有驚無險嘅"日托" + 緝拿真兇

首先, 大家一定有最少三個問題: 1. 點解要日托  2.  日托又點會"有驚無險"呢?  3.  又關緝拿真兇咩事?

問題1: 點解要日托?

自從夏天開始, 我地放寬朱古力奶日間嘅活動範圍, 因為milky個圍欄嘅位置下晝會西斜, milky會變hotdog, 所以我地改左少少個setting, 就係用圍欄圍住d"重要通道" (而唔係圍住朱古力奶), "重要通道"包括入房嘅走廊, 廚房, 窗台...etc.  即係其實成個廳比晒朱古力奶!  一直都相安無事, 因為佢地而家大個d, 定d, 無咬嘢好耐!  而佢兩個最乖嘅, 就係自細都唔咬拖鞋, 就算個波碌左上去隻拖鞋度, 佢地都唔敢拎!  直到上星期四, 我返到屋企一開門就見到兩對被"分屍"嘅拖鞋!   同一時間又聽到樓下開始裝修, 又鑽又"dup", 嘈到人都癲!  到CoCo爸返到黎, 朱古力奶梗係比人"教訓"左一餐, 諗住佢唔敢啦, 點知, 星期五返到黎, 災情比星期四仲嚴重!  拖鞋當然被K.O., 竟然連部份膠圍欄都趺埋落地, d膠仲要被咬到碎晒!!!!!!  我地左諗右諗, 都諗唔明!  最後只係諗到一個原因, 就係樓下裝修, 太嘈, 攪到聽覺比人類敏感好多倍嘅朱古力奶煩躁不安, 所以先有破壞行為!  諗下諗下, 佢地又好慘既, 又熱又嘈主人又唔喺度......所以決定星期一我地返工前, 就車佢地去爺爺度日托啦!

問題2:  日托又點會"有驚無險"呢? 

你地有所不知, 爺爺最鍾意帶朱古力奶落街, 平時我地喺度就無問題姐, 家下得佢地兩老, 點可能拖得住CoCo?  我地已經千叮萬囑唔可以落街, 但係成日都好擔心!  好彩最後佢地都無帶朱古力奶落街(因為我地一帶佢地落街就呵好大篤尿尿!)  至於朱古力奶, 日托完返到屋企, 成個散晒大昏迷, 鬼咩, 喺爺爺屋企食足一日, 仲有隔離屋隻哥基同佢地玩, 爺爺話兩隻野成日都無瞓過!  我諗佢地梗係想日日都"日托"啦!

問題3.  又關緝拿真兇咩事?

事緣我地喺佢地日托當日, 開住部mp3錄音, 發現樓下無咩聲, 於是星期二就唔去日托, 留返喺屋企, set晒video錄佢地, 試圖緝拿咬拖鞋真兇歸案!   呵呵呵呵..........原來真兇係......CoCo!!!!  Video所見, CoCo喺我地出左門口大約15分鐘之後, 就開始犯案!  佢先去拎左一隻拖鞋出黎咬左一陣, milky就好好奇咁望住佢, 跟住唔夠一分鐘, CoCo就放棄第一隻, 拎左第二隻出黎咬!  Milky見阿哥放棄第一隻, 就接力咬第一隻!  就係咁, 兩隻野一狗一隻拖鞋, 就K.O.左我對拖鞋啦!  今日拖鞋算係輕傷架啦, 上星期果兩對係分左屍架!!!!

 

犯人被鬧時仲要顯示其貪心本性!!!!!!

好彩其他鞋佢地一d都唔"hou"!

又有金毛囡搵人領養

上次幫丁丁(而家叫嬌嬌)rehome, 好多熱心網友幫忙, 其中一位網友知道上次我rehome果時screen過一d合適領養人, 所以今次就打比我, 睇下我仲有無識d 好0既領養人, 不過事隔都成個幾月, 有合適0既領養人都已經領養左其他狗啦, 所以可以做0既, 就係幫手post呢隻金毛囡0既資料出黎, 睇下有無好人家啦!  上次有興趣領養丁丁嘅, 如果有興趣領養呢隻金毛囡, 就通知我啦!

