發表文章
所有留言
嫲嫲爺爺同叔叔都有黎呀, 食完飯仲落左樓下大堂影相, 嫲嫲爺爺好興奮咁抱住Sheryl係咁影, 影左成半粒鐘!
Sheryl而家兩個半月大, 前幾日去健康院, 有~11.5磅重, 姑娘話重得好好, 不過身長就得 3 percentile, 要見埋醫生. 醫生話都唔知點解, 因為我同CoCo爸都唔係好矮, 不過醫生話唔洗擔心, 而家個比例都算正常. 醫生問我Sheryl每餐食幾多, 其實Sheryl日頭就食140ml - 180ml (5至6安), 但係臨訓果餐食成210ml (7安), 如果埋身食人奶就食15分鐘左右. 醫生話佢都食得好勁下, 問我有無"窒"佢食, 梗係無啦, 臨訓果餐如果我唔stop佢, 佢仲可以食多過7安架! 埋身餵就更加唔知佢食左幾多, 佢食夠就自然甩咀啦，不過我而家每次泵奶都泵到200ml左右, 咁即係佢平時埋身食都食到咁上下份量.
之前Sheryl臨訓食左210ml之後, 就可以訓成7-8個鐘一直到天光, 仲要係我摷醒佢先起身食奶. 但係呢兩晚情況有變, 食成240ml (8安) 之後都仲伸伸利要搵野食, 嚇到我同CoCo爸都唔敢再比佢食, 逼佢訓覺, 點知未天光5點幾6點就醒, 仲要鬼死咁肚餓, breastfeed 大約5分鐘左右就清一邊, 好大力咁sucking，攪到我有ｄ痛添！
餓成咁係咪即係臨訓果餐唔夠飽？食８安都唔夠咪好大食？ 咁我究竟應唔應該再比佢食多過８安呢？ 我地已經將臨訓果餐拖１１：３０pm先比佢食， 如果佢仍然５點幾６點起身，咁我下星期返工實死得！！！！
轉眼間Sheryl已經兩個幾月大, 而我既產假已經放完, 返工當然有d唔放心, 但有時都覺得係一種relief. Sheryl而家仍然食緊人奶, 大約係70%人奶, 30%奶粉 (唔知我可以堅持得幾耐), 而Sheryl都好叻女, 重得好好, 由第一次去健康院體重得10 percentile, 去到而家有成75 percentile, 都算佢無白費佢阿媽我咁辛苦餵人奶!
Sheryl而家食奶份量大約6安, 日頭有時食得5安, 臨瞓果餐食到7安, 好彩Sheryl無nipple confusion, 咁我先可以一半埋身餵一半用奶樽餵. 基本上Sheryl已經可以話係戒左夜奶, 不過唔等於佢戒左"夜喊", 12am食完奶之後可以朝早7am先食, 不過夜晚係咁扭計唔瞓, 一般都扭到兩,三點, 更試過o係我第一日返工之前果晚扭天光到6am, 攪到我只係瞓左兩粒鐘就返工 (Sheryl真孝順!!!) 至於佢扭咩呢? 唔係肚餓唔係換片唔係肚痛, 而係扭食奶咀! 其實我唔太介意比佢食奶咀, 不過試過有一晚佢食奶咀, 甩左咀就喊, 我地又要起身幫佢執, 跟住又食, 又甩咀, 又喊, 又執, 以上程序重覆又重覆至5am佢先肯瞓! 從此之後, 我地就決定唔比佢食, 其實佢都只係食過幾次, 但係就好似上左癮咁, 到而家都仍然夜晚扭食奶咀, 不過已經有少少進步, 扭既時間短左, 真係唔知點解佢係要夜晚先扭, 日頭無咩點扭架, 可以自己係床仔fall asleep, 真係諗唔明!
