發表文章
所有留言
12月26號...地震呀!
聖誕假最後一日, 朱古力奶無街去, 因為佢地阿媽又要去年年例牌0既CUC Ball! 下午三點幾就約左朱古力奶姨姨去剪頭髮, 仲可以免費吹"攣"個頭...唔洗錢set埋頭!
去完bobbi brown化妝之後, 就去會展CUC Ball啦! 今年d 0野食算好食, 不過d禮物就真係...cheap 左D, 我地仲成台人都抽唔到獎品tim...!
食野食到八點幾, 突然覺得個地0係度搖, 直頭見到d水同盞水晶燈d水晶0係度搖...我同同事你眼望我眼, 我仲話"地震呀?" 我同事話"唔係掛, 可能樓下新城個show d音響太勁!" 但係真係feel得好清楚, 搖左起碼5秒! 跟住過多十分鐘左右, 又黎過...今次都係好清楚咁feel到!!!! 後來有個同事打返屋企, 佢屋企人先話佢知原來台灣大地震! 我地當時會場有live band, 環境又嘈, 都feel得咁清楚, 真係震得好勁下! 地震真係好恐怖呀!
12月25號
聖誕正日, 訓到下晝先起身, 朱古力奶仲未回氣, 0係屋企瞓到豬頭咁, 我地就去左朱古力奶公公婆婆屋企, 夜晚就去左沙田馬會食聖誕buffet! 雖然好迫, 有d canteen feel, 不過都幾好氣氛!
今個聖誕假期好充實, 日日都full booking......
12月24號
今年24號係星期日, 又多日假! 日頭同左朱古力奶去labclub聖誕party, 朱古力奶又食又拎, 仲有水游, 開心到震! 果日仲車埋Goldie同bbq, bbq都不知幾乖, 坐車好定, 反而阿囝仲係成程去程都擒左起身, 真失禮!!!
夜晚唔想出去同人迫, 決定自己0係屋企煮聖誕大餐, 有泰式荔枝紅咖哩雞翼, 煎豬扒, 菜, Uny買0既印式烤包, 加埋Citysuper 0既新鮮生蠔同Cherry Stone.....好過同人迫呀!!!!
特別狗聞報道......
由於近日香港氣溫驟降, 有關當局有見朱古力奶居住0既地方對正西北(日日食正西北風), 除了立即關閉所有窗戶外, 最高領導人(CoCo爸)宣佈即時開放"臨時避寒梳化", 供朱古力奶避寒之用!
直至凌晨二時, 仍然只得一位登記'狗'士入住"臨時避寒梳化"....
前幾日搵返個狗狗蛋糕recipe, 呢幾日又比較得閒, 所以決定益下朱古力奶, 親自整個"紅莓香蕉蛋糕"佢地歎下! 除左無鹽牛油同狗狗牛奶要去"城市掃把"買之外, 材料都算簡單! 預備個蛋糕漿要20-30分鐘, 再加埋要焗35-40分鐘, 大約1個鐘攪掂, 焗完再要攤凍大約1個鐘, 朱古力奶0係廚房門口 "步"足兩粒鐘, 就係為左呢個香到暈0既蛋糕! 本來個蛋糕係"香蕉蛋糕", 不過我見Milky之前尿道炎獸醫建議比cranberry佢食, 咪變左用cranberry做toppings 0既香蕉蛋糕囉!