講少少金毛囡嘅background 先, 佢係網友鄰居隻狗, 因為無時間照顧, 所以托網友幫手搵新主人. 

狗狗大約一歲, 未絕育, 有出世紙, 第一個主人是日本人, 剛剛轉了一個新主人約個多月, 因為該主人沒時間, 所以希望幫他找個更適合的主人.

她很活潑, 不怕人, 樣子漂亮, 細身, 不愛吠.

 

至於領養條件, 同上次一樣:

領養要求:
要出示住址證明
必須願意接受家訪
必須為佢打齊預防針同植入晶片
必須為佢絕育

領養唔係先到先得 ，　會選擇最合適嘅領養人，（優先考慮我識嘅朋友)
請大家唔好介意可能要問好多問題

 

 

波仔+朱古力奶 @ Pet Oasis

其實已經係3個星期前0既事, 不過而家先記得!  3星期前0既星期六, 我地約埋我契仔 - 波仔 - 去Pet Oasis游水, 波仔已經6個月大啦, 從來都未游過水, 今次係第一次!  一去到Pet Oasis, 朱古力奶就入左自動波, 去左草地玩喪跑, 唔理波仔, 不過波仔都唔會介意, 因為佢勁痴身, 阿爸阿媽去邊都要跟到實, 又唔敢自己去草地跑 (佢從來未行過草地架!), 攪到佢阿媽被逼要同阿囝一齊出草地跑. 

CoCo不嬲都唔係好敢玩障礙最高果個斜台, 點知佢今次肯玩, 仲唔洗用野食引佢, 淨係用玩具都得, CoCo叻仔!  至於Milky......大家見到0係側邊"陪跑"果個咪係佢囉!  要佢玩障礙? 佢話"No Way!"

 

 

波仔第一次游水, 表現如何呢?  梗係......得個"驚"字啦!

 

奇花!

呢盆, 一睇就知係蘭花啦, 又點解變左做奇花呢?  話說呢盆花係今年過年行年宵買嘅, 蘭花"長命"就係人都知, 但係一心諗住最多咪兩個月左右, 點知......最後一支竟然生存到而家!  我已經好耐無淋水, 係好間唔中記得先淋, 雖然蘭花只係要好少水, 但係, 都不至於一個月淋一次都仲挨到半年掛!!!!!!

所以唔影低佢都唔得, 仲唔係奇花?

Harry Potter...咁都叫一set?

Harry Potter終於都出大結局啦!  雖則話我鍾意睇, 但係我一定唔會"漏夜"排隊等"第一頁"開門啦, 我一早訂左, 到星期六下晝先"施施然"去"第一頁"拎書!  去到門口, 見到仍然有唔少人坐喺出面d梳化度"咪"緊本大結局, 洗唔洗咁急呀????  我, 就梗係唔急啦, 事關我連第6集都未睇, 急咩???????

Harry Potter出第一本嘅時候, 我本來對佢一d興趣都無, 但係咁arm果排好得閒, 朱古力奶姨姨又買左, 咪拎黎睇囉!  點知...真係好好好好睇!  好佩服J.K.嘅天馬行空想像力, 扣人心弦嘅情節, 同埋成個故事好多伏線, 一睇, 真係唔捨得放低!  如果只係睇戲唔睇書, 真係超級"side", 書好睇過戲10倍, 睇書都可以睇到心寒, 效果仲勁過睇戲!  真係抵J.K.發!

幾年前上Amazon訂左set第1至4集嘅box set, 一心諗住之後出果3本都係買返呢個cover啦!  雖然之前果set係美版, 但係就算之後果3本買返美版, 個cover都有d唔同!  哼, 結果變成...唔知算唔算係一set嘅全套Harry Potter!  

