丁丁已經去左新屋企啦!

上星期唔喺香港, 到而家先得閒update丁丁嘅情況.  丁丁(已改名叫"菲菲")weekend已經去左新屋企啦!  新主人一家三口, 仲有隻拉布拉多囡Circle陪菲菲玩, 又成日可以去游水, 菲菲終於都苦盡甘來!  我地呢個weekend可能會去探下佢, 到時再影d相比大家睇下!

今次當然要多謝領養人Circle媽, 佢唔介意菲菲pat pat有撻癬, 又唔介意vet話菲菲要check 下個hip, 因為菲菲而家起緊水, 等佢起完水一個月之後, 就會帶佢去desex同照hip x-ray啦!  Circle媽仲話菲菲好乖, 同Circle相處得好好, 又唔吠, 仲成日笑!

  菲菲就算比前主人遺棄過, 都無損佢樂天嘅性格! 

其實有個人, 更加要多謝, 就係暫養人阿Min

, 佢真係好錫菲菲, 成日帶佢去玩, 最後仲決定可以收養埋菲菲添!  要喺阿Min同Circle一家之間選擇, 真係好困難, 喺衡量過居住環境之後, 最終決定將菲菲交比Circle一家照顧!  菲菲有阿Min不計回報咁照顧佢, 菲菲真係好幸福!

最後要多謝好多好多幫過菲菲搵新主人嘅朋友, 雖然菲菲比前主人遺棄, 令我好心痛, 但係就發現原來都仲有好多好多有心人, 喺有須要嘅時間, 會行出黎幫忙!  如果人人都諗住"實有人幫嘅, 洗咩我幫呀!", 咁呢個世界會變成點, 真係唔敢諗!  幫, 當然要量力而為, 但係原來每個人只係出少少力, 好多人嘅"少少力"加埋, 都可以有"奇蹟"!!!!!!

希望其他被遺棄嘅狗狗, 都可以好似菲菲咁好彩, 有機會遇到"奇蹟", 搵到新嘅家!