Update返recipe上黎先:
(原文: http://goldenretriever.hk/phpbb2/viewtopic.php?t=6287&highlight=%BC%E4%BE%A6%BB%E6 )
<香蕉蛋糕>
材料 : (可製 1 個 16.5 cm 直徑圓形蛋糕)
香蕉 100 克
蛋黃 3 隻
蛋白 4 隻
麵粉 60 克
自發粉 1/2 茶匙
無鹽牛油 50 ml (一定要用無鹽)
狗狗牛奶 50 ml (可改為水)
做法 :
1) 先將香蕉去皮及壓爛
2) 蛋黃打至奶白色
3) 將香蕉蓉加入已打好之蛋黃中攪勻
4) 牛油隔水煮溶與牛奶一同加入香蕉蛋漿中
5) 分多次篩入麵粉及自發粉並攪勻
6) 於另一個兜中下蛋白打至企身 (用電動打蛋器會較省時)
7) 將打起之蛋白分數次加入香蕉蛋漿中並輕輕攪拌
8) 倒入已鋪好烤盤紙的蛋糕盤內, 放入已預熱 170度 之焗爐焗約 35-40 分鐘, 焗好取出放涼
材料: 香蕉, 蛋, 麵粉, 自發粉, 無鹽牛油, 狗狗牛奶
嘩, 出爐啦, 好香呀.....
加埋d餅餅同埋cranberry就攪掂!
CoCo: 阿媽你仲影咩呀,快d啦...... Milky: 再唔食就比阿哥食埋我果份架啦, 快d啦......
比兩隻怪獸食之前, 影返張"遺照" 先!!
12月9號, 星期六, Dr. Milky第一次出job, 去大口環一間老人院探訪! 好多公公婆婆都好鍾意Milky, 有個仲話要抱佢......嘩, 五十幾磅真係唔敢比婆婆抱, 不過婆婆摸下Milky都已經好happy啦! 世界真係細, 其中一個婆婆竟然係Leo打tennis D 波友個媽媽, 見係識0既, Dr. Milky哽係要加多兩錢肉緊去tum下婆婆開心啦!!! Dr. Milky第一次返工就遇到明報黎採訪, 唔知有無影到阿囡呢 ??
因為當日實在好多人, Dr. Milky探訪到一半已經連條Dr. Pet圍巾都不翼而飛......! 探訪完之後, 我同阿囡都得返半條人(狗)命, 不過見到d公公婆婆咁開心, 辛苦d都值得! 有個婆婆仲唔捨得我地走, 眼泛淚光添!
阿囡咁乖一定要獎下佢啦, 探訪完就去左附近0既貝沙灣公園, 果度有好大個草地, 又比狗入, d風景仲好正! 可惜果日好大煙霞, 睇唔到貝沙灣個出名西斜景 (日落景), 下次要帶埋阿囝一齊再去過先得!!!
諗住阿囡第一次出job, 哽要係門口個招牌度影返張相留念啦......點知....Leo一時錯手洗左果幾張, 得返兩張睇左都唔知0係邊度影0既相...
棵聖誕樹好靚喎!
尋晚CoCo爸走去煲水, 開左火之後就坐返0係梳化, 阿囝就同佢一齊0係梳化度訓. 我就同阿囡入左房! 到我沖完涼出黎, 就見到CoCo爸同CoCo0係廚房度, 跟住CoCo爸就好驚咁同我講"好彩我地屋企有狗!" 原來......個煲入面根本無水, CoCo爸係煲緊個煲!!!
原來CoCo訓訓下突然0係梳化度彈起身, 衝左去廚房, CoCo爸見佢咁奇怪, 就跟左去廚房睇, CoCo就望下個煲, 又望下佢老豆, 咁先發現原來個煲蓋d膠已經開始溶!!!!!!
我地即刻攬住阿囝係咁錫, 仲即刻獎左幾條魚魚比佢!
阿囝好彩有你, 如果唔係真係火燭都有份! 原來阿囝係 "狗型火警鐘" !!!
尋晚食完飯番屋企, 一開門......嘩, 一個成年無見過0既情景重現眼前....! 絕跡左江湖成年0既"撕紙"王重出江湖啦!
好彩家陣大少唔會0係屋企去廁所, 如果唔係, 地下除左報紙碎之外, 就係屎屎尿尿啦! CoCo下個月就兩歲, 重要玩d咁0野, 到底幾時先定性呀囝???
犯人"扮"無辜0既眼神........唉, 算啦, 阿媽又點捨得鬧你呀!!!!! 好彩你阿媽我襟住你老豆, 如果唔係你又比人"揪"架啦!!!!!
阿囡真係醒!!!
