Family Outing ~ BBQ

2月3 號,  約左朱古力奶公公婆婆, 姨婆, 舅公等人( 好複雜, 簡單黎講即係我阿媽, 阿姨同舅父等人...

)去元朗錦田鄉村俱樂部bbq.  初時揀呢度係知道佢地有私人有圍欄0既草地比狗狗玩, 點知原來而家維修緊, 佢地只可以用幾set活動圍欄圍少少草地, 個圍欄仲矮過CoCo屋企果個, CoCo如果要跳出黎真係易過借火!  加上個圍欄set到離開個爐好遠, 阿囝呢個超級裙腳仔, 我地離開幾步都吠, 如果放佢0係果個圍欄度, 肯定燒4個鐘野食, 佢就吠足4粒鐘, 所以結果都係綁左朱古力奶0係個爐側邊條柱度!

一去到見到咁大個草地又無人, CoCo爸就放左CoCo玩下飛碟, 點知玩唔夠兩分鐘, 竟然有百幾人行入黎, 仲要一家大細, 原來係小學生家長日!  佢地仲要係一齊燒野食架!  嘩,  真係黑仔, 離遠見到d細路已經覺得煩, 仲要成百人! 我地即刻拖返CoCo 啦, 如果唔係又有d無知0既家長0係度大呼小叫, 一陣又屈阿囝"好惡會咬人"就無謂啦!!!

結果成場bbq就0係嘈雜0既細路聲同音樂聲中度過, 好彩d 野食都ok好食, 環境其實一流架 (如果無咁多人0既話)!  好彩後來d細路埋晒位燒0野食, CoCo爸就同朱古力奶去後面無咩人0既草地度跑下, 可能因為個草地都好大下, 跑左幾個字朱古力奶已經瞓0係地下休息!

總括黎講都幾好玩, 果日又好天, 唔係太凍, 希望下次如果再黎唔好咁多人就好啦 !!!!

仲有段小插曲, 個場有d貓貓四圍行搵野食, CoCo一見到貓就喪追, 但係Milky就......竟然驚貓! 佢同隻貓兩個定左型咁亙望左好耐, Milky死都唔肯行過去, 我地拖佢都唔行, 隻貓突然向側邊行左幾步, Milky就嚇到掉頭發足狂奔!  唉......阿囡你點解咁細膽架???

未齊人喎...都影返張相先啦!!!

朱古力奶公公係都要拖CoCo去草地散步......好彩阿囝無搶繩!!!

   唔知公公有無諗起Dolly呢?

阿囝跟住佢老豆果陣就最乖架啦!

 

果日天氣好好, 可以影到好靚0既晚霞!

 

咁大個場都可以差唔多爆!

 

朱古力奶婆婆好勁, 燒野食變左打邊邊......

返到屋企, 兩隻野"支力"到死!