CoCo @ hospital and post FCE day 7

CoCo入左院已經一個星期啦, 一星期前嘅呢個鐘數, CoCo仲享受緊佢出事前最後一次玩波波, 可能真係玩得太癲啦........

入院後第二日去探佢, 可能庥醉藥未過, 見到佢個身係度震, 對手肘損晒, 我真係喊到收唔到聲.  因為佢前半身可以郁, 佢就喺間房度爬,  張床墊又比佢踢左去後面, 攪到手肘損晒!

見到阿囝呢個眼神, 真係好心痛!

於是我地幫佢放返好張墊, 基本上間房後半part係唔須要墊, 因為佢長期痴實房門, 想走佬!

過左48小時, medical condition穩定左, (FCE嘅最壞情況會係24-48小內"現形", 之後就穩定, 雖然阿囝嘅情況應該已經差到無可再差!) 即刻同佢做運動, 唔keep住到時肌肉委縮就隻腳郁到都行唔到架啦!

第4日, 阿囝精神番晒, 個牌仲比姑娘加左句: bite drip! (呢個先係正常嘅CoCo!) 結果要帶喇叭, 左撞右撞, 攪到個鼻都損左少少!

終於可以off drip啦 (打drip打到兩隻手都損晒!) 姨姨同姑婆日日都黎探佢, 我地就同佢練企.  其實前半身係唔洗用毛巾, 不過佢對前手向後縮, 想balance後身, 唯有用條毛巾拉返佢對前手向前, 咁後腳先可以練到力架!

努力學習放尿..........

今日已經係day 7, 每日朝早10點都好緊張咁等vet assistance打黎報告進展, 今日好難得聽到佢話vet覺得CoCo有進步, 拖佢出黎行佢對後腳試過有幾下企落地!  我去到探佢, 放完尿就即刻爭取時間同佢做運動, 今日扶佢企好之後, 放手佢可以企到5,6秒, 不過佢好似好驚我走, 我企佢後面佢keep住轉頭過黎望我, 攪到lost balance!  跟住我hold住佢大脾, 細細力幫佢屈個knee joint, 叫佢sit, 我feel到佢對腳muscle有震下震下, 即係佢自己出緊力!!!  GOOD!  之後我叫佢sit好同stay, 我行開去拎treats比佢, 返到黎佢仲sit緊呀, 無collapse!  雖然呢d improvement對vet黎講唔算係d咩, vet淨係concern deep pain sensation, 但係對我黎講, it means a lot!!!!  我見到阿囝每日都有少少進步, 同埋佢好似知道我幫緊佢, 做physio時好合作, 無平時咁唔聽我話!

講真, 日日都比vet撥冷水, 話阿囝無咩deep pain sensation, mit佢唔望過黎, 真係有一刻想放棄!  而家見到阿囝自己都咁努力, 我無理由放棄!

btw, 我返屋企試milky deep pain sensation, 佢都無望過黎喎!  如果無記錯, 當初考Dr. Dog果時, 其中一樣係整痛佢佢都唔可以轉頭過黎, 呢樣milky一向都做到, 咁其實Coco係咪好似Milky咁, 係唔望而唔係無sense呢? 

聽日就接阿囝返屋企啦, 係一個好大好大嘅挑戰, 我都好擔心應唔應付到, 都唔知要應付幾耐, 但係點都要試下先, 希望阿囝同我地都堅強d, 一齊過呢一關!!!!!