Nursery interviw - part 5 坐車坐到嘔

真係好跨張, nursery interview都有咁多part, 變左長篇連續劇咁款, 唔驚唔覺已經去到part 5!!!!

今日去左interview灣仔嶺南幼兒園.  其實我係人地收晒生之後先報, 估唔到仲有得in.  大家都知東山臺交通有幾唔方便, 諗住泊架車係灣仔, 再打的上去, 點知灣仔塞車, 攪左大半個鐘先去到.  點知去到之後條interview嘅人龍竟然排到出學校門口!  又要等!!!!!  排左3個字, 再去indoor playground玩住等!  End up 等左成半個鐘先有得in.  而所謂嘅interview, 同衛理堂差唔多, 佢地唔會考小朋友野, 只係觀察下佢地點玩, 不過老師都會埋黎傾幾句!

其實我地已經唔諗住讀呢間, 因為實在太遠, 果頭又成日塞車, 不過見有得interview,當比阿囡去玩下練習下, 我又可以睇下佢而家嘅表現.  點知阿囡今朝8點就起身 (平時過左9點先起身), 而我地interview 11:30, 心諗死梗, 阿囡實扭眼瞓啦, 點知佢鬼打都無咁精神, 去到仲好開心周圍搵野玩. 

Interview真係簡單到不得了:

1.  老師行埋黎, 同我講"我地上晝班已經full晒, 下晝班仲有少少位, 你考唔考慮?"  我話"我都係prefer上晝班."   老師:"好, 咁我mark低你首選上晝, 次選下晝啦!"

2.   老師同Sheryl講: "hello, 我見你好熱情喎!"  跟住叫Sheryl砌積木, 其實Sheryl一直都砌緊, 不過老師行埋黎, 佢就呆左望住老師, 唔砌!  咁我地就同佢玩, 叫佢"放個圈圈喺個公仔個頭上面啦!"  Sheryl無反應, 跟住我地再用英文叫佢"put this on baby's head", 點知佢將個公仔成個擺上自己個頭度, 笑死我地同老師! 

3.   老師比個玩具Sheryl "比個玩具媽咪啦!"  Sheryl做到, 跟住無情情拎起另一件玩具比老師, 老師好似好滿意咁say thank you!

跟住老師就行埋一邊喺張form上面寫野, 然後去見其他小朋友.  Sheryl無聊就周圍行去其他小朋友度撩人玩(其實係搶人地個玩具!), 玩左10分鐘, 仲主動拎左兩件玩具比老師, 老師都好似幾滿意. 

跟住一直等, 等到成12點幾, 已經過晒Sheryl食飯時間, 原來仲要等人帶我地睇下個校舍同埋做簡介!  當時我地已經好想走, 因為其實唔諗住讀!  結果我地無等到簡介就走左!

走果時已經12:20pm, 落灣仔條路勁塞車, 又無的士, 唯有搭巴士落合和再行上去堅尼地道攞車, 塞車加行路攪左成半個鐘先攞到架車!  結果Sheryl一上車就瞓, 好彩返到屋企摷醒佢食飯都無扭計, 食完又再瞓!  結果攪到今日下晝去唔到 Gymboree上music class!

果頭咁嘅交通情況, 加上路程又遠, 如果坐校車仲要兜到暈先返到屋企, 對於一個兩歲人仔, 真係太辛苦啦, 間學校幾好都無用啦! 

所以決定:  收都唔讀, 留位費都唔比!

(待續................)