中暑

星期日晚照常帶朱古力奶落樓下平台玩波, 時間已經係夜晚11點幾, 落到去見到新搬黎我地屋苑0既lab club會員Chris 同埋佢隻好靚女0既朱古力lab囡Mocha, 阿囝見到靚女就梗係第一時間撩人玩啦, Mocha同CoCo一樣, 係"波痴", 一有波追, 就咩其他0野都唔做唔理!

  玩左大約15分鐘, 其間3隻狗(CoCo, Milky同Mocha)都有間中走去個水兜度飲水, 一切正常.  點知再過左一陣, CoCo突然唔玩, 行埋黎我腳邊坐低, 仲抬起頭望住我!  呢個舉動0係其他狗黎講可能無咩特別, 但係發生0係CoCo身上就......好奇怪!

  有波, 佢無可能唔追, 仲要坐0係我腳邊唔郁, 就更加有可疑!!!!!!

見佢唔郁, 就試下叫佢行去CoCo爸度, 點知佢企起身, 好似企唔穩咁, 行都行唔郁!  我即刻叫佢down, 佢直情成隻訓0係地下(即係扮死0既甫士), 平時佢0係街唔係肯扮死架!  佢訓左一陣, 自己企起身行去CoCo爸度, 但係就好似飲醉酒咁, 左搖右擺, 好唔穩陣!  見佢咁0既樣, 都係唔好再叫佢訓低休息, 要即刻返屋企! (因為我地開住冷氣, 諗住放完狗上黎一定好熱)  點知我地叫CoCo走, 佢連行都行唔郁, 於是CoCo爸就全程抱佢返上樓!

一入屋, 我地即刻整濕d毛巾包住佢個身, 同埋敷0係佢個肚度, 佢仲一路喘氣, 郁都唔郁得!  果下真係嚇死我, 半夜12點, 唔知睇唔睇急症好, 中暑可大可小架!   再過左幾分鐘, 見CoCo無咁喘氣, 仲自己企起身, CoCo爸就拎左d冰水比佢飲, 好彩佢都仲肯飲 (如果已經脫水, 就連水都唔飲架啦!)  之後再休息左差唔多大半個鐘, 佢先無再喘氣, 同埋可以正常咁自己行入廚房, 雖然仲係行得好慢!   果時CoCo爸0係廚房切緊橙, 見佢好返d, 就 "破例”請左幾舊橙佢食.  見阿囝回復為食本性, 個心先定返d!

 

所以大家唔好以為夜晚唔會中暑, 好似呢排又熱又濕0既天氣, 加上追波呢d咁劇烈0既運動, 狗狗半夜12點都可以中暑架!

 

中暑前兆及特徵

前兆：

情緒極為焦躁不定而來回踱步、鼻子發出低嗚聲、舌頭一直淌著口水、呼吸加快、眼睛充血、結膜泛紅、全身發燙等。

特徵：

急喘、開口呼吸、瞪大眼睛、如頭伸長倒捲、喉嚨發出粗厲的聲音、無法站立而側躺、呼吸急促、全身抽搐等。

中暑了怎麼辨：

當發現狗狗已經有中暑前兆，要馬上將狗置於通風陰涼處，並給予大量冷開水任其飲用，靜待片刻觀察症狀是否能有改善，如呼吸是否沖沖的平緩、情緒是否逐漸穩定等。如並未改善，反而出現更嚴重的症狀，必須採取立即降溫的手段，方法如下：

中大型狗：

直接取水管冷水沖洗，要注意的是，自頸部以下來回沖濕身體，避免沖到頭部，由其是口鼻。直到該犬閉口呼吸，立刻關掉冷水，再用乾毛巾擦乾體毛，千萬不能用吹風機吹乾，防止體溫又再次升高，最後要記得將該犬送至醫院，交由醫師做進一步的處理。

小型狗：

可以將小狗置於盥水槽中，一手托住狗身，讓狗頭上仰，一手打開水龍頭直接沖頸背部和控制水量，並防止狗頭浸水或嗆到口鼻，待水槽滿水後關水，讓整隻狗浸泡在冷水中，直到呼吸穩定，要馬上取出擦乾，防止體溫繼續下降而失溫，隨後再用大浴巾包後醫。

YMCA康怡會所

自從4月之後, Milky都無"返過工", 因為佢阿媽我忙到嘔, 好難得星期日下晝夾到時間地點, 見喺康怡咁近, Dr. Milky一於去開工啦!  (其實都唔係真係好夾, 因為個function 3:30pm完, 但係我地4:40pm要睇Harry Potter喎, 仲要走一轉返屋企放返低Milky!)