為左令Sheryl嘅飲奶瞓覺時間盡快有規律, 我地就同佢set左時間表:
7am Breastfeed
11am 奶樽餵尋日lunch泵嘅人奶, 唔夠就補奶粉約1安
3pm 奶樽餵奶粉
7:15pm 我放工返黎同佢沖涼
7:30pm breastfeed
11pm 奶樽餵尋晚泵嘅人奶, 唔夠就補奶粉約2安 (呢餐唔埋身餵嘅原因係要肯定佢食得夠飽, 要比日頭食得更多, 先可以瞓天光)
至於我就每日泵兩次奶(lunch 1:30pm同臨瞓前約12am), 另外埋身餵兩次, 雖然比起Sheryl食嘅餐數少左一餐, 要有一餐食奶粉, 但係咁樣我會輕鬆d, 而且我每次只係泵到160ml(約5安)左右, 有時Sheryl會唔夠食, 都要補奶粉. 我自己就覺得無須要堅持全人奶, 由其係要返工, 太辛苦又大壓力! 其實我都諗住餵多一兩個月人奶就收工, 但係回奶又係一大問題, 又要辛苦幾日, 回奶回得唔好仲會發炎同發燒, 諗起都怕怕!!!!!
兩個月大的全家福:
兩個月大嘅Sheryl第一次過海去九龍呀! 同公公婆婆去Element食完飯, 影張靚靚聖誕相先:
真係發夢都無諗過生完兩個月之後又要入多次養和手術室!
尋日下晝去左睇醫生, 因為生完之後惡露一直都未清, 正常3至4個星期會清晒, 我到6個星期都未清, 就去左睇中醫, 食左幾次中藥之後返而仲多左惡露, 仲要變返做紅色(之前係啡色)! 同中醫講佢又話係正常嘅唔洗驚, 如是者又過左1個星期, 都係打比婦科問下好d. 點知呀姑娘同我講話有d人要成2個月先清架, 又話可能係period, 仲加句 "你成10個月無黎period, 而家梗係多d架啦!" , 叫我睇定d先唔洗返黎check住! 收左線之後諗諗下, 我餵緊人奶, 會suppress ovulation架喎, 點會咁快period呀??? 仲有我10個月無黎period唔通一次要黎返10個月嘅份量咩? 咁我死得啦, 仲打到電話比你咩???? 上星期四再打去, 今次我堅持要返去check, 佢先死死地氣幫我make appointment, 仲要等到尋日(星期一)先有得睇.
尋日去到醫生同我照左u/s, 見到有塊頗大嘅血塊, 初時話幫我打支針等佢自己排出黎, 但係睇u/s睇多陣之後, 就話因為都幾大area, 同埋唔知會唔會痴得好實, 都係吸出黎好d. 就寫紙比我即時入養和, 果時係下晝5點幾, book左3個鐘之後(8pm)做手術. 突然又要入院, 有d驚惶失措, 但係都知道只係小手術, 加上過幾日要返工, 都係快d攪掂佢好d, 咁就拿拿聲入院.
7點幾換晒衫等入OT嘅時候, 姑娘話要全身ma 醉, 吓! 原來要全身架? 我一直都以為係local / 半身! 我即刻打Dr. Wan mobile, 佢話係要全身架, 不過唔係人地做大手術果種全身, 只係打支針瞓幾個字就醒, 絕對安全, 20分鐘攪掂! 雖然我好清楚呢個係一個小手術, 而呢種全身ma 醉嘅risk好低我都明, 但係我一直對全身ma醉都有d恐懼感, 所以果一刻有d想縮沙唔做. 但係唔做又驚唔知d血流到幾時, 到時流血太多仲危險, 所以都係硬住頭皮比人推入OT房!
入到OT房, Dr. Wan未到, ma師Dr. Cheung到左, 見我咁擔心, 佢好好人咁同我傾計, 仲話唔好打針住, 等Dr. Wan到左先打, 咁就唔洗瞓咁耐. 結果Dr. Wan黎到之後打左針, 大約5秒我就瞓著左.
8pm開始, 8:30pm醒返上房, 休息左兩個鐘就出院返屋企, 好彩唔洗過夜!
