陪月的啟示

早喺今年5月, 已經confirm左個陪月, 諗住坐月可以休息多d, 因為陪月係負責照顧bb同埋我嘅飲食.  而家d陪月平平地都要成萬蚊一個月, 仲要一早confirm, 如果唔係仲會無期添!

我個陪月喺我出院之後果日就返工, 結果返左5日, 我地就炒左佢!  首先我要講明, 其實個陪月係一個好人, 好有責任心, 都睇得出佢係鍚bb, 有愛心嘅, 加上佢自己都有養狗, 都似係"認真"養果種 (我一直都覺得, 認真養狗嘅人都應該係有愛心嘅!), 總括黎講都好helpful.  咁我地又點解要炒佢呢?  呢個就係我今次請陪月嘅啟示!

我係唔可以請陪月嘅!  如果一d都唔識揍bb / 身體太差照顧唔到bb / 全部假手於人自己一d都唔想理嘅, 我可以介紹我個陪月比你!  仲有一個條件, 就係唔餵人奶, 先好請陪月!

我本身唔係一個鍾意假手於人嘅人, 就算而家有工人姐姐, 放狗同狗玩都係我地自己做返 (主要係CoCo爸負責), 原因係根本都唔捨得比工人walk dogs!  加上我又餵人奶, 陪月連奶都唔洗餵, 結果除左煮中午同夜晚果餐, 加埋同bb沖涼之外, 佢係無嘢做嘅!  佢每日返10am放6pm, 基本上2pm至5pm係得個"坐"字.  好啦, 無嘢做都算啦, 最衰就係佢唔聽話, 自把自為! 

因為我係開刀生, 頭一個月都唔補得, 所以佢係唔洗燉嘢比我食, 只係煮d普通嘢.  CoCo爸由第一日已經同佢講, 開刀唔食得薑, 要用果皮代替, 一直煮到第4日, 都仍然落薑!  一煲清雞湯都落成10片薑:

同親佢講佢就話少少唔怕, 大佬呀, 樣樣餸都少少就變成多多啦, 炒菜心都要落薑??  我諗大部份人都知開刀生唔可以食薑, 會刺激傷口, 一個陪月連咁基本嘅嘢都唔知???  就算唔知, 我叫係唔好落薑叫左n咁多次, 點解都仲要落???   其實佢煮嘢好好食架, 原因係佢落好多糖同油, 我工人話個陪月黎左幾日, 無左半支油!!!!  試問坐月點可以食咁油嘅嘢架?

最後一樣, 係我最最最唔滿意嘅!  我出院之後一直試緊全人奶, 而我都上左奶, 足夠餵Sheryl.  但係因為食人奶係好攰嘅, Sheryl每次食15分鍾就瞓左, 一放低佢佢就喊, 因為未夠飽.  我同陪月講左唔好補奶粉, 佢要食就話我知我埋身餵.  阿陪月姐姐每日都好似"常鵝"咁, 喺咁同我講話一定要補奶粉架, bb食人奶唔飽架, 唔食奶粉唔大架!!!   bb一喊就好大聲咁同bb講"係咪唔夠飽呀? 補奶粉比你好唔好呀?"  頂! 我都叫你同我講, 我埋身餵唔補奶粉囉!  好啦, 我餵緊果時佢就challenge我話我無奶, 好彩阿囡生性, 佢一話我無奶Sheryl就"good"一聲好大聲咁"good"左啖奶落肚, 於是陪月就死死地氣話"又唔係喎, 你有奶架喎!"   如是者過左4日, 我地決定收埋d奶粉, 睇你點餵!  點知有一日, 佢同bb喺房, 我地喺廳食飯, 比我地喺隻眼仔度睇到佢問都唔問我, 自己又走去拎奶樽想開奶粉, 但係搵唔到奶粉, 於是我叫CoCo爸即時入房阻止佢!  Sheryl已經唔係食得好好, 個咀仔開得唔夠大, 食到我痛, 健康院姑娘話係因為佢食過奶樽, 食到懶晒, 阿陪月仲成日比佢食奶樽, 真係想痛死我!!!!! 

真係貼錢買難受, 請個人返黎煩住我, 又幫唔到手!  所以除非你係唔餵人奶, 同埋自己咩都唔想理, 否則請個陪月返黎真係無咩意思!!!!

打發左個陪月走. 返而成個人都輕鬆晒! 

又多個妹啦!

