Aidan弟弟出世啦 @ 感恩節

約好左11月25號開刀, 到時已經係38週5日.  今次主診係林勇行醫生, 之前一直同林醫生講想38週就開刀, 但係佢唔肯, 話遲幾日穩陣d, 結果要去到38週5先有位 (又係多得d強國人book晒OT房!), 個心一路都好驚會早, 加上我上次無試過作動, 心情更加緊張.

 

林醫生好主張自然分娩, 佢話雖然我上次開刀, 不過今次都可以試自己生, 一樣可以用無痛分娩, 唯一係唔可以催生, 因為好大機會令子宮舊傷口爆.  我每次返去產檢佢都叫我自己生.  我都知自己生好, 生得出就好囉, 眼見身邊真係有朋友第一次開刀第二次自己生結果真係爆左子宮!  好鬼驚, 到時大細都有危險, 博唔過.....

 

11月23號, 已經放緊產假, 由於仲有野未買, 就出左去太古城, 好趕噤買野行到好攰, 夜晚join埋老公食dinner.  點知食dinner前6點左右開始有d肚痛, 諗住係因為太攰而多左假宮縮, 坐低食dinner又好d

 

食完飯返到屋企11點左右開始宮縮密左, 不過力度唔大, 照瞓

 

半夜宮縮變成15分鐘一次, 成晚都瞓下醒下....

 

11月24號, 朝早8黠幾老公送左Sheryl返學, 打電話比醫生問下係唔係作動, 醫生話就算係都係好初期, 如果擔心就照入左養和先. 

 

到左10點左右, 宮縮又變得唔太規律, 又唔太想入院住, 當十五十六之際, 去廁所發現見紅.....無計一定要入院了, 即刻沖涼執野

 

途中又再宮縮, 變成10分鐘一次加上力度大左d, 開始覺得好痛下, 去到養和仲要坐輪椅上產科

 

入院登記時痛到連form都填唔到.....跟住姑娘同我檢查, 發現未開度數, 不過產程已經開始, 即係真係作緊動.   我仲同姑娘講笑, 話唔知等唔等到聽日, 因為今日當緊急開刀要比$5000附加費, 姑娘話"你唔洗諗啦, 今晚你都過唔到呀!"

 

大房full左, 安排左半私家房先, 有大房先轉返比我.  跟住駁機check住宮縮同bb心跳.  當時大約12點幾, 姑娘話林醫生已經call左ma醉科醫生同book左OT房, 兩點可以開刀.   O no,  仲要痛多個幾鐘!!!

 

一點左右姑娘推床過黎叫我準備, 於是去埋廁所先, 點知發現見紅得好勁, 即刻衝返上床唔郁!

 

由於有上胎經驗, 今次好清楚個開刀流程, 要推到去OT房出面等, 上次等成幾個字, 淨係著住件手術袍好鬼凍.   今次因為係緊急, 落到去原來林醫生已經到左, 最攪笑係佢果時都仲同我講"其實你可以自己生架喎!"    真係都唔知好嬲定好笑!

 

今次個ma醉師邱醫生好好, 打drip同打半身都唔痛, 雖然已經係第二次, 但係其實都仲好驚, 佢見我驚就同我傾下計, 又安慰下我問下我有無唔舒服, 好pro好nice, 個心真係定d. 

 

弟弟一出黎就大喊, 大隻過Sheryl家姐好多, 有6磅11安士. 

 

第一張合照:


弟弟個額頭瘀左, 因為我同林醫生講個傷口盡量開細d, 所以個頭仔出黎果時好逼, 壓到瘀左, 不過醫生話無問題, 一個星期左右就散.

上次25分鐘攪掂, 今次要成差唔多一個鐘, 林醫生話第二次多疤痕, 所以手術要耐d.

好好彩, 今次同上次一樣無咩副作用, 順利返上房休息.

弟弟好好中氣, 喊到拆天.......

夜晚我要吊drip, 只可以睇住老公食好味煲仔飯, 無我份......