (對我地黎講, sunday brunch = 早餐, 因為我地假期會瞓到好晏!), 的起心肝去食都總要有點名目, 於是同CoCo爸揀左舊年嘅"相識10週年"去食啦!

任飲嘅champagne, 我見隔離枱狂refill, 好嘢, 一早就隊咁多酒, 佩服佩服! 我諗佢地淨係飲champagne都回本! 

豪brunch又點少得大量seafood呢!

風乾火腿都係指定動作!

重頭戲就係不斷有人龍排隊攞嘅鵝肝多士!

仲有其他一般buffet都有得食嘅食物!

其實仲有其他"名貴"食物, 好似Caviar之類, 但係無影相, 事關我地果朝唔知醒起身, 又要放左狗先出門口, 去到人地已經開始左個幾鐘, 所以一味掛住食, 唔得閒影相!  不過就算d嘢食"名貴", 但係我地arm arm起身, 根本無胃口食咁多, 結果都係回唔到本!!!

荔枝糯米滋

尋晚去完養和聽產前講座, 0係跑馬地食埋飯, 其實都已經好飽, CoCo爸仲話要去蓮園食甜品, 咁我就唯有睇佢食啦!   點知睇下睇下, 見到有個女人黎買外賣, 話要"荔枝糯米滋"喎, 因為我都幾鍾意食荔枝, 見佢買我又心思思想食, 結果就買左外賣做宵夜!

外面係橙味糯米皮, 一盒4大粒!

入面係原粒去核荔枝, 好味!!!!

對於鍾意食荔枝0既我黎講, 呢粒0野都幾好食, 最緊要係佢一d都唔甜!