病人的晚餐

話說CoCo爸咳左成個禮拜, 食左藥都唔好, 終於星期一去左睇我睇開嘅耳鼻喉科醫生葉劍光.  原來唔係普通傷風感冒咁簡單, 事緣CoCo爸自細有一邊鼻骨移左少少位, 細細個游得水多而得到鼻竇炎, 時有番發, 今次又o黎喇! 

病, 就梗係食粥架啦, 但係我又唔識煲粥喎(好低能), 唯有問下朱古力奶嫲嫲啦!  綜合左朱古力奶嫲嫲同埋其他網上搵到嘅方法, 我就跟呢個程序整, 整出黎幾ok喎, 質地都好綿呀, 係一煲似粥嘅粥!

材料:     瘦肉一舊, 米 4/5至1 杯,  水(大約係平時煮飯用嘅水嘅7倍), 陳皮兩塊

煮法:

1.       瘦肉用鹽腌一腌  (如果唔想d粥有咸味, 可以就咁將舊肉出一出水, 再放入去煲就得啦)

2.      陳皮浸軟之後用刀去左d囊 (一定要去囊架, 因為d囊好寒)

3.      米要加一湯匙油, 少少鹽, 同埋兩茶匙水拌勻, 腌至少半小時

4.      水同陳皮一齊煲滾

5.       水滾之後放瘦肉入去, 舊肉唔好切開, 成舊放落去, 煮好之後先撕開放返入d粥度

6.      等水再滾就落埋米

7.      大火煮15分鐘左右, 再轉細火煲大約45分鐘

p.s. 我有放隻湯匙入煲底, 人地話可以防痴底, 但係我果煲都係有少少痴底, 我諗要定時定候攪下佢先得!  同埋一定要睇火, 因為好易滾瀉(可能我個煲唔夠大啦)

再加埋鮑魚麵, 美心叉燒, 同埋蒜蓉炒翠玉瓜 (本來唔係食叉燒, 係食牛肉炒翠玉瓜, 但係CoCo爸係都要食叉燒, 吹脹!) , 就攪掂呢餐"病人的晚餐"啦!!!!  除左d粥咸左d之外, 都叫做成功既!

  下次一於唔好淹舊肉!!!