相信大家都關心到底朱古力奶同Baby Sheryl相處成點.  答案係...未相處過!  原因唔係因為驚佢地相處唔到, 而係Sheryl太細, 驚d狗毛會令佢唔舒服, 所以而家朱古力奶喺廳, Sheryl喺房.  不過我地一早預備左Sheryl用過嘅紗巾比朱古力奶熟悉下Sheryl嘅氣味先!

CoCo:  咩咩咩....咩事呀?  呢條咩東東黎架, 咁大陣"so"味嘅?

CoCo媽: 係你細妹Sheryl嘅味呀, 你之後要錫細妹呀!

CoCo: 吓? 又係妹妹? 一個已經煩屎我, 仲要整多個?

 

第一次去健康院

唔驚唔覺, Sheryl返左屋企成個禮拜啦, 不過因為太忙, 所以都未upload佢d新相, 加上佢成日瞓覺, 唔係影左好多相.

今日第一次去健康院, 都係Sheryl第一次出街, 好彩佢表現都ok.  選擇健康院而唔去私家, 係因為我覺得健康院d姑娘都好experienced, 同埋service都好好, 最重要係有專人指導餵人奶技巧, 真係好有用!  因為Sheryl出院之後大致上都係全人奶, 係間唔中補過一兩次奶粉, 同埋半夜果餐有時我會pump出黎, 比CoCo爸半夜幫我餵.  不過我始終唔想佢食奶咀, 因為頭一個月最易有nipple confusion, 但係Sheryl又食到我痛, 加上佢又好似食極都未飽, (but濕片數目又ok喎!?) 所以今日姑娘就再教過我點餵.

姑娘好有耐性, 佢教完之後真係唔痛喎, 不過都要我同Sheryl多d練習先得.  其實Sheryl已經好叻, 佢細細粒其實食人奶會好攰, 有時食到上氣唔接下氣, 未食飽就攰到瞓左, 但係瞓唔夠一陣就喊, 因為未飽, 又要再食過.  食一餐奶起碼要攪成粒鐘, 跟住兩至三個鐘又要食下一餐, 所以基本上每日都係食奶同瞓覺. 

至於Sheryl其他健康方面, 仲有少少黃, 不過唔大問題, 醫生話由佢就ok.  至於體重, 佢而家arm arm去返出世果時嘅體重, 所以要努力d食奶, 先可以重快d架!

有時我見Sheryl食人奶食到咁攰, 我會同佢講 "Sheryl你已經好叻叻架啦, 食到人奶嘅bb係好叻架, 你要加油呀!!!"

食飽左嘅Sheryl瞓到自己喺度笑:

前兩日爺爺嫲嫲黎探Sheryl, Sheryl好俾面咁睜大眼睛影相!!!  爺爺當然都帶左好多零食比朱古力奶啦, 佢兩隻嘢見到爺爺呢個"人肉餵食機", 開心到震!

提早出院@Day 5

話說養和嘅開刀生仔package有5日4夜同6日5夜兩個choice, 我一直都打算住6日5夜, 諗住可以有人幫我揍住bb, 我可以休息多d.  但係其實我喺醫院平均每日都瞓唔到8粒鐘, 因為日頭有人出出入入, 姑娘又每3個鐘call一次餵奶, 每次餵奶又攪成粒鐘, Dr. Wan又朝朝早都6點幾黎巡房 (我朝朝早都比佢摷醒, 佢問我覺得點, 我真係想同佢講我其實覺得好眼瞓!!!!), 加埋兒科每日兩次巡房, 基本上係唔洗瞓!

到左第5日朝早, 我同CoCo爸都好似adapt左咁, 未夠6點已經醒左 (幾叻, 早過Dr. Wan!).  我覺得傷口都ok, 加上兒科話Sheryl過左黃疸高峰期, 無問題唔洗照燈, Dr. Wan又日日同我講叫我唔洗住咁多日, 喺醫院又瞓唔到, 咁不如早一日出院啦!  Dr. Wan 6:15am黎到巡房, 又問我出唔出院, 叫我唔洗住多日啦, 咁我就話好啦, 不過我想夜d 先出院 (因為要叫工人清潔左屋企先, 同埋有d朋友預左今日黃昏黎探我), Dr. Wan不知幾開心, 巡房又巡少個, 唔洗日日趕到隻狗咁!  Dr. Wan話出左院都要食止痛藥, 唔食唔得, 開左成個星期藥比我. (咁咪即係要痛多一個星期?!)

結果我住左5日4夜, 第5日夜晚8點左右出院, 出院前梗係要同我住間病房影相留念啦!

