發表文章
所有留言
上星期六同左CoCo Milky去游水, 見到一隻5個月大嘅lab bb 學游水, 真係可愛到死! 攪到我即刻諗返阿囝細個第一次游水個可愛樣! 好, 一於摷返d舊相出黎睇下CoCo嘅幾個第一次先......
第一次去昊華園游水, 阿囝唔敢落水, 比佢老豆"夾"落水, 個樣好無奈!第一次"下海"仲撞到朱古力同芋頭, 阿囝意外地比芋頭"禁"左個頭落水, 嚇到之後一直都喺岸邊徘徊, 唔敢再落水!第一次去SPCA上堂, 阿囝話"阿媽, 好悶呀, 佢教果d嘢我都識晒啦, 走得未呀???"第一次去行山, 諗起果次真係險, 阿囝得4個幾月, 行左成兩粒鐘, 之後仲要去石澳食埋飯先有得返屋企, 攰到隻嘢咁......果次真係......死唔去都算阿囝好彩囉!
呢幾日熱到死, 朱古力奶又成3個禮拜無沖涼, 於是星期六下晝就同兩隻嘢去游水水啦! 又話拉布拉多嘅袓先係幫漁夫潛入水度捉返d漏網之魚, 點解阿囝呢隻拉布拉多學極都唔識潛水架???
今次仲撞到一隻5個月大嘅黑lab bb, 第一次黎游水, 真係好cute呀! 佢仲好鬼死痴人, 痴到主人實一實, 真係比佢lum死!
阿囝而家好慳家, 至鍾意嘅玩具係......水樽! Milky未游水, 已經跑草地跑到要中場休息!阿囡睇咩呢? 原來佢老豆行左出去, 洗唔洗咁緊張呀?5個月大嘅黑lab bb, 可愛到暈, 佢第一次游水, 開始好驚架, 又唔肯落水, 但係因為佢勁痴主人, 主人於是行落泳池, 扮走, lab lab即刻驚死主人留低佢, 唯有鼓起勇氣, 自己行落水去追番主人, 佢心諗"死就死啦, 主人走左就屎啦!!"lab lab鼓起勇氣, 終於學識游水啦! lab lab真係好叻呀!!!!!
尋日發生左一件令我個心好唔舒服0既事, 朱古力奶個"唉也"舅父仔-追風快將, 去左彩虹橋!
尋日0係電影度睇住佢開頭好叻仔跑第一, 點知跑到後段突然越跑越慢, 最後未到終點就成隻趺低左, 仲拋左個騎師落地!
我見朱古力奶舅父仔仲有嘗試"gut"起個頭, 但係都唔成功, 最後成隻訓左0係地下唔郁得! 明明好地地, 又無0野撞到佢, 點解會趺呢? 其實朱古力奶舅父仔對前腳一直有事, 平時已經要做物理治療, 水療, 冰敷, 仲要打止痛針! 有時真係好唔明, 佢咁痛點解仲要佢去跑去比賽? 馬係鍾意跑, 但係佢對腳已經有事, 仲要操到去比賽, 真係......有d唔人道!
更不幸0既係, 佢傷成咁, 獸醫一定會建議人道, 因為佢唯一0既利用價值 -比賽贏錢, 都無埋, 仲有邊個會花錢去醫佢? 而佢0既成班所謂"主人", 無一個會去睇下佢! 賽馬同賽狗, 其實同虐待動物有咩分別?
我諗朱古力奶舅父仔已經去左彩虹橋啦, 希望佢0係果度唔洗再受腳痛之苦, 可以盡情跑!
P.S.
追風快將......REST IN PEACE!
http://www.hkjc.com/chinese/racing/ove_horse.asp?HorseNo=E150
前幾日落大雨, 攪到平時朱古力去開"方便"0既地方都濕晒, 雖然果度係有瓦遮頭, 但係因為日頭有車出出入入, 所以個地下都係濕晒! 前日朝早CoCo爸帶兩隻野落去, 朱古力奶兩個都齊齊"罷呵"屎屎, 平時CoCo都好乖, 有求必應, 早晚兩次已經習慣晒, 但係尋日地下真係好濕下, 平時CoCo去開大大果個位都濕晒, 衰囝點都唔肯呵! Milky又係, 連小便都要千揀萬揀, 揀個乾少少0既位先肯呵, 但係又係唔肯開大!
到夜晚, 我帶兩隻野落去, 地下乾左dd, CoCo就好乖咁自己走去條"御用坑渠"度小便(呢樣嘢真係要讚下CoCo, 佢每次都會自己走去坑渠度尿尿, 個個食蕉叔叔見到都讚佢架!), 跟住又走去平時開大0既另一條坑渠度係咁聞, 其實佢就一定係想去架啦, 因為日頭都無去度, 點知個衰仔又左滕右滕, 明明"座"低左想去架啦, 又嫌地下濕企返起身唔肯去! 結果攪左好耐, 最後都要屈服, 行左去一個平時唔去開, 但係乾0既位先肯開大!!!!!
