24週-早左0既4D

不經不覺, 已經24weeks啦!  其實自從16weeks之後, 已經無咩唔舒服, 食得訓得, 放狗抹狗都無問題.  加上過埋20weeks果時0既結構檢查, 可以話係好好彩地無驚無險.  而家接近2nd trimester 尾, 又開始有另一種唔舒服啦!  近呢幾個星期阿b郁得好勁, 佢阿媽我肚餓佢又踢, 食飽又踢, 訓覺又踢, 訓醒又踢, 真係好似無時停咁!  雖然我知道咁係正常0既, 不過硬係覺得女仔斯文d好喎, 第日出左世會唔會好鬼活躍架, 唔好嚇我呀!!!!  不過比佢踢幾野都無特別唔舒服, 最慘係我右邊恥骨痛, 行路反而無訓覺轉身咁痛喎(奇怪!), 而家半夜多數要起身去一次廁所, 加上轉身有時又會恥骨痛痛睡, 所以朝早多數都起唔到身......!

星期一去做第n次0既產檢, 醫生check左阿b仲係中碼b, 大約58 percentile左右. 太好啦, 我唔要大碼b呀, 雖然大部份阿媽都好恨大碼b, 又會係咁食黎谷大bb, 但係我覺得正常就ok, bb太大反而可能有其他complications,  加上bb無咁大, 我個肚就無咁大, 即係肚紋都少d啦, hehehe, 都係為自己...! 

24週0既腳仔同pat pat:

阿b個樣呀, 不過唔係好清:

嘩!  小姐, 邊位呀?  醫生突然影左張4D, 通常4D都係28週之後先影架ma, 而家影唔係好清楚喎, 阿b個樣仲係怪怪地咁......

朱古力奶之無晒脂肪療程

朱古力奶早排去睇vet, 兩個都要減肥, Milky情況最為嚴重 (因為真係好肥), target係要減3kgs.  我最初就減佢地糧, 點知自從我減左糧之後, Milky就成日好似好餓咁, 以前佢從來唔敢入廚房搵野食, 減左糧之後唔單止勇闖廚房, 仲聞垃圾袋呀!!!! (佢從來無試過架).  見到佢咁, 我心都痛埋, 所以決定唔好減咁多糧, 取而代之買包減肥糧, 同正常糧兩溝比佢地食!  而家total份量減大約20%, 其餘就兩溝.

一半正常糧:

 

一半減肥糧:

 

希望佢地兩個快d減肥成功啦!!!

自製砵仔糕

我一直都好鐘意食中式糕點, 好似砵仔糕, 白糖糕...etc.   之前喺網上見到原來砵仔糕好易整, 襯今晚CoCo爸同同事出去食飯, 想整狗餅又發現屋企無燕麥片, 咁就一於試下整砵仔糕啦!

食譜：（約3個飯碗）其實用細個d嘅鍚紙模會好d, 不過屋企無, 所以用飯碗囉!!!

材料：粘米粉40g，澄麵粉35g，片糖120g，清水330ml，罐頭紅豆茸適量(我無落, 因為我唔鐘意食架)

做法：

(1) 將粘米粉、澄麵粉篩勻後，加入130ml清水拌勻成粉漿。

(2) 將清水200ml + 片糖煮溶。

(3) 將粉漿沖入(2)立即關火，並不斷攪拌成稀糊狀即可。

(4) 將粉漿注入已塗油的小碗內，放入紅豆茸(我無落)，大火水滾後蒸12-15分鐘即成。

(5) 取出放涼即可。

註:  要留意器皿size同厚薄唔同, 要adjust下蒸嘅時間, 另外如果想食白色砵仔糕, 就用冰糖代替片糖

剛剛蒸好個樣:

脫左模個樣都ok喎......  如果正常加埋紅豆應該會仲靚!

個質地好好, 好挺身, 食落又唔會硬, 加上甜度都ok, 結論係...呢個食譜掂呀!!!