仲有睇bb嘅玻璃房:

喺外國, 無carseat醫院係唔比bb出院架, 香港就無規定, 有好多人都會手抱bb撘車, 撘public transport同的士就無得好講, 如果自己車, 我就真係好反對手抱啦!  如果真係有咩意外, 你又點可以/可能肯定自己唔會放手呢?  呢樣自己根本控制唔到, 所以我地買左呢款Aprica 嘅carseat, for new born至4歲, 好處係可以平瞓同埋打橫瞓, 仲protect埋個頭仔.   bb大個左可以拆左個headpiece, 變返張普通carseat!

返到屋企張新床仔, Sheryl大覺瞓, 睇黎佢都幾滿意佢嘅新居:

至於我同CoCo爸, 終於可以瞓返張5呎床啦!!!!

好痛@day 4

第四日一早起身, 覺得傷口無咁痛喎, 仲好開心繼續試breast feed.  Sheryl都好叻女, 啜得幾好, 不過係我未上奶, 仍然要繼續stimulate.

風平浪靜地一直到黃昏, 開始覺得有上奶feel, 開心唔夠幾個鐘, 開始覺得心口好似有兩舊石頭一樣, 勁痛!  痛到連手都舉唔起.  姑娘見我咁痛, 就幫我手按摩, 其實真係每下都勁痛, 姑娘話:"谷奶係咁架啦, 痛起上黎同生仔差唔多!"   一到餵奶時間, 我即刻仆去餵奶房, 點知Sheryl喊到收唔到聲, 係都唔肯食.  又難怪, 比舊石頭你你都唔食啦!  好彩d姑娘超好人, 又有耐性, 幫我按摩又幫我pump奶, 但係都失敗!  姑娘話我有部份乳線塞左, 攪左成粒鐘, 已經係半夜12點, 其他餵奶嘅媽咪都已經返晒房瞓, 姑娘叫我唔好再pump, 如果唔係over stimulate仲衰, 分分鐘會發燒!  佢叫我返去試下瞓, 第二日再試.  本來諗住Coco爸今晚唔洗陪我過夜, 但係因為驚我會半夜發燒, 結果二百幾蚊都係慳唔到, 又要加床!

好彩我都瞓到, 雖然個心口勁痛!

Sheryl第4日果樣, 好似又有d唔同左啦喎:~~~

Visit by 公公婆婆 @ day 3

今日傷口仍然痛, 特別係一早落床果下, 真係幾慘烈!  醫生check過又話無問題喎, 佢話瞓喺度唔郁唔痛就ok, 郁動會痛就要成個星期先會好d架!!!

至於Sheryl, 佢今日breast feed都好乖, 好肯食, 只係我仲未夠比佢食, 要補奶粉, 不過兒科醫生話係正常. 

另外今日婆婆下晝黎探 Sheryl, 其實我生果日公公婆婆已經由我未生等到Sheryl出世, 不過果日bb剛剛出世, 未可以抱住影相.  今日就唔同啦, 因為bb黎左我房breast feed, 所以婆婆就可以抱住孫囡影第一張合照啦!

跟住黃昏6點左右又見公公黎左, 原來今晚公公去開跑馬地, 所以又黎睇下我同Sheryl啦, 不過因為Sheryl剛剛又食完奶返左入bb房, 所以公公今日影唔到相添, 唔緊要, 留返下次!!!

 

Sheryl @ Day 2

尋日1:30pm開刀, 好彩有個好嘅ma醉師, 無咩side-effect, 到7:00pm左右已經好好胃口咁食晒碗粥, 姑娘見我食到嘢同埋子宮收縮得幾好, 7:30pm已經可以拆左條drip! 加埋塞藥同口服止痛藥, 尋晚唔多痛, 都瞓到唔洗食安眠藥. 

今朝7點正阿姐就叫醒我地話要收陪人床(即係CoCo爸張床), 當我地仲半夢半醒, 埋怨緊點解咁strict七點正要收床之際, 7:15pm左右突然聽到Dr. Wan把聲.  嘩, 咁早黎檢查!!!  醫生check完話progress好好, 可以試落床, 叫姑娘早晚同我塞藥 (塞藥係最有效最快同last得最耐嘅止痛藥), 咁醫生走左之後姑娘就同我拆左條尿喉, 帶左條收腹帶, 就叫我過多一陣如果想去廁所就落床去, 不過距離上次塞藥未夠12個鐘, 未可以再塞住, 淨係比左口服止痛藥我食 .  其實我一早有晒心理準備去小便會痛, 同埋最痛就係落床果下, 所以我一直都賴死唔落床, 等到真係要去小便先落.  直到差唔多10點, 開始覺得口位好痛, 我都知係因為膀胱開始滿, 頂到傷口所以痛, 咁都唯有要落床!