到Milky啦, 呢位大小姐就更加唔洗講, 平時要搵個位去大小都轉十幾個圈, 搵成世先揀到個位, 而家仲要個地下濕晒, 直頸轉到我頭都暈埋先搵到個位呵!
呢兩位大少同大小姐, 唔通有潔癖?
呢度就係平時朱古力奶玩同去厠所0既平台, 好正架, 因為只係送貨嘅人同食蕉先會喺呢層出入, 夜晚基本上係無人嘅, 所以有好多狗友喺度放狗架! 紅色箭咀果度就係CoCo御用厠所, 因為有瓦遮頭, 所以打風落雨都唔怕! 就算出面地下濕晒, 都有最後防線, 就係呢個貨lift大堂啦, 玩波一樣無問題!
一直都想試下整芝士蛋糕, 不過又驚住難整, 因為味道又唔可以太甜, 又唔可以太"漏", 又唔可以無芝士味喎, 要整唔難, 要整得好食, 就有d難度! 上網搵左幾個recipe, 最後決定跟下面呢個, 雖然已經話係無咁甜同無咁"漏"0既做法, 但係我都係覺得甜左d, 下次要再改良下先得!
餅底材料︰(6吋模份量)
茶餅／消化餅 50克 (我係買一pack溝好左0既餅底粉, 自己再加牛油)
牛油 15克
餡料︰
藍莓 50克
檸檬汁 少許
忌廉芝士 250克 (我用light cream cheese, 無咁"漏")
糖 75克
牛奶 30ml (另一個recipe係用忌廉 150g, 應該會更原汁原味, 下次試下用忌廉)
雞蛋 1隻
餅面料:
藍莓果醬, 新鮮藍莓
做法:
1. 將茶餅／消化餅輾成餅碎。 (我用溝好左0既粉, 唔須要呢個步驟)
2.熱熔牛油，後與餅碎混合，壓在餅模上放入雪櫃備用。
3. 藍莓、25g糖和檸檬汁以慢火煮成濃漿，待涼。
4.50g糖加入忌廉芝士打至滑身。
5.將牛奶、蛋和（3）逐一加入芝士漿打勻。
6.將漿糊倒入餅底，坐於注有熱水的焗盤內，以160度焗1小時，待涼後，置雪櫃內備用。
7.將藍莓果醬搽於餅上，加上新鮮藍莓圍邊就完成啦。
我用呢隻無咁甜0既藍莓果醬, 同埋新鮮藍莓做topping (仲益左CoCo食左幾粒添 !個樣都唔係太樣衰, 下次加d士多啤利可能會靚d!
星期六晚d朋友黎左我地屋企睇足總歪決賽, 咁d男人睇波, 女人同狗咪好悶? 唔悶唔悶, 因為已經差唔多5個月大0既契仔波仔都有黎, 佢仲比佢阿媽剃晒d毛, 個樣好鬼攪笑! 波仔好醒, 狗仔細細已經識得揀飲擇食, 狗糧就唔吼, 芝士條就......攝都要攝0係朱古力奶中間, 驚死無佢份!
剃左毛0既波仔, 個樣好攪笑 !
契仔好鍾意比人摸肚肚架, 你睇佢個樣幾"lum"
話咁快5月又過左一半, 呢次屎得啦, 得返兩個幾禮拜, 就算唔食唔訓唔呵, 都無可能溫得晒d書, 唔好話3科, 1科都溫唔晒啦!
呢幾個禮拜日都要閉關, CoCo爸咁懶, 如果我唔出街, 朱古力奶都唔洗指意有街出!
正所謂洗濕左個頭, 家陣唯有求神拜佛, 每科讀到三分二都阿彌吉帝!
出呢篇0野, 純粹有感而發! 事緣有時出街見到d拖住細路0既師奶, 離遠見到Coco就好似見鬼咁, 拖住個細路兜路走, 仲要再比多個厭惡同歧視0既眼光比個主人(即係我), 其實個細路到底驚唔驚我真係唔知, 因為太遠睇唔到! 而我係一定同CoCo上繩, 仲要縮到條繩超短果隻! 有時真係好唔明, 呢d人連基本禮貌都無, 點樣教下一代? 廣告都有教啦, 身教好過言教! 有d父母又成日唔睇住d細路, 比d細路0係電梯大堂亂咁跑, 有次仲差d撞趺我! 最難得係, d父母唔覺得有問題! 我無話d細路, 一來錯不在個細路(係佢阿媽無家教姐), 二來我唔會幫人免費教仔架喎 ! 我幫人教仔要收錢架, 收開$500一粒鐘, 仲要預約架師奶!
唉, 師奶呀師奶, 都唔知你d細路可怕d, 定係我果兩隻上住繩0既狗可怕d呢?好啦, 呻完! 講返d正面教材, 到底朱古力奶同細路相處成點呢? 佢地係咪真係咁得人驚? 有相為證 !
"
"