今次係親子活動, 一去到間房就見到忌廉, Nadia話原來今次係忌廉第一個job黎架!  忌廉咁乖, 一定no problem啦!

雖然咁多小朋友真係...好嘈吓, 不過可以有機會帶比佢地一d對狗狗正面嘅經驗, 都好有意義呀!

Dr. Milky又被一大群小朋友"圍", 佢索性down係度, 對同一時間嘅10個commands, 一概唔理!

雖然真正同(被)小朋友玩嘅時間只有半個鐘, 但係原來都好攰架!  Dr. Milky: "拿拿拿, 又有人攪我隻後腳啦!"

家訪嬌嬌(以前嘅丁丁)

自從丁丁搵到新主人之後, 星期六第一次去探佢, 新主人而家改左佢個名做"嬌嬌", 因為佢實在太"嬌滴滴"同埋太嗲啦!   暫養人阿Min都好掛住嬌嬌, 一於一齊去探下佢!

嬌嬌住喺元朗村屋, 仲有隻lab囡Circle陪佢玩, 又有好大地方跑, 真係好happy架!

點解無見幾個星期, 嬌嬌好似白左嘅?

  仲靚囡左添!

Circle玩牛仔褲

Circle and Milky : "CoCo, 快d同我地去玩啦!"

CoCo:  "你兩個8妹好煩呀, 比我抖下先啦!"

有咩可以令4隻狗嘅眼神咁一致呢? 

當然係......食物啦!

CoCo同嬌嬌好似影情侶婚紗相咁!

Milky點解笑得咁開心呢? 因為佢偷走左入屋嘆冷氣!

Circle一家暫養緊嘅狼狗囝Marlboro, 好乖好純架, 不過就有怪癖......佢......一定係愛上左CoCo!

掛住睇5隻狗玩, 唔記得同嬌嬌影合照添, 呢張係唯一一張我同嬌嬌嘅合照!  下次一定要再影過!

CoCo"踢拖"?

呢排我地將個傻瓜機長期放0係廳度, 因為我地發現朱古力奶而家隨時都有出人意表0既行為, 有時見到就掛住笑, 影相又趕唔切去拎相機, 實在係錯過左好多攪笑場口!  今次阿囝又有新招, 登登登登......就係......踢拖!

CoCo媽:  "咦? 邊個著左對拖鞋呀?  點解隻腳.....黑色架

??????"

 

CoCo: "阿媽, 洗咩大驚小怪呀?  我借黎試下著姐!"

夏日消暑甜品-芒果布甸

呢排日日三十幾度, 好似比以前嘅夏天更熱更焗, 所以最好就係整凍嘢食啦!  其實已經好耐無整嘢食, 因為隻手指染左"頑疾", 唔濕得水, 所以只可以搵d簡單嘢黎整, 睇見好多blog友都整芒果布甸, 見咁易整, CoCo 爸又鍾意食芒果, 就試下整, 原來真係好容易架, 連埋洗嘢20分鐘攪掂!

(當然仲要等雪凍左先食得啦!)

做法係跟丁茶媽嘅方法:

材料: 芒果2個, 芒果啫哩粉1包, 淡奶170g, 熱水半碗, 冰水半碗, 芒果雪糕

 

可以放入雪櫃啦, 要聽日先可以試味!  不過整呢個甜品有一個好處, 就係一路整, 我已經一路食緊芒果同埋芒果雪糕, 飽飽啦!!!