陪月的啟示

早喺今年5月, 已經confirm左個陪月, 諗住坐月可以休息多d, 因為陪月係負責照顧bb同埋我嘅飲食.  而家d陪月平平地都要成萬蚊一個月, 仲要一早confirm, 如果唔係仲會無期添!

我個陪月喺我出院之後果日就返工, 結果返左5日, 我地就炒左佢!  首先我要講明, 其實個陪月係一個好人, 好有責任心, 都睇得出佢係鍚bb, 有愛心嘅, 加上佢自己都有養狗, 都似係"認真"養果種 (我一直都覺得, 認真養狗嘅人都應該係有愛心嘅!), 總括黎講都好helpful.  咁我地又點解要炒佢呢?  呢個就係我今次請陪月嘅啟示!

我係唔可以請陪月嘅!  如果一d都唔識揍bb / 身體太差照顧唔到bb / 全部假手於人自己一d都唔想理嘅, 我可以介紹我個陪月比你!  仲有一個條件, 就係唔餵人奶, 先好請陪月!

我本身唔係一個鍾意假手於人嘅人, 就算而家有工人姐姐, 放狗同狗玩都係我地自己做返 (主要係CoCo爸負責), 原因係根本都唔捨得比工人walk dogs!  加上我又餵人奶, 陪月連奶都唔洗餵, 結果除左煮中午同夜晚果餐, 加埋同bb沖涼之外, 佢係無嘢做嘅!  佢每日返10am放6pm, 基本上2pm至5pm係得個"坐"字.  好啦, 無嘢做都算啦, 最衰就係佢唔聽話, 自把自為! 

因為我係開刀生, 頭一個月都唔補得, 所以佢係唔洗燉嘢比我食, 只係煮d普通嘢.  CoCo爸由第一日已經同佢講, 開刀唔食得薑, 要用果皮代替, 一直煮到第4日, 都仍然落薑!  一煲清雞湯都落成10片薑:

同親佢講佢就話少少唔怕, 大佬呀, 樣樣餸都少少就變成多多啦, 炒菜心都要落薑??  我諗大部份人都知開刀生唔可以食薑, 會刺激傷口, 一個陪月連咁基本嘅嘢都唔知???  就算唔知, 我叫係唔好落薑叫左n咁多次, 點解都仲要落???   其實佢煮嘢好好食架, 原因係佢落好多糖同油, 我工人話個陪月黎左幾日, 無左半支油!!!!  試問坐月點可以食咁油嘅嘢架?

最後一樣, 係我最最最唔滿意嘅!  我出院之後一直試緊全人奶, 而我都上左奶, 足夠餵Sheryl.  但係因為食人奶係好攰嘅, Sheryl每次食15分鍾就瞓左, 一放低佢佢就喊, 因為未夠飽.  我同陪月講左唔好補奶粉, 佢要食就話我知我埋身餵.  阿陪月姐姐每日都好似"常鵝"咁, 喺咁同我講話一定要補奶粉架, bb食人奶唔飽架, 唔食奶粉唔大架!!!   bb一喊就好大聲咁同bb講"係咪唔夠飽呀? 補奶粉比你好唔好呀?"  頂! 我都叫你同我講, 我埋身餵唔補奶粉囉!  好啦, 我餵緊果時佢就challenge我話我無奶, 好彩阿囡生性, 佢一話我無奶Sheryl就"good"一聲好大聲咁"good"左啖奶落肚, 於是陪月就死死地氣話"又唔係喎, 你有奶架喎!"   如是者過左4日, 我地決定收埋d奶粉, 睇你點餵!  點知有一日, 佢同bb喺房, 我地喺廳食飯, 比我地喺隻眼仔度睇到佢問都唔問我, 自己又走去拎奶樽想開奶粉, 但係搵唔到奶粉, 於是我叫CoCo爸即時入房阻止佢!  Sheryl已經唔係食得好好, 個咀仔開得唔夠大, 食到我痛, 健康院姑娘話係因為佢食過奶樽, 食到懶晒, 阿陪月仲成日比佢食奶樽, 真係想痛死我!!!!! 

真係貼錢買難受, 請個人返黎煩住我, 又幫唔到手!  所以除非你係唔餵人奶, 同埋自己咩都唔想理, 否則請個陪月返黎真係無咩意思!!!!

打發左個陪月走. 返而成個人都輕鬆晒!