就係咁, 喺完全無心理準備嘅情況之下做左個全身ma醉嘅手術, 不過都算係有驚無險!
轉眼間Sheryl已經7星期大啦. 早喺佢未出世之前, 我已經決定左餵人奶, 當時未意識到呢個task有幾高難度, 淨係諗如果連生仔咁辛苦都做到, 餵人奶有幾難??? 一直到Sheryl返左屋企, 真真正正要round the clock 24小時候命餵奶, 先知道原來餵人奶有時仲恐怖過生仔!
可能因為Sheryl喺醫院果時食過奶樽, 加上我身體又未適應, 初初兩個星期真係痛不欲生! 佢每食一下都痛, 好彩我一邊痛一邊唔痛, 起碼痛果邊可以休息下. 加上又唔知佢食左幾多, 唔知佢夠唔夠飽, 如果唔夠狠心走去補奶粉, 第一個月餵人奶一定失敗! 我狠心地唔補奶粉, 當然都要每星期返健康院check住重左幾多, 結果第一個月好成功, 全人奶都重到1kg (全人奶bb average 一個月重0.5kg).
踏入第2個月, 要開始準備比對Sheryl食下奶樽, 因為我返工就唔可以埋食餵啦. 加上過左1個月嘅非人生活, 真係好攰, 開始覺得餵人奶好大壓力. Sheryl未出世果時我成日提醒自己, 對Sheryl唔可以"太緊張", 過份緊張對佢對我都唔好, 好似餵人奶咁, 如果餵唔到人奶咪食奶粉囉, 我都係食奶粉大, 而家咪好人好姐! 所以Sheryl滿月之後就開始半夜果餐唔埋身餵, 如果之前有泵定嘅奶就食, 無就食奶粉. 如果我地有時下晝出街, 嫲嫲都係餵奶粉. 呢個做法除左朝中起身勁谷奶之外, 一直都無咩問題. 仲諗住返左工之後泵到幾多就幾多, 唔夠就食奶粉, 咁起碼都可以叫做係半人奶, 又唔洗一定要全人奶咁大壓力.
點知尋日開始左邊胸有d痛, 一直到夜晚, 發現有個area有硬塊, 點按摩都唔得, 同埋又勁痛!(谷奶痛起上黎同生仔差唔多架!!!) 到今朝起身都仲痛緊, 無好過, 都心知不妙, 拿拿聲去睇醫生, 好彩無發燒, 即係仲未乳線炎, 不過醫生都開左抗生素比我, 叫我返去快d用暖水按摩, 一定要清左佢, 如果唔係就隨時變成乳線炎, 嚴重仲要做手術放膿! 返到屋企第一時間暖加按摩, 又用電泵起勢泵, 但係都泵唔出! 其實由有硬塊開始, 阿囡都已經啜過兩次, 但係都只係舒緩左少少, 不過係人都話就算痛同清唔到都一定要比佢啜, 無嘢比佢埋身啜更有效, 結果再比阿囡啜, 就啜通左啦!!!!
所以話呢個世界上最好嘅奶泵咪就係阿b本人囉, 幾貴嘅電泵都比唔上! 因為天父原本就係design人奶比阿b呢個'泵"食! 但係好可惜, 要返工就真係無計, 加上唔知點解我唔係泵到好多,(姑娘話係let down唔好), 但係Sheryl埋身食又長食長有喎! 所以我而家決定輕鬆d, 返工之後泵到就餵, 泵唔到都唯有食奶粉啦! 對於爛瞓嘅我黎講, 相信都唔可以堅持好耐!
除左讚嘆天父design呢個絕世好'泵"之外, 都好佩服堅持全人奶嘅返工媽咪, 因為真係超辛苦! 原來生個bb出黎唔係最偉大, 返緊工都堅持全人奶嘅, 先至係偉大加偉大!!!
大家都知三小姐個英文名係Sheryl, 不過好似好多人都唔知點讀同點解, 所以都係時侯解釋一下.