CoCo爸扶我起身落床 (基本上係搬唔係扶), 係預左痛, 但係無諗過會痛到咁!  真係勁痛, 仲要行去廁所, 每一步都痛到標眼水!  跟住去小便, 無尿道炎果種痛, 開心之際又突然覺得傷口痛, 係超痛! 我諗係因為empty bladder果時又頂到個子宮傷口, 又痛餐死!  跟住唯死返上床, 唔敢再落床住.  姑娘跟住問我落床點, 我就話痛到我死下死下, 佢就即刻同我塞止痛藥, 果時係10點幾左右, 塞完就去試breast feed.   直到下晝1點幾, 見到Dr. Wan, 佢問我落床落成點, 我話佢知超痛, 佢問我 "你無塞藥咩? 10點幾先塞咁遲? 梗係痛啦, 我睇完你之後7點幾就要塞啦, 你聽日同姑娘講話醫生話可以早d塞架!"   唉, 聽日先講有鬼用咩, 我最痛係今日呀! 

今日剩低嘅時間姑娘都好準時同我塞藥同埋比口服消炎止痛藥我食, 情況好左好多, 行同落床都要CoCo爸扶下, 但係已經係可以接受嘅痛. 

至於Sheryl, 佢今日試左3次breast feed,  都算ok, 肯啜, 不過我其實唔知佢食唔食到/有無得比佢食, 所以餐餐都要穩陣d補奶粉比佢.  兒科醫生話ok, 因為開刀無順產咁快上奶, 而且bb初生幾日唔會食好多, 鍾意瞓多過食, 只要keep住試就無問題. 

三小姐果樣第2日已經同第1日唔同左少少啦:

 

聽日要keep住努力breast feed, 因為可以幫阿媽我收身, 阿囡Sheryl你要生生性性, 對你對我都好架!

三小姐Sheryl出世了!!!

終於到左10月13號呢個大日子:

一早9點黎到養和, 好彩停車場仲有一千零一個車位!

攪完入院手續都只係10點半, 仲要等多3粒鐘先到開刀時間, 所以就周圍影下相, 當然唔少得6樓產科個水牌!

好好彩, 間雙人房另一張床未有人, 變成私家房!

半身ma醉可以第一時間見到阿b 不過就驚餐飽!  姑娘話一般手術開始15分鐘左右就見到bb出黎, 不過如果Dr. Wan就會仲快d, 結果我連佢開始開刀我都唔知, 8分鐘左右就聽到bb喊啦!  加上Dr. Wan 個ma醉師partner都好experienced, 打spinal 唔痛 (當然都有打針果下痛啦, 不過打drip果下反而仲痛d), 之後都無發冷同嘔, 算係好ok. 

第一張全家福with Sheryl:

bb原本估計會有6磅幾, 結果出黎得5磅14安士, 不過兒科醫生check過話佢無問題, 體重可以之後pick up!

今晚我仲未落得床,加上傷口仲有痛, 要食止痛藥, 聽日要試落床(應該係最痛嘅時候)試breast feed啦, 希望一切順利啦, I will try my breast! (try my best!)

最後衝刺

開刀前兩日, 最後衝刺去shopping, 行過Apita原來BB嘢又做特價!(由我有左5個月到而家, 佢地已經做左3至4次BB嘢特價啦!!!) 

諗諗下, 原來三小姐無咩玩具喎.  黑白色對初生bb嘅stimulation大d, 不過唔係好多玩具用黑白色, 今次比我見到, 仲有15%off, 一於買!!!!

其他bb用品都有8折, 所以就買定d存貨!

去Apita之前, 去左永安, 買過幾個乳膠奶咀, 因為驚原本果d Silicon奶咀太硬, 如果我breast feed 失敗, 中碼size嘅三小姐可能唔夠力食Silicon奶咀.  點知去完永安再去Apita, 先知Apita做緊8折呀!!!  唉, 蝕左成廿蚊!!!!

最後衝刺shopping完, 係時候疊埋心水等星期一生劏!!!!!

好緊張....

