馮三小姐的家檔 - 免費篇

上次去完永安大出血之後, 返黎上網睇其他準媽咪講, 先知原來我地買左果架Aprica 719 stroller 同埋 Aprica 餐椅/搖椅兩用high chair第一日減價已經賣晒現貨, 睇黎今年真係好多人生仔喎!!!!   前兩日我同事打比我, 報料話Sogo又大減價, Aprica仲8折添, 咁我就話返比佢知, 永安7折添呀!   結果我就無去到 Sogo, 而係佢去左永安!

呢位同事12月生完, 因為佢知我bb秋天出世, 而家要買長袖衫/厚衫會難d, 所以就比左d佢囝囝0既衫仔比我, 因為bb實在大得太快, 佢有好多衫仔都仲好新淨, 有d仲未著過添!  雖然佢個係囝囝, 但係無所謂啦, bb頭3個月都唔會成日出街, 男仔衫女仔著都無問題!  真係多謝呢位同事0既"捐助"!  話時話, 我同佢輪住放產假, 唔知老細會唔會比我地嚇親, 以後唔請女仔呢?? (事關老細一向性別歧視, 覺得呢行一定要請女仔!)

我最鍾意呢set Mickey Mouse, 有埋帽仔, 手襪仔同腳襪!

原來佢囝囝都有件粉紅色喎!

厚身長袖, 正!

呢4件仲厚, 可以12月著!

加埋之前買果幾件底衫仔, 包被, 同埋睡袋, 頭3個月0既衫仔應該夠啦!  各方好友如有"捐獻", 唔該要3-6個月長袖呀, thanks! 

唔洗錢0既仲有呢一大袋上產前講座送0既sample!!!