改英文名, 我同CoCo爸都唔想改3個音或以上嘅名, 因為讀起上黎感覺"累贅", 上網check左一排, 揀左"Cheryl"呢個名, 一黎唔知點解鍾意C字頭嘅名, 二黎Cheryl呢個名嘅意思係 "sweet lovely girl", 簡簡單單都幾好呀. Cheryl原來同Sheryl係通用嘅, 讀音都一樣, 讀"shir-ro". 不過Cheryl就好易讀錯成"cher-ro", 所以最後決定用Sheryl呢個名啦!
至於中文名, 真係頭都大埋! CoCo爸大力反對搵人改名, 所以我地改左兩個名, 一個係馮晞晴, 另一個係馮康晴. 本來我地鍾意第一個多d, 不過經過多位長輩同家人投票同比意見之後, 決定'康晴"比較好.
尋日終於去左拎出世紙, 鐵定Sheryl個中文名叫做"馮康晴"啦!
尋日有好多人黎探Sheryl呀. 雖然有幾位aunties唔舒服黎唔到, 但係都好熱鬧呀!
Auntie魚片抱得Sheryl幾c服, 果然夠pro.
睇黎Auntie Yvonne都好好手勢喎!
Uncle Yau 有少少唔c服, 所以無抱Sheryl, 不過呢位Dr. Yau好似同Dr. Milky幾啱 key喎!
靖山好叻叻, 一d都唔驚狗狗!
仲同Milky玩騎牛牛!
由於"以貌取人"嘅心理, 大部分小朋友都會"以貌取狗"好驚CoCo. 但係靖山好犀利, 一d都唔驚, 靖山果然有taste, 識貨!
CoCo: 小朋友你咁叻叻, 等我錫啖你先啦!!!"
多謝晒咁多位aunties uncles黎探Sheryl, 仲有要多謝你地嘅禮物呀!
Sheryl出左世已經足3個星期啦, 佢出世果時得5lbs14oz, 雖然醫生話無問題, 但係見佢著最細果件衫都好鬆, 加上醫院其他bb都大隻過佢, 而我又想餵人奶, 所以都有d擔心佢重得唔好. Sheryl返左屋企之後, 我一直都試緊全人奶, 出院到而家兩個幾星期, 只係補過3,4次奶粉, 餵人奶真係幾辛苦, 無得假手於人, 又唔知佢食左幾多, 又唔知佢夠唔夠飽, 每次食親都成粒鐘, 瞓兩個鐘又食過, 加上Sheryl之前食到我損左少少, 真係痛到想屎! 姑娘醫生話每日要餵8-12次, 我就餵得6-7次, 因為Sheryl成日瞓, 我又唔想攪醒佢食 (其實係我懶, 想休息多d), 所以真係一度想放棄餵人奶!
出院之後每星期都要返健康院一次, 因為Sheryl仲有少少黃, 要check住個度數. 健康院最值得去嘅原因係佢地有姑娘教餵人奶, 佢地教左兩次, 而家餵人奶已經唔痛啦!
至於體重方面, Sheryl出院果時大約5lbs10oz(收水後), 今日上磅, 有成7lbs3oz, 姑娘同醫生都話佢重得好好, 姑娘話一般人奶bb一個月只係重一磅, 我都估唔到佢一日食得6-7餐, 都重得咁多. 咁我餵人奶都安心d!
Sheryl每次食飽飽都會O咀:
嫲嫲黎探Sheryl喎:
公公婆婆都有黎呀, 上次婆婆影左相, 今次公公都唔執輸:
食飽又玩完就大覺瞓:
早喺今年5月, 已經confirm左個陪月, 諗住坐月可以休息多d, 因為陪月係負責照顧bb同埋我嘅飲食. 而家d陪月平平地都要成萬蚊一個月, 仲要一早confirm, 如果唔係仲會無期添!
