4個半月的衣食住玩

4個半月大嘅Sheryl, 同初初出世果時比真係判若兩b! 

由最初好似個鬧鐘咁定時每4個鐘叫肚餓, 到而家隔成5個鐘都唔多覺肚餓. 

由最初我地可以安安樂樂食晚飯, 到而家成日都要應酬Sheryl, 因為佢成日要人attention, 理少一陣就念念有詞咁鬧人唔理佢. 

由最初好乖咁食成半個鐘人奶, 到而家食5分鐘就唔肯再埋身食, 要用奶樽餵埋後半場先得!

今個月去健康院, 重14磅, 身長約63cm, 大約50 percentile, keep住做中碼b, 著衫已經要著6個月大嘅衫啦!

Sheryl鐘意同人玩多過玩玩具, 一有人同佢傾計就笑到唔見牙又唔見眼!

食, 係最煩嘅項目.  自從戒左夜奶之後, 一直都係1日5餐, 7am同7pm埋身餵, 下晝兩餐同臨瞓果餐用樽餵, 到左差唔多4個月, 開始唔係好肯埋身食, 次次食5分鐘就唔肯再食, 但係我仲好谷, 唯有泵出黎再比佢食, 佢又食晒喎!  呢位三小姐一定係厭食人奶攰過食奶樽, 所以扭計唔肯食!    而且食奶餐餐都要食成45分鐘, 好似唔肚餓咁, 拎個奶咀黎玩, 咁我地就試下1日4餐, 情況有改善, 不過都係要分幾次先食晒, 每次200ml, 臨瞓果餐就240ml.  每日食得果840ml, 真係驚佢唔夠飽, 但係試過下晝比多餐下午茶佢, 佢一啖都唔啜!

而家轉左食4餐之後暫時都算係全人奶, 不過就變左90%係泵, 日日返工好似去旅行咁, 又奶樽又冰袋又奶泵.  結果都係要買多個泵放喺公司, 唔洗日日拎到屎下屎下!

食飽等嘔奶樣..........

食飽之後將佢入袋(睡袋)就開始發老脾, 因為佢而家唔鍾意瞓低, 以為自己識坐, 成日做sit-up想坐起身!

終於settle到瞓啦!

天光駭然發現瞓到咁............

好彩係用睡袋唔係用被, 如果唔係分分鐘比張被焗親!

雖然鍾意同人玩多過玩玩具, 但係都唔可以唔玩玩具架!  而家終於識得用手拎住嘢玩, 最好就係坐喺度玩(又唔知自己其實未識坐!)!