今日係bb出世前最後一個weekday, CoCo爸同我去左赤柱relax下, 不過雖然係平日, 但係都唔少人, 好多外國遊客.  今次都有去睇bb衫, 不過都忍手無買, 因為bb衫已經多到個柜都放唔落!  只係買左一條chicco毛巾包被, 買呢條嘢令我諗起一件幾好笑嘅事, 話說之前去chicco專門店買佢地果條連醫生姑娘都推介嘅開刀產後收腹帶, 順便睇下d  bedding set, 係順便睇下only, 因為對chicco 呢個品牌無咩好感, 得個貴字, 但又貴得唔係好值, 質地好過佢又平過佢嘅真係大把choice!  我地見到有兩set bedding sets, 一set有一隻牛牛pattern, 另一set有兩隻牛牛, 兩set都過千, 其中一set貴幾百蚊, 咁我就順口問個sales點解呢set貴d呢?  果個連廣東話都未講得正嘅sales用唔知係國語定廣東話同我講:"呢set貴d因為有兩隻牛!"............我即時 O晒咀, 呢d咁"大陸"嘅原因真係佢先講得出口!!!   今日我就係用八十大元喺赤柱買左條牛牛pattern毛巾包被 (諗落$80都嫌貴), 唔記得問下有無兩隻牛牛嘅pattern, 同埋唔知係咪貴d呢??? wakakakaka!

嘆多兩日, 星期一就要開刀啦, 真係好緊張!  一來驚做手術(可能因為我實習果時喺醫院睇過人做手術, 都咪話唔得人驚!), 二來又驚bb出世唔知會唔會有complications, 雖然星期一已經係38週4日啦, development理應ok, 不過萬一有complications (e.g.肺炎之類), 我諗埋單果時我會嚇到暈!

加上又要擔心朱古力奶會唔會被疏忽照顧, CoCo爸試過幾次臨瞓前唔記得擺個水兜比Milky, 攪到我而家要貼張post-it喺個燈掣度提佢!  又驚工人拖唔實CoCo (已經試過兩次啦!), 如果平台有車阿囝就死得啦!!!!

所以真係好緊張!!!!!!!!

Milky又發作啦!!!

自從Milky年半前尿道炎好返之後, 轉左食Canidae 加 Berry Balance supplement, 尿道炎一直都無再返發, 加上完全無食街買嘅零食, 淨係食我自己整嘅燕麥餅餅, 個個都話佢連d毛都多左靚左!   點知9月尾果時CoCo爸拎個電剪同Milky剃pat pat毛, 剃完之後Milky就成日用個pat pat磨地下, 磨到小便位後面紅晒.   我都心知不妙, 咁啱Milky又夠期打癲狗針, 就順便睇埋vet.  果然不出我所料, 驗尿結果係有細菌同有晶體, 即係又要食20日抗生素!  因為而家落親街Milky都會磨pat pat, 所以vet就比埋支殺菌shampoo我地, 早晚用黎同Milky洗pat pat!

至於返發嘅真正原因係咩呢?  到底係因為剃毛剃得太短? 定係因為工人同Milky抹身果時抹得唔好呢?  因為之前一直都係我負責同Milky抹身, 我一定最後先抹大便位, 我諗工人一定無咁做!  所以我而家就嚴格要求工人要用separate tissue 抹左大便位先, 條抹身巾如果抹過其他地方就一定唔可以再抹小便位!  所以話如果唔係無得揀, 我一定唔會假手於人!!!!

好彩食左5日藥同埋嚴格監控抹身程序之後, 再驗尿就無細菌啦!  不果仲要finish剩低果15日嘅antibiotics, 阿囡真係可憐, 又要做藥煲!  不過好彩已經好返好多, 如果唔係我遲d要入院成個禮拜, 一定掛心掛屎我囉!!!!!

產假第一天的節目

10月2號第一日放產假, 竟然都有好豐富嘅節目!  我地見milky去過山頂幾次, 所以見weekday無咁多人, 今次就帶coco去啦!

當日天氣涼涼地, 去 Peak Cafe坐室外好舒服架!  佢地仲有dog menu, 雖然只係現成嘅牛皮骨, 但係coco 已經開心到震!

人食嘢都有冰水供應啦, 狗狗都有水飲架!

叫左嘢食之後, 我就去左洗手間, 返到黎coco爸話比我知阿囝掛住望我, 骨都唔食, 要見到我返左黎先肯食!  阿媽我梗係心都甜埋啦, 阿囝有幾為食, 識佢嘅都知, 但係佢竟然唔食舊骨都要等我返黎, 阿媽我真係開心屎囉!!!!

Coco: ......點解阿媽咁耐都未返架......?!!!"

coco:" 好囉, 阿媽返左黎, 我可以安心食骨骨啦!"

我地就叫左至愛嘅Cherry Stone Calm!

全雞中翼嘅Buffalo wings

仲有三文魚烤飽, 不過掛住食唔記得影相!

食完就梗係同d黃金週自由行嘅同胞爭下位影相啦!