我個陪月喺我出院之後果日就返工, 結果返左5日, 我地就炒左佢! 首先我要講明, 其實個陪月係一個好人, 好有責任心, 都睇得出佢係鍚bb, 有愛心嘅, 加上佢自己都有養狗, 都似係"認真"養果種 (我一直都覺得, 認真養狗嘅人都應該係有愛心嘅!), 總括黎講都好helpful. 咁我地又點解要炒佢呢? 呢個就係我今次請陪月嘅啟示!
我係唔可以請陪月嘅! 如果一d都唔識揍bb / 身體太差照顧唔到bb / 全部假手於人自己一d都唔想理嘅, 我可以介紹我個陪月比你! 仲有一個條件, 就係唔餵人奶, 先好請陪月!
我本身唔係一個鍾意假手於人嘅人, 就算而家有工人姐姐, 放狗同狗玩都係我地自己做返 (主要係CoCo爸負責), 原因係根本都唔捨得比工人walk dogs! 加上我又餵人奶, 陪月連奶都唔洗餵, 結果除左煮中午同夜晚果餐, 加埋同bb沖涼之外, 佢係無嘢做嘅! 佢每日返10am放6pm, 基本上2pm至5pm係得個"坐"字. 好啦, 無嘢做都算啦, 最衰就係佢唔聽話, 自把自為!
因為我係開刀生, 頭一個月都唔補得, 所以佢係唔洗燉嘢比我食, 只係煮d普通嘢. CoCo爸由第一日已經同佢講, 開刀唔食得薑, 要用果皮代替, 一直煮到第4日, 都仍然落薑! 一煲清雞湯都落成10片薑:
同親佢講佢就話少少唔怕, 大佬呀, 樣樣餸都少少就變成多多啦, 炒菜心都要落薑?? 我諗大部份人都知開刀生唔可以食薑, 會刺激傷口, 一個陪月連咁基本嘅嘢都唔知??? 就算唔知, 我叫係唔好落薑叫左n咁多次, 點解都仲要落??? 其實佢煮嘢好好食架, 原因係佢落好多糖同油, 我工人話個陪月黎左幾日, 無左半支油!!!! 試問坐月點可以食咁油嘅嘢架?
最後一樣, 係我最最最唔滿意嘅! 我出院之後一直試緊全人奶, 而我都上左奶, 足夠餵Sheryl. 但係因為食人奶係好攰嘅, Sheryl每次食15分鍾就瞓左, 一放低佢佢就喊, 因為未夠飽. 我同陪月講左唔好補奶粉, 佢要食就話我知我埋身餵. 阿陪月姐姐每日都好似"常鵝"咁, 喺咁同我講話一定要補奶粉架, bb食人奶唔飽架, 唔食奶粉唔大架!!! bb一喊就好大聲咁同bb講"係咪唔夠飽呀? 補奶粉比你好唔好呀?" 頂! 我都叫你同我講, 我埋身餵唔補奶粉囉! 好啦, 我餵緊果時佢就challenge我話我無奶, 好彩阿囡生性, 佢一話我無奶Sheryl就"good"一聲好大聲咁"good"左啖奶落肚, 於是陪月就死死地氣話"又唔係喎, 你有奶架喎!" 如是者過左4日, 我地決定收埋d奶粉, 睇你點餵! 點知有一日, 佢同bb喺房, 我地喺廳食飯, 比我地喺隻眼仔度睇到佢問都唔問我, 自己又走去拎奶樽想開奶粉, 但係搵唔到奶粉, 於是我叫CoCo爸即時入房阻止佢! Sheryl已經唔係食得好好, 個咀仔開得唔夠大, 食到我痛, 健康院姑娘話係因為佢食過奶樽, 食到懶晒, 阿陪月仲成日比佢食奶樽, 真係想痛死我!!!!!
真係貼錢買難受, 請個人返黎煩住我, 又幫唔到手! 所以除非你係唔餵人奶, 同埋自己咩都唔想理, 否則請個陪月返黎真係無咩意思!!!!
打發左個陪月走. 返而成個人都輕鬆晒!
)