今日發生左件好唔開心嘅事, 本來今日最後一日考試, 諗住考完可以返屋企大覺瞓, 因為尋晚只係瞓左3粒鐘! 考完行出考試局, 已經心情低落, 因為考得好差, 都係唔合格多! 跟住坐van仔出黃大仙地鐵, 落左車行行下見到有個阿嬸拖住隻大約6個月大嘅金毛, 仲要好白架(我鐘意白色金毛)! 我就梗係走埋去撩下隻狗啦, 點知……阿嬸用半咸淡廣東話同我講”你鍾意比左你呀!” 吓!!!!!!!!!!!!!!!!!!! 我以為自己聽錯, 阿嬸就再講 “我都諗住唔要架啦, 家下拎去後山放生!” 吓!!!!!!!!!!!!!!!!!!!!!! 我即時係完全唔識比反應! 當時有個OL喺隔離聽到, 就問阿嬸做咩要”放生”, 阿嬸唔問由自可, 一問就一 “輪”咀講, 原來隻狗係佢個女養嘅, 年頭BB果時帶返黎, 最近個女成個月無番屋企, 好似係因為識左個男仔, 阿嬸打過好多次比阿女, 話如果佢再唔返就比左隻狗人, 個女就叫阿嬸自己鍾意點就點, 佢唔會理! 阿嬸就話 “咁大隻狗邊有人要呀, 我地住公屋架! 無人要咪放生囉!” 我同OL姐姐都有同阿嬸講叫佢唔好, 我地幫佢問下有無人要, 阿嬸開始唔耐煩, 仲話”你地要就要啦, 唔要就放生, 唔好咁煩啦!” 眼見阿嬸想走, 我同OL 姐姐就叫住佢叫佢比我地啦, 阿嬸即時好似甩難咁比條狗帶我地! OL姐姐同我一齊去左附近一間pet shop, 睇下可唔可以收留住佢先, 我地再搵人領養, 點知pet shop唔肯收, 因為佢無針紙, 如果有咩事佢地唔負責! 咁點算好? OL姐姐食完lunch要趕返工, 如果我帶返屋企實比CoCo爸將我剷上天花板!!!! 我就諗起果時CoCo個trainer, 我就打比佢, 佢話無問題, 可以放喺佢度! 於是我就帶左狗狗去筲箕灣鄧師傅度寄養住幾日先, 師傅好好人呀, 佢仲記得CoCo , 佢話 “CoCo好叻仔呀, 果時一個禮拜就學識晒d嘢啦!” 師傅仲話唔收錢住, 遲d先算喎!
有無人有意收養佢, 或者可唔可以有人暫養住先? (如果有人可以暫養住先, 會先同佢絕左育先比人領養)
名字: 丁丁(好似係, 因為阿嬸半咸淡咁叫佢做 “癲癲” , 我估應該係叫 “丁丁”! 不過叫佢佢好似唔係好識應!)
性別: 女
年齡: 6至8個月
性格: 仲係bb性格, 見到狗就好貪玩, 開心會撲起身, 喺pet shop 磅過大約16kg重, 同佢坐車佢好定, 由我見到佢開始到去到師傅度見到好多狗好興奮, 都無吠過, 好乖! 我諗佢都好痴人, 可能佢真係知道比人遺棄, 離開左舊主人之後好似有d唔知點算好咁, 試過坐喺度唔肯行! 後來跟左我一陣, 我同佢映相, 好難映, 第一因為係用電話映, 唔清, 第二係因為我叫佢坐低之後, 要向後行幾步先映到, 佢以為我走, 行返埋黎坐喺我腳邊, 仲伸一隻手仔wer我 ! 果下我個心好酸, 直頭想喊出黎! 之後再同CoCo爸一齊去映多次, 下面d相清楚好多!
領養要求:
要出示住址證明
必須願意接受家訪
必須為佢打齊預防針同植入晶片
必須為佢絕育, 確實領養人後會先安排絕育, 再交比新主人
領養唔係先到先得 , 會選擇最合適嘅領養人,(優先考慮我識嘅朋友)
請大家唔好介意可能要問好多問題