小手忙翻天1-6 - 東西圖書 (21個月)

Sheryl屋企大部份書同教材都係英文, 連佢至愛嘅娛興節目Barney都係英文, 所以佢學所有圖形, 顏色, 物件名稱等等全部都係英文.  雖然我地都係同佢講中文, 不過佢日常溝通理解中文無問題, 但係講就70%都係英文, 至於概念理解(如顏色圖形), 中文更加完全唔掂!!!!

所以一直都想搵d中文教材, 留意左好耐, 覺得台灣東西圖書出版嘅教材好好, 不過有好多香港代理都無, 特別係幾年前出嘅教材, 有d甚至喺台灣都絕左版. 

香港d中文教材好多都著重flashcard認字, 無圖無公仔齋記字, 英文flashcard我都已經唔用好耐, 更何況係中文.  香港d教材求其出幾本書又話要過千蚊, 真係好無heart!

鍾意東西圖書就係因為佢有部份係出版比教師用, 加上教材大多好有趣好有系統, 仲要一d都唔貴!

適合2歲嘅教材選擇唔多, 留意左呢套小手忙翻天好耐, 香港絕左版, 我喺台灣網店搵到, 一套6本其實可以分開買, 不過成套買都只不過係HK$250, 加埋兩日就送到我屋企嘅速遞都只係~HK$320!  

東西官方網頁產品介紹: http://www.ewbook.com/product.asp?pd_type=2&temp_id=

每本書都有一隻vcd, 成套共6隻, 想學普通話就睇vcd, 教廣東話就淨係用書:

vcd內容包括左本書中內容, 另外仲有一d教句子嘅動畫.

一開始會唱歌仔, melody都係耳熟能詳, 好似呢隻就係Old MacDonald had a farm嘅melody:

本書有相應歌詞, 主要教動物名稱同叫聲.  呢兩樣嘢Sheryl都識晒英文, 而家可以學下中文/普通話:

第二部份教動物名稱同句形, 本書有相應圖畫.  雖然Sheryl唔識字, 但係可以喺本書度指出相同的動物圖畫, 再聽下全句點講.

書中有相應遊戲, 其實同3-pieces puzzle原理一樣,  Sheryl已經識砌2-pieces puzzle, 包括係一大堆puzzle入面搵返兩塊對應嘅出黎.  不過呢本書玩法有d唔同, 所以暫時Sheryl要媽咪協助先識玩.

第三部份有超可愛動畫, 動物輪流出場, 會介紹動物名稱同叫聲, 重覆句形令小朋友更易理解.  Sheryl睇得好投入, 跟住叫d動物名同叫聲, 不過係講英文........而我都可以同時學下普通話!

第四部份仲有d額外嘅句子同動畫, 作伸延練習

本書有介紹套教材理念

6本書主題由淺入深;

有vcd, cd同書, 動畫超可愛!

網店仲加送一套大圖卡字卡, 都係對應返書中內容:

Sheryl第一次玩已經跟住講動物阿同扮叫聲, 第二日見我拎本書出黎就話要睇'衣呀衣呀噢", 即係要聽歌仔 (竟然第二次就記得)! 

其實vcd內容簡單唔係太有娛樂性, 所以如果要keep住Sheryl的興趣, 每次只可以睇一次就要收埋, 本書都係玩15分鐘左右就要收埋.

好鍾意呢類教材, 從遊戲中學習, 而唔係強記生字, 而且有系統, 利用視覺聽覺觸覺去反覆練習同一個概念, 呢個先係幼兒學習嘅正確方法.  奈何香港d家長好多要重認字, flashcard 仍然大行其道, 呢d噤"簡單'嘅教材滿足唔到佢地, 因為用完都唔會話識左一百幾廿個字, 所以香港真係無咩知音人, 攪到香港代理早前要$50一本清貨! (如果當時我知道, 一定去掃貨!!)  好彩而家喺台灣果邊訂返黎都係一樣價錢!

其實呢套教材有英文版, 叫"1001樂翻天", 一套6本, 內容同中文版對應.  不過已經絕左版.  東西好似將佢改頭換面, 出左一set叫123 sentence blender, 少左一本書, 多左d唔知咩accessories, 香港代理賣緊$550 (即係貴左!).  set嘢我未睇過, 唔知bb展有無, 可以到時睇睇買唔買得過.  

個人覺得中文版好d, 因為除左學中文之外, 仲可以當普通話教材, 連我都學埋一份!!!!